Սուսաննա Խաչատրյան

Խաչատրյան Սուսաննա Սեդրակի (ծն. ապրիլի 13, 1909, Երևան - անհայտ), խաղողագործ-սելեկցիոներ, կենսաբանական գիտությունների դոկտոր (1965)։

Ավարտել է Երևանի համալսարանի գյուղատնտեսության ֆակուլտետը (1930)։ 1938-1949 թվականներին աշխատել է ՀԽՍՀ ԳԱ բույսերի գենետիկայի, 1949 թվականից՝ խաղողագործության, գինեգործության և պտղաբուծության ԳՀԻ-ներում։

Գիտական աշխատանքները նվիրված են խաղողի գենետիկայի և սելեկցիայի հարցերին։ Խաչատրյանը (Ս. Հ. Պողոսյանի հետ) ստեղծել է վաղահաս խաղողի 14 (Գուգարաց, Արթենիկ, Ուրարտու, Անուշ, Մուսկատ Սուսաննա, Ախթամար և այլն) և սեղանի ու գինու խաղողի 27 տեսակներ, որոնցից 9-ը շրջանացված են և ներդրված արտադրության մեջ։ Արժեքավոր են Խաչատրյանի աշխատանքները նաև սեղանի խաղողի միջահաս և ուշահաս, խոշորապտուղ, փոխադրունակ տեսակների ստացման բնագավառում։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։