Մոդուլյատորներ

Պատկեր:Monika1.jpg

Նկ. 1 տրանզիստորային ամպլիտուդային մոդուլյատորներ․ ա—բազային, բ—կոլեկտորային, U_բհ—մոդուլվող տատանումների լարում, S—ցածր հաճախային տրանսֆորմատոր, C₁, C₂ և L_r L₁ կոնդենսատորներ և ինդուկտիվության կոճեր, R և R₁—հաստատուն լարման բաժանարարի ռեզիստորներ, E_կ-տրանզիստորի կոլեկտորին տրվող լարում, Ս_մ--մոդուլող լարում

Պատկեր:Modulyator.jpg

Նկ․ 2 վարիկապային հաճախային մոդուլյատոր․ Վ-վարիկապ, E_վ Е_տ—վարիկապին և տրանսֆորմատորին տրվող լարումներ, C, C₁, C₂—քանդվող շղթաների կոնդենսատորներ, R, R₁, R₂—քանդվող շղթաների ռեզիստորներ, L—ինդուկտիվության կոճ, U_մ-մոդուլվոդ լարում, S—տրանզիստոր

ՄՈԴՈՒԼՅԱՏՈՐ, մոդուլումն իրականացնող սարք։ Ինֆորմացիայի հաղորդման համակարգերում ապահովում է կրող տատանման պարամետրերի փոփոխումը հաղորդվող հաղորդագրության փոփոխման օրենքի համաձայն, էլեկտրակապի և ռադիոհաղորդման հաղորդիչ սարքերի անհրաժեշտ բաղադրամասն է։ Մոդուլյատորի սխեման և աշխատանքի սկզբունքը պայմանավորված են մոդուլման տեսակով։ Լինում են՝ ամպլիտուդային, հաճախային, փուլային, իմպուլսային և այլն։

Մոդուլյատորում կրող տատանման կառավարումը կատարվում է ոչ գծային դիմադրության կամ ռեակտիվ տարրի օգնությամբ։ Օրինակ, ամպլիտուդային մոդուլումը իրագործվում է եռէլեկտրոդ (բազմէլեկտրոդ) լամպային կամ տրանզիստորային սխեմաներում(Նկ. 1), իսկ հաճախային մոդուլումը՝ ռեակտիվ լամպի կամ տարրի օգնությամբ (նկ․ 2)։

Վերջին դեպքում մոդուլող լարումով (հաղորդագրությամբ) փոփոխելով ռեակտիվ լամպի կամ տարրի ունակությունը (ինդուկտիվությունը), փոփոխում են գեներատորի հաճախականությունը։ Մոդուլյատորի աշխատանքը հիմնականում գնահատվում է մոդուլման բնութագրով։ Ամպլիտուդային մոդուլման դեպքում`

M=f(VΩ)

իսկ հաճախայինի դեպքում՝

Δω / ωo = f(VΩ)

երկու դեպքում էլ Ω= const, M-ը ամպլիտուդային մոդուլման գործակիցն է (մոդուլված տատանման պարամետրի առավելագույն և միջին արժեքների հարաբերությունը), V_Ω-ն՝ մոդուլող լարման ամպլիտուդը մոդուլյատորի մուտքում, Δω/ω_o-ն մոդուլվող հաճախականության հարաբերական շեղումն է մոդուլյատորի ելքում, Ω-ն՝ մոդուլող տատանման հաճախականությունը։