Տրազիմենյան լիճ, Տրազիմենոս, Տրազիմենուս լիճ (լատ․՝ Trasimenus, իտալ․՝ Trasimeno), լիճ Իտալիայի կենտրոնական մասում։ Ապենինյան թերակղզու ամենամեծ լիճը։ Գտնվում է ծովի մակերևույթից 259 մ բարձրության վրա, մակերեսը 128,6 կմ2 է, խորությունը՝ 6,6 մ (այլ տվյալներով՝ 8 մ)։ Պունիկյան պատերազմների (մ․ թ․ ա․ 264—146 թթ.)․ ժամանակ, մ․ թ․ ա․ 217-ի ապրիլին, Տրազիմենյան լճի մոտ տեղի է ունեցել ճակատամարտ Հաննիբալի կարթագենյան բանակի (մոտ 40000 մարդ) և կոնսուլ Գայոս Ֆլամինիոսի հռոմեական բանակի (31000 մարդ) միջև։ Հաննիբալի զորքերը հարձակվել են լճի և լեռների միջև ընկած նեղ կիրճով անցնող հռոմեական բանակի վրա ու ջախջախել։ Ճակատամարտում զոհվել է նաև հռոմեացիների զորահրամանատարը։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։
