Սուրբ Թադեոս եկեղեցի (Մասիս)

Սուրբ Թադեոս եկեղեցի;
Հիմնական տվյալներ
Տեսակ	եկեղեցի
Երկիր	Հայաստան
Տեղագրություն	Հայաստան Արարատի մարզ, Մասիս
Դավանանք	Հայ Առաքելական Եկեղեցի
Թեմ	Մասյացոտնի թեմ
Հոգևոր կարգավիճակ	Գործող
Ներկա վիճակ	Կանգուն
Ճարտարապետ	Արթուր Թարխանյան; Անահիտ Թարխանյան
Ճարտարապետական ոճ	Հայկական
Կառուցման ավարտ	2015, հոկտեմբերի 4
Առաջին հիշատակում	1991
	Saint Thaddeus Church, Masis Վիքիպահեստում

Սուրբ Թադեոս եկեղեցի, հայկական առաքելական եկեղեցի Հայաստանի Հանրապետության Արարատի մարզի Մասիս քաղաքում։

Պատմություն[խմբագրել | խմբագրել կոդը]

1991 թվականին Վազգեն Ա Ամենայն Հայոց Կաթողիկոսի կողմից ընտրվել է եկեղեցու կառուցման վայրը, և նույն տարում կատարվել է Եկեղեցու հիմնարկեքը։ Շինարարական աշխատանքները մեկնարկել են 2003 թվականին՝ բարերար Հրանտ Վարդանյանի նախաձեռնությամբ և ֆինանսավորմամբ։ 2015 թվականին եկեղեցու կառուցումն ավարտին են հասցրել նրա որդիները՝ Միքայել և Կարեն Վարդանյանները։

Վազգեն Ա Ամենայն Հայոց Կաթողիկոսի օրհնությամբ կառուցված այս եկեղեցին կոչվել է Սուրբ Թադեոս առաքյալի անունով։ Սուրբ Թադեոս եկեղեցին օծվել է Գարեգին Բ Ամենայն Հայոց Կաթողիկոսի ձեռամբ՝ 2015 թվականի հոկտեմբերի 4-ին։

Անմիջապես եկեղեցու մուտքի առջև տեղակայված է մոմավառության ընդարձակ սրահը։ Եկեղեցու բակում է գտնվում Հրանտ Վարդանյանի հիշատակի աղբյուրը։

2016 թվականին եկեղեցու բակում տեղադրվել է խաչքար՝ նվիրված Մեծ եղեռնի սրբադասված 1,5 միլիոն նահատակների հիշատակին։ Խաչքարը կերտված է մեկ ամբողջական տուֆ քարից (քանդակագործ՝ Արտակ Համբարձումյան)^[1]։

Ճարտարապետություն[խմբագրել | խմբագրել կոդը]

Սուրբ Թադեոս եկեղեցու ճարտարապետներն են Արթուր և Անահիտ Թարխանյանները։ Այն հայկական եկեղեցաշինության ավանդույթների ու ժամանակակից ճարտարապետական և շինարարական լուծումների համադրություն է^[2]։ Եկեղեցին եռաստիճան է, ըստ Անահիտ Թարխանյանի, տարբերվում է իր կոմպոզիցիայով և ծավալատարածական լուծումներով։ Անահիտ Թարխանյանի ներկայացմամբ՝ եկեղեցու ներքին տարածքը ձևավորված է երկու խաչվող քառակուսիներով, որոնք խորհրդանշում են հավերժությունն ու հավատի մաքրությունը, և որոնց միջոցով ձևավորվում է ամբողջ կոնստրուկտիվ համակարգը։ Գմբեթը հենված է կիսախաչվող կամարների վրա։ Եկեղեցին դրսից և ներսից երեսպատված է յուրահատուկ ոճով։ Կենտրոնից դեպի եզրերը գույները դառնում են ավելի բաց, իսկ հիմքից դեպի գմբեթը՝ ավելի մուգ^[3]։ Տաճարի բարձրությունը, առանց գմբեթի խաչի, 33 մետր է, ինչը խորհրդանշում է Հիսուս Քրիստոսի երկրային կյանքի տարիները։ Եկեղեցին շրջապատող պարսպի ամբողջ երկայնքով փորագրված է աստվածաշնչյան 33 պատգամ^[4]։