«Lana Del Ray»[1] (ոճավորված է՝ որպեսLana Del Ray a.k.a. Lizzy Grant), ամերիկացի երգչուհի Լանա Դել Ռեյի դեբյուտային ստուդիական ալբոմը[2], որը թողարկվել է «5 Points Record» անկախ լեյբլում 2010 թվականին։ Ձայնասկավառակը ձայնագրվել է 2008 թվականին։ Այս լեյբլում Դել Ռեյի ձայնագրված վերջին սկավառակն է։
Ալբոմը թողարկվել է թվային ֆորմատով iTunes-ում, սակայն մի քանի ամիս անց հեռացվել է օնլայն խանութից, քանի որ լեյբլն ի վիճակի չէր ֆինանսավորել սկավառակը[2]։ Լանա Դել Ռեյը գնել է ալբոմի իրավունքը, որի անվանումը տարբերվում է երգչուհու ներկայիս կեղծանունից. «Del Rey»-ը ոճավորված է՝ որպես «Del Ray»։ 2012 թվականին «Born To Die»-ի թողարկումից հետո «Lana Del Rey» բեմական անվան տակ նա հայտարարել է, որ ի վերջո կցանկանար վերահրատարակել ալբոմը և այն թողարկել 2012 թվականի ամռանը, սակայն վերահրատարակման թողարկումն այդպես էլ չի կայացել[2]։
Ալբոմի առաջին սինգլը՝ «Kill Kill», ձայնագրվել և հրապարակվել է 2008 թվականի հոկտեմբերին, երբ Դել Ռեյը հայտնի էր Լիզի Գրանտ անունով։ Դևիդ Մաքմյուրեյը Դել Ռեյի հետ ձայնասկավառակը ձայնագրել է մոտ երեք ամիս[3]։ Ալբոմում ընդգրկված «Yayo» երգն իր գոյության ողջ ընթացքում ձայնագրվել և թողարկվել է մոտ երեք անգամ[4]։ Ավելի ուշ Դել Ռեյը վերաձայնագրել է երգը երրորդ անգամ՝ իր երկրորդ ալբոմը՝ «The Paradise Edition»-ը վերահրատարակելու համար։ Դել Ռեյը հայտարարել է, որ ընտրել է Մաքմյուրեյին ալբոմի ձայնագրման համար, քանի որ նա, բացի փոփ երաժշտությունից, հետաքրքրված է նաև այլ ժանրերով[5]։ Լանայի հայրը՝ Ռոբերտ Գրանթը, օգնել է դստերը մարքեթինգի հարցերում[6][7]։ Մաքմյուրեյի խոսքով՝ Գրանթը 2010 թվականին գնել է ալբոմի և իր պայմանագրի իրավունքները լեյբլից՝ ալբոմի առաջխաղացման և դրա վաճառքի առումով դժգոհության պատճառով[8][9]։ Իր տված հարցազրույցում պրոդյուսերն ասել է. «Նրա նոր մենեջերը կապ է հաստատել մեզ հետ, առաջարկել գինը, և նրանք գնել են ալբոմի պայմանագիրն ու հեղինակային իրավունքը»[10]։ 2012 թվականի հունվարին՝ «Born To Die» երկրորդ ստուդիական ալբոմի թողարկումից հետո, Դել Ռեյը BBC-ին հայտարարել է, որ վերջերս գնել է ալբոմի իրավունքները և պլանավորում է այն վերահրատարակել 2012 թվականի ամռանը[11]։ Նույն թվականի մայիսին նա հայտարարել է, որ վերահրատարակումը չի կայանա, բայց «Yayo» երգը, որը ներառվել է ալբոմի մեջ, կվերաձայնագրվի «Born To Die» ալբոմի վերահրատարակման համար, որը Դել Ռեյը թողարկել է 2012 թվականի նոյեմբերի 9-ին[12][13][14]։
Դել Ռեյը և պրոդյուսեր Դևիդ Մաքմյուրեյը 2008 թվականին գրանցել են 13 ձայնասկավառակ[15]։ Այս ալբոմի թողարկման փոխարեն 2008 թվականի հոկտեմբերի 21-ին Դել Ռեյի լեյբլը թողարկել է «Kill Kill» հավաքածուն[16]։ «Lana Del Ray» ալբոմը պաշտոնապես թողարկվել է 2010 թվականի հունվարի 4-ին, իսկ iTunes-ում թվային թողարկումը կայացել է հունվարի 24-ին, սակայն երեք ամիս անց հեռացվել է օնլայն ծառայությունից[17]։ Թողարկվել է նաև մի քանի պրոմո-CD[8]։
↑Brea Tremblay (2008). «Lizzy Grant Interview» (անգլերեն). Index Magazine. Արխիվացված է օրիգինալից 2012 թ․ հունիսի 8-ին. Վերցված է 2012 թ․ ապրիլի 18-ին.