Միշել Մերսյե

Միշել Մերսյե; ֆր.՝ Michèle Mercier
Ծնվել է	հունվարի 1, 1939[…] (85 տարեկան)
Ծննդավայր	Նիս, Ֆրանսիայի երրորդ հանրապետություն
Քաղաքացիություն	Ֆրանսիա
Մասնագիտություն	դերասանուհի, սցենարիստ և կինոդերասանուհի
Պարգևներ և մրցանակներ	և
	l3m.free.fr

Միշել Մերսյե (ֆր.՝ Michèle Mercier, իրական անունը՝ Ժոսլին Իվոն Ռենե Մերսյե, հունվարի 1, 1939(1939-01-01)^[1]^[2]^[3]^[…], Նիս, Ֆրանսիայի երրորդ հանրապետություն^[4]), ֆրանսիացի դերասանուհի։ Ընդհանուր առմամբ նկարահանվել է 55 կինոնկարում և երեք հեռուստասերիալում։ Արժանացել է Արվեստների և գրականության շքանշանի։

Կենսագրություն[խմբագրել | խմբագրել կոդը]

Միշել Մերսյեն ծնվել է ֆրանսիացու և իտալուհու ընտանիքում։ Մանկության տարիներին հրապուրվել է պարերով։ 1957 թվականին նա արդեն Նիսի օպերային թատրոնի բալետի պարուհի էր։ Մորիս Շևալյեն հանդիպելով երիտասարդ պարուհուն, նրան կանխագուշակել է մեծ հաջողություն։ 17 տարեկանում մեկնել է Փարիզ, չնայած, որ ծնողները դեմ էին և ցանկանում էին, որ իրենց դուստրը ժառանգեր ընտանիքին պատկանող դեղաբանական ընկերությունը։ Սկզբում նա պարում էր բալետմայստեր Ռոլան Պետիի խմբում, իսկ հետո «Էյֆելյան աշտարակի բալետ» պարային խմբում։ Փարիզում ծանոթացել է Չարլի Չապլինի հետ, ով նրան խորհուրդ է տվել սովորել անգլերեն լեզուն և փորձել նկարահանվել կինոյում։ Երբ պարային խումբը լուծարվեց, Մերսյեն ուղևորվեց Լոնդոն։ Այնտեղ սովորել է դերասանի վարպետություն, սակայն շուտով վերադարձել է հայրական տուն։

Միշել Մերսյեի կինոդեբյուտը կայացել է 1957 թվականին, երբ նկարահանվել է «Դռան բռնակի պտույտը» կինոնկարում։ Ֆիլմի ռեժիսորը նրան հանդիպել էր Նիսում։ Պրոդյուսերները հավանություն չէին տվել Ժոսլին անվանը և այն փոխվեց Միշելի։ Պաշտոնապես այդ անունը վերցվել էր ի պատիվ հայտնի դերասանուհի Միշել Մորգանի, սակայն հանգամանքների բերումով այնպես էր ստացվել, որ Միշել էր նաև նրա կրտսեր քրոջ անունը, ով մանուկ հասակում մահացել էր տիֆից։

Դեբյուտից հետո հաջորդեցին մի շարք ֆիլմեր՝ ռոմանտիկ կատակերգություններ, ամերիկյան սարսափ-ֆիլմեր, կատակերգություն Բոբ Հոուպի հետ և փոքրիկ դերեր Ֆրանսուա Տրյուֆոյի «Կրակեք դաշնակահարի վրա» (1960 թ.) և Անատոլ Լիտվակի «Արդյոք դուք սիրում եք Բրամսին» (1961 թ.) կինոնկարներում։ Քննադատները կարծիքներ են հայտնել դերասանուհու անբռնազբոսիկ շարժումների, կինոխցիկի առջև անկաշկանդ պահվածքի, վառ արտաքինի և գեղեցիկ կազմվածքի վերաբերյալ։ Թատրոնի բեմում նրա դեբյուտը կայացել է 1958 թվականին՝ «Ահա և թխահերը» ներկայացման մեջ, սակայն բեմական կարիերան այդպես էլ զարգացում չունեցավ։

Շուտով Միշել Մերսյեն մեկնեց աշխատելու Մեծ Բրիտանիա, իսկ հետո Իտալիա, որտեղ մեկ տասնյակից ավել իտալական ակնարկներում նկարահանվելով, նա դարձավ ամենահայտնի ֆրանսիական դերասանուհին Իտալիայում։ Այստեղ Միշել Մերսյեն խաղացել է ռոմանտիկ, արկածային, կատակերգական, դետեկտիվ և այլ ժանրերի կինոնկարներում։ Նրան արդեն ճանաչում էին բազմաթիվ երկրներում, սակայն հարազատ Ֆրանսիայում շատ քչերը գիտեին նրա մասին։

1963 թվականին ռեժիսոր Բեռնար Բորդերին առաջարկեց Միշել Մերսյեին, նկարահանվել Անն և Սերժ Գոլոն զույգի «Անժելիկա» վեպի մոտիվներով նկարահանվող պատմական ֆիլմի գլխավոր դերը։ Ֆիլմում նկարահանվելու առաջարկից հրաժարվել էին Բրիժիտ Բարդոն, Կատրին Դենյովը և Ջեյն Ֆոնդան։ Միշելն հաջողությամբ անցավ փորձերը և ստացավ XVII դարի պատմականորեն կեղծ կերպարի դերը, ով բոլոր հասանելի միջոցներով պայքարում էր իր կանացի երջանկության համար։ Ֆիլմում նրա խաղընկերը Ռոբեր Հոսեյնն էր։ 1964-1968 թվականներին Անժելիկայի մասին թողարկվեց ընդհանուր առմամբ հինգ ֆիլմ ` «Անժելիկան՝ հրեշտակների մարքիզուհին» (1964 թ.), «Հիասքանչ Անժելիկան» («Ցասկոտ Անժելիկան» 1965 թ.), «Անժելիկան և թագավորը» (1966 թ.), «Անսաստելի Անժելիկան» (1967 թ.) և «Անժելիկան և սուլթանը» (1968 թ.)։ Այս դերը դերասանուհուն համաշխարհային ճանաչում բերեց։

Անժելիկայից հետո դերասանուհին փորձում էր ազատվել այդ կերպարից, քանի որ 1960-ական թվականների վերջից, համաշխարհային հանդիսատեսի կողմից Միշել Մերսյեն ընկալվում էր առաջին հերթին որպես Անժելիկա։ Նա էկրանին հայտնվեց մարմնավաճառուհու դերում, հանդես գալով «Երկնային ամպրոպ» (1965 թ.) ֆիլմում ` Ժան Գաբենի հետ միասին, իսկ Քրիստիան-Ժակի «Երկրորդ ճշմարտություն» (1966 թ.) ֆիլմում նա հանդես է եկել մարդասպանի կերպարով։ Ամեն դեպքում Անժելիկայից հետո, նրա բոլոր դերերը մնում էին աննկատ։ ԱՄՆ-ում նկարահանված «Բոլորին չես հաղթի» (1970 թ.) կինոնկարը, որտեղ նրա խաղընկերներն էին Թոնի Քերթիսը և Չարլզ Բրոնսոնը, նույնպես հաջողություն չունեցավ։

Տարիներ անց Միշել Մերսյեն իր աստղային դերի մասին արտահայտվել է հետևյալ կերպ. «Մի կողմից նա ինձ բերեց անհավանական հռչակ, իսկ մյուս կողմից ռեժիսորները բացի Անժելիկայից, իմ մեջ չէին տեսնում ուրիշ որևէ մեկին։ Այնպես որ, Անժելիկան ինձ համար և ճակատագիր է, և հաղթանակ, և անեծք»։ «Մարդիկ իմ մասին խոսում են, ինչպես Անժելիկայի մասին, չնայած, որ ես խաղացել եմ մի քանի տասնյակ այլ կանանց տարբեր դերեր։ Ես երկար տարիներ է, ինչ փորձում էի մոռանալ նրա մասին, սակայն այժմ թվում է, որ նա իմ փոքրիկ քույրն է, ով միշտ պատրաստ է օգնել ինձ։ Ես սովորել եմ ապրել նրա հետ միասին»։

Միշել Մերսյեն նկարահանվել է նաև «Հրեշտակը երկրի վրա» (1959 թ.), «Վախի երեք դեմքերը» (1963 թ.), «Ավագ Ֆերշոն» (1963 թ.), «Սև արև» (1966 թ.), «Աշխարհի հնագույն մասնագիտությունը» (1967 թ.), «Պարան և կոլտ» («Գերեզմանոց առանց խաչերի» 1968 թ.), «Լեդի Համիլթոնի սիրեկանները» (1968 թ.), «Ոսկե այրին» (1969 թ.) և այլ ֆիլմերում։

Անձնական կյանքը[խմբագրել | խմբագրել կոդը]

Միշել Մերսյեի հավաստմամբ, անձնական երջանկություն նա երբեք չի ունեցել, չնայած որ ամուսնացած է եղել չորս անգամ ` երկու անգամ պաշտոնապես և երկու անգամ` փաստացի։ 1961 թվականին ամուսնացել է ռեժիսորի օգնական Անդրե Սմագիի հետ։ Վերջինս հարբեցող էր և ամուսնալուծվել են 1965 թվականին։ 1970 թվականին ամուսնացել է մրցարշավորդ Կլոդ Բուրիլոյի հետ, սակայն վերջինս մի օր անհետացավ, տանելով իր հետ դերասանուհու թանկարժեք զարդերն ու գումարները։ Նրանք բաժանվեցին 1976 թվականին։

1984 թվականին, Միշել Մերսյեն հեռացավ կինոյից, որպեսզի ամբողջովին տրվի անձնական կյանքին։ Կրկին կինոնկարահանման հրապարակ վերադարձավ 14 տարի անց։ 1999 թվականին, ֆինանսական դժվարությունների պատճառով, նա վաճառքի հանեց իր անձնական իրերը և Անժելիկայի հագուստները, որոնք ժամանակին գնել էր կինոստուդիայից։ Նա սիրավեպ է ունեցել նաև իտալական արքայազնի հետ, սակայն երեք տարի անց նրանք բաժանվել են։ Միշել Մերսյեն երեխաներ չի ունեցել։

Մասնակի ֆիլմագրությունը[խմբագրել | խմբագրել կոդը]

Թվական	Անվանում	Բնօրինակ անվանում	Կերպար
1957	Դռան բռնակի պտույտը	Retour de manivelle	Ժաննա
1957	Տուր ինձ հնարավորություն	Donnez-moi ma chance	Նիկոլ Նոբլե
1959	Լուկրեցիա Բորջիայի գիշերները	Le notti di Lucrezia Borgia	Դիանա դ'Ալվա
1959	Հրեշտակը երկրի վրա	Ein Engel auf Erden	Ավգուստա դե Մյունխենբերգ
1960	Սատանայական պար	Le Saint mène la danse	Դանի
1960	Ահա և թխահերը	La brune que voilà	Սոֆի
1960	Կրակեք դաշնակահարի վրա	Tirez sur le pianiste	Կլարիսա
1960	Նշանառության գիծ	La ligne de mire	Էլեն
1961	Արդյոք դուք սիրու՞մ եք Բրամսին	Goodbye Again	Մեյսի 3
1961	Մոլեգնություն Մաքսանենգների ծովածոցում	Fury at Smugglers' Bay	Լուիզա Լեժեն
1961	Ալադինի արկածները	Le meraviglie di Aladino	արքայադուստր Զայնա
1962	Ծովային վրիժառուները	Il giustiziere dei mari	Ջենիֆեր
1962	Մռնչացող տարիներ	Gli anni ruggenti	Էլվիրա
1962	Սատանայական կղզու գերուհին	Le prigioniere dell'isola del diavolo	Մարտինա Ֆոշե
1963	Սիմֆոնիա սպանդի համար	Symphonie pour un massacre	Մադլեն Կլավե
1963	Վախի երեք դեմքերը	I tre volti della paura	Ռոզի
1963	Ավագ Ֆերշոն	L'aîné des Ferchaux	Լու
1963	Տիկնիկը	La pupa	Տիկնիկ
1963	Հրեշը	I mostri	Մարի
1964	Բարձրագույն անհավատարմություն	Alta infedeltà	Կլարա
1964	Հինգշաբթի	Il giovedì	Էլզա
1964	Մեծ գործ	A Global Affair	Լիզետա
1964	Ամառային անմտություն	Frenesia dell'estate	Ժիժի
1964	Սեր` չորս սեզոնների համար	Amore in 4 dimensioni	Լուիզա
1964	Վիա Վենետո	Via Veneto	-
1964	Անժելիկան՝ հրեշտակների մարքիզուհին	Angélique, marquise des anges	Անժելիկա Սանսե դե Մոնտելու
1965	Հիասքանչ Անժելիկան	Merveilleuse Angélique	Անժելիկա
1965	Կազանովա 70	Casanova '70	Նոել
1965	Երկնային ամպրոպ	Le tonnerre de Dieu	Սիմոնա Լեբոշե
1966	Անժելիկան և թագավորը	Angélique et le roy	Անժելիկա
1966	Երկրորդ ճշմարտություն	La seconde vérité	Նատալի Նեվիլ
1966	Մեր ամուսինները	I nostri mariti	Օլգա
1966	Ինչպես ես սովորեցի սիրել կանանց	Come imparai ad amare le donne	Ֆրանցիսկա
1966	Սև արև	Soleil noir	Քրիստինա Ռոդյե
1967	Աշխարհի հնագույն մասնագիտությունը	Le plus vieux métier du monde	Բրիտ
1967	Անսաստելի Անժելիկան	Indomptable Angélique	Անժելիկա
1968	Անժելիկան և սուլթանը	Angélique et le sultan	Անժելիկա
1968	Լեդի Համիլթոնի սիրեկանները. Ճանապարհ դեպի բարձրաշխարհիկ կյանք	Le calde notti di Lady Hamilton	Էմմա Համիլթոն
1968	Պարան և կոլտ (Գերեզմանոց առանց խաչերի)	Une corde, un Colt	Մարիա Կեյն
1969	Ոսկե այրին	Une veuve en or	Դելֆինա
1970	Բոլորին չես հաղթի	You Can't Win 'Em All	Այլա
1971	Սարդի գրկում (Կարմիր մահվան դիմակը)	Nella stretta morsa del ragno	Էլիզաբեթ Բլեկվուդ
1971	Կամա-ակամա	Per amore o per forza	Արաբելլա
1971	Սկանդալ Հռոմում	Roma bene	Վիլմա Ռապի
1971	Մակեդոնական գործողություն (Խառնախորտիկ)	Macédoine	Կատերինա
1972	Նախնիների կանչը	The Call of the Wild	Կալիոպա Լորեն
1977	Աշխարհի կանայք	Les femmes du monde	Դանիելա Ռավեն
1979	Երկաթե ձեռքով Գյոց ֆոն Բեռլիխինգենը	Götz von Berlichingen mit der eisernen Hand	Ադելաիդա, կոմսուհի վան Վոլդորֆ
1980	Հաղթական կամար	Arch of Triumph	-
1984	Ջին տոնիկ	Jeans Tonic	Միշել Դաբրե
1998	Կողմնորոշիչ	La rumbera	Ռաքելը ծեր տարիքում
2003	Գեղեցկության սրահը	Il bello delle donne	Նաոմի
2004	Կարմիր կապելլա	Красная капелла	Էլենը ծեր տարիքում
2004	Կոստյա Գումանկովի փարիզյան սերը	Парижская любовь Кости Гуманкова	ֆրանսուհի
2005	Վեներան և Ապոլոնը	Vénus & Apollon	Նիկոլ Դոմոնտ
2011	Նրանք, ովքեր սիրում էին Ռիխարդ Վագներին	Celles qui aimaient Richard Wagner	Բրիջիտ

Ծանոթագրություններ[խմբագրել | խմբագրել կոդը]

↑ ^1,0 ^1,1 filmportal.de — 2005.
↑ ^2,0 ^2,1 GeneaStar
↑ ^3,0 ^3,1 Babelio (ֆր.) — 2007.
↑ ^4,0 ^4,1 ^4,2 Deutsche Nationalbibliothek Record #119073560 // Gemeinsame Normdatei (գերմ.) — 2012—2016.

Վիքիպահեստն ունի նյութեր, որոնք վերաբերում են «Միշել Մերսյե» հոդվածին։

[_ee40687f454ba433-1] 1,0 ^1,1 filmportal.de — 2005.

[_1e12423511b86daa-2] 2,0 ^2,1 GeneaStar

[_635b60e0ec9a6d75-3] 3,0 ^3,1 Babelio (ֆր.) — 2007.

[_f7d3705ff4e8912d-4] 4,0 ^4,1 ^4,2 Deutsche Nationalbibliothek Record #119073560 // Gemeinsame Normdatei (գերմ.) — 2012—2016.

[1]

[2]

[3]

[4]