Հնագիտություն

Հնագիտություն, նյութական, հիմնականում պեղածո աղբյուրների հիման վրա մարդկության պատմական անցյալը և, մասնավորապես, հին ու միջնադարյան հասարակությունն ու նրա մշակույթն ուսումնասիրող գիտություն։ Անմիջական առարկան հնագիտական հուշարձանն է, ընդհանրացված առարկան՝ հնագիտական մշակույթը։ Բաղկացած է ուսումնասիրության աղբյուրագիտական, վերակազմական և բացատրական աստիճաններից, փորձային (փորձի հիման վրա) և տեսական եղանակներից։ Առանձին ճյուղ է Հնագիտության պատմագրությունը։

Հնագիտությունը սերտորեն կապված է մարդաբանության, ազգագրության, դրամագիտության, վիմագրության, կնքագիտության, պատմական սոցիոլոգիայի, մշակույթի պատմության, արվեստի պատմության, Հին աշխարհի և միջին դարերի պատմությունների, լեզվաբանության հետ։

Այս հոդվածի նախնական տարբերակը կամ նրա մասը վերցված է Հայկական համառոտ հանրագիտարանից, որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։