The Million Dollar Homepage
| The Million Dollar Homepage | |
|---|---|
 | |
| milliondollarhomepage.com(անգլ.) | |
| Տեսակ | կայք |
| Լեզու | անգլերեն |
| Սեփականատեր | Ալեքս Տյու |
| Հեղինակ | Ալեքս Տյու |
| Բացված | օգոստոսի 26, 2005 |
 The Million Dollar Homepage Վիքիպահեստում | |
The Million Dollar Homepage, կայք, որը ստեղծել է Ուիլթշիրից 21-ամյա ուսանող Ալեքս Տյուն, որպեսզի վաստակի գումար համալսարանական ուսուցման համար։ Կայքը բաղկացած է 1000 լայնությամբ և 1000 երկարությամբ փիքսելների ցանցից, որոնք ընդհանուր պարունակում են 1 միլիոն փիքսել։ Յուրաքանչյուր փիքսել վաճառվում էր 1 դոլարով և նրանում հնարավոր էր տեղադրել սեփական կայքի հղումը։ Վաճառվող փիքսելների նվազագույն քանակը 10x10 է, քանի որ ավելի փոքր չափերի վրա դժար էր տարբերակել պատկերը։ Կայքը բացվել է 2005 թվականի օգոստոսի 26-ին։ Գնորդներն իրենց վանդակում տեղադրում էին փոքրիկ պատկեր, կայքի հղում և կարգախոս, որը հայտնվում է, երբ մկնիկը պահում են վանդակի վրա։ Կայքի նպատակն էր վաճառել բոլոր 1 մլն փիքսելները, որպեսզի գոյանար 1 մլն դոլար շահույթ։
2006 թվականի հունվարի 1-ին վերջին 1000 փիքսելը աճուրդով վաճառվեց eBay կայքում։ Աճուրդն ավարտվեց հունվարի 11-ին առաջարկված 38'100 դոլարով։ Արդյունքում կայքի շահույթը և աճուրդը Ալեքս Տյուին բերեց 1'037'100 դոլար։ Աճուրդի ժամանակ կայքը ենթարկվել է DDoS հարձակման։ Տյուն էլեկտրոնային փոստով նամակ է ստացել, որում պահանջում էին վճարել իրենց հարձակումը դադարեցնելու համար։ Սակայն վերջինս հրաժարվել է, որի արդյունքում կայքն այցելուների համար անհասանելի էր մի քանի շաբաթ, մինչև արդիականացվեց անվտանգության համակարգը։ Հետաքննությունների դաշնային բյուրոն և Ուիլթշիրի ոստիկանությունը հետաքննել են հարձակումը։
Կայքը դրական արձագանքներ է ստացել լրատվամիջոցներից։ Մի քանի պարբերականներ կայքը համարել են պարզ, հանճար և փայլուն գաղափար, սակայն եղել են նաև այնպիսիները, որոնք քննադատել են այն բանի համար, որ կայքը գովազդներից բացի չունի բովանդակություն։
Ստեղծում[խմբագրել | խմբագրել կոդը]
«The Million Dollar Homepage» կայքի ստեղծման գաղափարը բրիտանական Ուիլթշիր քաղաքի ուսանող Ալեքս Տյուի մոտ առաջացել է 2005 թվականի օգոստոսին, երբ նա ընդամենը 21 տարեկան էր[1]։ Նա պատրաստվում էր 3 տարի Նոթինգհեմի համալսարանում սովորել բիզնես կառավարում, սակայն անհանգստացած էր, որ կարող է երկար տարինել վճարել ուսանողական վարկը[1]։ Ալեքսի գաղափարն էր ստեղծել կայք, որը բաղկացած կլիներ 1 մլն փիքսելից և նա կարող էր 1 դոլարով վաճառել յուրաքանչյուր փիքսելը, որի գնորդը հնարավորություն կունենար այնտեղ տեղադրել իր կայքի հղումը։ Փիքսելն ԱՄՆ դոլարով, և ոչ թե ֆունտ ստերլինգով վաճառելու գաղափարն այն էր, որ այն ներգրավի ավելի շատ մարդկանց, քանի որ այդ տարիներին ֆունտ ստերլինգը բավական կայուն դիրք ուներ դոլարի համեմատ՝ 1 ֆունտն արժեր 1 դոլար և 80 ցենտ։ Այդ արժեքը հնարավոր էր բավական թանկ լիներ հավանական գնորդների համար և դժվարանար 1 մլն ֆունտ վաստակելու նպատակը[2][3]։
Կայքը ստեղծելու համար Տյուից պահանջվել է 50 ֆունտ ստերլինգ, որը ծախսել է դոմեյնը գրանցելու և հոսթինգի համար։ Կայքը բացվել և սկսել է գործել 2005 թվական օգոստոսի 26-ին[4]։
Կայքի գլխավոր էջում տեղակայված է կայքի անվանման բանները, հաշվիչը, վաճառված փիքսելների քանակը, ներքին 9 էջերի հղումներով նավարկության վահանակը, ինչպես նաև դատարկ քառակուսիներով ցանց՝ բաղկացած 1 մլն փիքսելներից, որոնք բաժանված են 100 փիքսելներով 10'000 բլոկներից[5]։
Տյուն իր հաճախորդներին խոստացել է, որ կայքը կգործի նվազագույնը 5 տարի, այսինքն առնվազն մինչև 2010 թվականի օգոստոսի 26-ը[6][7]։ Կայքից ստացված գումարով Ալեքս Տյուն Ուիլթշերի իր հայրենի տնից տեղափոխվել է Լոնդոն` ապրելով վարձակալած տանը։ Նա այդ գումարով իր համար նաև ավտոմեքենա է գնել[8]։ Երբ կայքը սկսել էր զարգանալ, նա դեռ նոր էր ավարտել առաջին սեմեստրը և թողեց կրթությունը, իր բիզնես-մտահաղացմանն ավելի շատ ժամանակ տրամադրելու համար։ Բացի այդ, Տյուն նշել է, որ իր համար շատ դժվար է երկար ժամանակ նստել մի վայրում և կենտրոնանալ դասի վրա[8]։ Կայքի հաջողություններից հետո Ալեքսն աշխատանքների տարբեր առաջարկներ է ստացել, որոնցից մի քանիսը բավական տպավորիչ էին, սակայն նա մերժել է բոլորը և որոշել սկսել իր սեփական գործը[8]։ 2016 թվականի դրությամբ Ալեքսն ապրում ու աշխատում էր Սան Ֆրանցիսկոյում, որտեղ «Calm» ստարտափի հիմնադիր և գլխավոր տնօրենն է[3]։
Ծանոթագրություններ[խմբագրել | խմբագրել կոդը]
- ↑ 1,0 1,1 «Student's cash-raising net scheme» (անգլերեն). BBC News. 2005 թ․ սեպտեմբերի 22. Վերցված է 2018 թ․ օգոստոսի 10-ին.
- ↑ Jew, Alex (2005 թ․ օգոստոսի 26). «The Million Dollar Homepage FAQ» (անգլերեն). Million Dollar Homepage. Արխիվացված է օրիգինալից 2009 թ․ փետրվարի 1-ին. Վերցված է 2009 թ․ հունվարի 30-ին.
- ↑ 3,0 3,1 Elizabeth Garone (2016 թ․ սեպտեմբերի 15). «The man behind the million-dollar homepage». BBC (անգլերեն). Վերցված է 2018 թ․ օգոստոսի 11-ին.
- ↑ Geoghegan, Tom (2006 թ․ հունվարի 6). «The million-dollar student» (անգլերեն). BBC News. Վերցված է 2009 թ․ փետրվարի 4-ին.
- ↑ Jew, Alex (2005 թ․ սեպտեմբերի 15). «The Million Dollar Homepage» (անգլերեն). The Million Dollar Homepage. Արխիվացված է օրիգինալից 2005 թ․ սեպտեմբերի 15-ին. Վերցված է 2009 թ․ հունվարի 30-ին.
- ↑ Kawamoto, Dawn (2006 թ․ հունվարի 18). «Blackmailers try to black out Million Dollar Homepage» (անգլերեն). CNET. Վերցված է 2009 թ․ փետրվարի 19-ին.
- ↑ Evans, Tara (2007 թ․ նոյեմբերի 21). «Million dollar homepage: Alex Tew» (անգլերեն). This is Money. Վերցված է 2009 թ․ փետրվարի 19-ին.
- ↑ 8,0 8,1 8,2 Winterman, Denise (2006 թ․ դեկտեմբերի 5). «What Alex did next». BBC News (անգլերեն). Վերցված է 2010 թ․ օգոստոսի 9-ին.
Արտաքին հղումներ[խմբագրել | խմբագրել կոդը]
- The Million Dollar Homepage(անգլ.)