Թասմանիա (կղզի)

Թասմանիա (կղզի)

Թասմանիա (Tasmania), կղզի Ավստրալիայի հարավ-արևելքում։ Մայր ցամաքից բաժանվում է Բասի նեղուցով։ Հարակից կղզիների հետ Ավստրալիական Միության նահանգն է։ Տարածությունը 68,3 հազար կմ2 է, (1979), վարչական կենտրոնը՝ Հոբարտը։ Կղզին հանդիսանում է Ավստրալիայի Ջրբաժան մեծ լեռնաշղթայի շարունակությունը։ Ափերին առաջացել են բազմաթիվ ծոցեր։ Ռելիեֆում գերակշռում են զառիթափ լանջերով սարավանդներն ու բարձրավանդակները։ Առավելագույն բարձրությունը 1617 մ է (Օսա լեռ)։

Կլիման

Կլիման հյուսիսում մերձարևադարձային է, հարավում՝ բարեխառն, խոնավ։ Հուլիսի միջին ջերմաստիճանը 8°C է, փետրվարինը՝ 17°C, տարեկան տեղումները՝ 600-2800 մմ։ Գետերը ջրառատ են, հարուստ՝ հիդրոռեսուրսնեով։ Կենտրոնական սարավանդում կան սառցադաշտային լճեր։ Տիրապետում են խոնավ անտառները (էվկալիպտ, մշտականաչ հաճարենի) և ալպյան մարգագետինները։

Տնտեսությունը

Տնտեսության գլխավոր ճյուղը արդյունաբերությունն է։ Արդյունահանում են պղնձի, երկաթի, բազմամետաղային, ցինկի, կապարի, ոսկու, արծաթի հանքանյութ, քարածուխ։ Կա գունավոր մետաղաձուլություն, թաղանթանյութի, թղթի, տեքստիլ, սննդի արդյունաբերություն և այլն։ Գյուղատնտեսության գլխավոր ճյուղը անասնապահությունն է։ Մշակում են կերային կուլտուրաներ, բանջարեղեն, զբաղվում՝ այգեգործությամբ։ Խոշոր նավահանգիստը Հոբարտն է։ Թասմանիան հայտնագործել է Տսսմանը, 1642 թվականին։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։