Մկրտիչ Սարգսյան

Մկրտիչ Դիվինի Սարգսյան
Դիմանկար
Ծնվել է	1924, մայիսի 2
Ծննդավայր	Ախալքալաք
Մահացել է	2002, հունիսի 23
Մահվան վայր	Երևան
Կրթություն	Հայկական պետական մանկավարժական համալսարան (1951)
Մասնագիտություն	բանաստեղծ, արձակագիր
Աշխատավայր	Գրական թերթ և ՀԳՄ
Կուսակցություն	ԽՄԿԿ
Պարգևներ և մրցանակներ	և ՀԽՍՀ պետական մրցանակ
Անդամություն	ՀԳՄ և ԽՍՀՄ ժուռնալիստների միություն
Երեխաներ	Դավիթ Սարգսյան

Մկրտիչ Դիվինի Սարգսյան (1924, մայիսի 2, Ախալքալաք- 2002, հունիսի 23, Երևան), հայ բանաստեղծ, արձակագիր։ ՀԽՍՀ մշակույթի վաստակավոր գործիչ, ՀԽՍՀ պետական մրցանակի դափնեկիր, ԼՂՀ պետական մրցանակի դափնեկիր։

Կենսագրություն

Մկրտիչ Սարգսյանի հուշատատակը Երևանի Բաղրամյան պողոտայում

Մկրտիչ Սարգսյանը ծնվել է 1924 թվականի մայիսի 2-ին, Ջավախքի Ախալքալաք քաղաքում։ 1931-1941 թթ. սովորել է Ախալքալաքի միջնակարգ հայկական դպրոցում։ 1942-1945 թթ. մասնակցել է Հայրենական մեծ պատերազմին, վարել հրաձգային վաշտի հրամանատարի, գումարտակի հրամանատարի տեղակալի պաշտոնները։ Պարգևատրվել է «Հայրենական պատերազմի» I և II աստիճանների շքանշաններով և բազմաթիվ մեդալներով։ 1945-1947 թթ. աշխատել է Ախալքալաքի միջնակարգ դպրոցում հայոց լեզվի և գրականության ուսուցիչ և զինղեկ։ 1947-1951 թթ. ուսանել է Երևանի Խ. Աբովյանի անվան մանկավարժական ինստիտուտի լեզվագրական ֆակուլտետում։ 1952-1959 թթ. աշխատել է ՀԿԿ կենտկոմում պրոպագանդայի և ագիտացիայի, այնուհետև՝ կուլտուրայի բաժնի հրահանգիչ։ 1958 թ. ընդունվել է ՀԳՄ շարքերը։
1959-1962 թթ.` ՀԳՄ պաշտոնաթերթ «Գրական թերթի» գլխավոր խմբագիր։ 1960 թ. ընդունվել է Հայաստանի ժուռնալիստների միության շարքերը։ 1961 թ. ՀԿԿ կենտկոմի բյուրոյի կողմից ստացել է նկատողություն՝ «Գրական թերթում» Հր. Մաթևոսյանի «Ահնիձոր» ակնարկի մասին փառաբանող հոդված տպագրելու համար։ 1962-1970 թթ՝ Հայպետհրատի գլխավոր խմբագիր։ 1965 թ. ՀԿԿ կենտկոմի բյուրոյի կողմից ստացել է խիստ նկատողություն՝ Քրիստափոր Թափալցյանի «Պատերազմ» վեպի IV հատորի տպագրության համար։ 1966 թ.` ուղևորություն Սիրիա և Լիբանան, ընդունելություն Սիմոն Վրացյանի կողմից Փալանջյան ճեմարանում։ 1969 թ. խմբագրել է Պ. Սևակի «Եղիցի լույս» ժողովածուն, որը լույս է տեսել նույն տարում և կալանվել պետական, կուսակցական վերադաս մարմինների կողմից։ 1975 թ. ՀՍՍՀ Գերագույն խորհրդի նախագահության հրամանագրով շնորհվել է հանրապետության կուլտուրայի վաստակավոր գործիչի կոչում։ 1975 թ. ընտրվել է ՀԳՄ քարտուղար և համատեղությամբ՝ կուս. բյուրոյի քարտուղար։ Աշխատել է մինչև 1986 թ.։ 1976, 1981 թթ. ՀԿԿ XXVI և XXVII համագումարներում ընտրվել է ՀԿԿ վերստուգիչ հանձնաժողովի անդամ։
1968, 1980, 1982 թթ. ընտրվել է ժողովրդական դեպուտատների Երևանի քաղաքային խորհրդի երեք գումարումների դեպուտատ։ 1981 թ. ԽՍՀՄ գրողների միության VII համագումարում ընտրվել է ԽՍՀՄ ԳՄ վարչության անդամ։ 1983 թ. «Խաղաղություն պատերազմից առաջ» ժողովածուի համար շնորհվել է Հայաստանի պետական մրցանակի դափնեկրի կոչում։ 1984 թ. ԽՍՀՄ գրողների միության կազմավորման 50-ամյակի կապակցությամբ և ծննդյան 60-ամյա առիթով պարգևատրվել է «Ժողովուրդների բարեկամություն» շքանշանով։ 1984 թ. «Ձոն Երևանին» բանաստեղծությունը ՀԳՄ վարչության որոշմամբ արժանացել է «Երևանը և երևանցիները» մրցանակաբաշխության առաջին մրցանակին։ 1986-1991 թթ. աշխատել է ՀԳՄ-ում գրական խորհրդատու։

Երկեր

• Երգեր, Երևան, 1957, 127 էջ։
• Գետակ, Երևան, 1959, 172 էջ։
• Կյանքը կրակի տակ, Երևան, 1963, 412 էջ։
• Շատ եք փոխվել, աղջիկներ, Երևան, 1964, 80 էջ։
• Տիրամոր պատկերի առջև, Երևան, 1965, 40 էջ։
• Կարոտի երգ, Երևան, 1966, 76 էջ։
• Ճակատագրով դատապարտվածներ, Երևան, 1967, 532 էջ։
• Զինվորներ և սիրահարներ։ Որոշել եմ սպանել պատերազմը։ Կյանքը կրակի տակ։ Ճակատագրով դատապարտվածներ։ Երևան, 1969, 600 էջ։
• Սերժանտ Կարոն։ Ճանապարհ։ Կանգառ նահանջի ճանապարհին, Երևան, 1970, 232 էջ։
• Բարև, բարի արև, Երևան, 1973, 536 էջ։
• Քեռի Սիմոնը, Երևան, 1974, 72 էջ։
• Երկեր, 2 գրքով, գիրք 1, Երևան, 1976, 832 էջ։
• Երկեր, 2 գրքով, գիրք 2, Երևան, 1977, 704 էջ։
• Քաջ Նազար, Երևան, 1980, 384 էջ։
• Խաղաղություն պատերազմից առաջ, Երևան, 1981, 520 էջ։
• Աստղաբույլ, Երևան, 1983, 240 էջ։
• Գարուն էր, ձյուն էր արել, Երևան, 1984, 520 էջ։
• Չմակարդվող արյուն, Երևան, 1985, 472 էջ։
• Ընտիր երկեր, 2 հատորով, հատոր 1, Երևան, 1988։
• Ընտիր երկեր, 2 հատորով, հատոր 2, Երևան, 1988:
• Գրիգոր Նարեկացի /վեպ/, Երևան, 1988։
• Խաղաղություն պատերազմից առաջ։ Չմակարդվող արյուն /վեպեր/, Երևան, 1989, 752 էջ։
• Լույս լեռան վրա, Երևան, 1990։

Գրականություն

• Մկրտիչ Սարգսյան. գրողի ճանապարհը (կենսամատենագրություն), Ե., 2000։
• Աղաբեկյան Կ., Երեք դիմանկար, Ե., 1983։

Արտաքին հղումներ

• Մկրտիչ Սարգսյան, Դեպի լեառն Աբուլ

Վիքիքաղվածքն ունի քաղվածքների հավաքածու, որոնք վերաբերում են

Մկրտիչ Սարգսյան հոդվածին