Jump to content

Քայլ Մաքլաքլան

Վիքիպեդիայից՝ ազատ հանրագիտարանից
Քայլ Մաքլաքլան
Ծնվել էփետրվարի 22, 1959(1959-02-22)[1] (67 տարեկան)
ԾննդավայրՅակիմա, Վաշինգտոն, ԱՄՆ
ԿրթությունՎաշինգտոնի համալսարան և Eisenhower High School?
Քաղաքացիություն ԱՄՆ
Մասնագիտությունդերասան, կինոդերասան, հեռուստատեսային դերասան և թատրոնի դերասան
ԸնտրանիAgents of S.H.I.E.L.D.?, Հուսահատ տնտեսուհիները, The Flintstones?, Գլուխկոտրուկ, The Good Wife? և Օրենք ու կարգ: Հատուկ կորպուս
Ծնողներհայր՝ Kent Alan MacLachlan?[2], մայր՝ Catherine MacLachlan?[2]
Ամուսին(ներ)Desiree Gruber?
Համատեղ ապրող(ներ)Լորա Դերն, Լարա Ֆլին Բոյլ և Լինդա Եվանգելիստա
Երեխա(ներ)Callum Lyon MacLachlan?[2]
Պարգևներ և մրցանակներ

Քայլ Մերիթ Մաքլաքլան (փետրվարի 22, 1959(1959-02-22)[1], Յակիմա, Վաշինգտոն, ԱՄՆ), ամերիկացի դերասան, որը հանրությանը հայտնի է դարձել հատկապես Դեյվիդ Լինչի «Թվին Փիքս» հեռուստասերիալում ՀԴԲ-ի հատուկ գործակալ Դեյլ Քուփերի դերով։

Մաքլաքլանը 1991 թվականին արժանացել է «Ոսկե գլոբուս» մրցանակի՝ դրամա հեռուստասերիալում տղամարդու լավագույն դերի համար, և եղել է նույն մրցանակի անվանակարգում 2017 թվականին։ Ինչպես նաև առաջադրվել է «Էմմի» մրցանակի։

Վաղ տարիներ

[խմբագրել | խմբագրել կոդը]

Քայլ Մաքլաքլանը ծնվել է 1959 թվականի փետրվարի 22-ին Յակիմա քաղաքում (Վաշինգտոն նահանգ), որտեղ նա ստացել է նախնական կրթություն։ Քայլի մայրը աշխատում էր որպես PR մասնագետ, իսկ հայրը՝ փաստաբան և բորսային միջնորդ[3][4]։ Ընտանիքում կային ևս երկու որդի՝ Կրեյգը և Կենտը։ Սովորել է երգեհոն նվագել, սակայն 18 տարեկանում մոր խորհրդով ընտրել է դերասանի մասնագիտությունը։

1977 թվականին ընդունվել է Սիեթլի Վաշինգտոնի համալսարան։ Համալսարանն ավարտելուց հետո նա ստացել է գեղարվեստի բակալավրի աստիճան։ Մաքլաքլանի կրթության մեջ են մտել նաև դերասանական վարպետության կուրսերը։ Այդ ամենը նրան թույլ տվեց աշխատել և խաղալ ստվերների թատրոնում։

Կարիերա

[խմբագրել | խմբագրել կոդը]

1982 թվականին Քայլ Մաքլաքլանը մասնակցեց Աշլենդում անց կացվող Օրեգոնյան Շեքսպիրյան փառատոնին։ Մաքլաքլանին թվում էր, որ նրան ոչ ոք չի նկատել այդ փառատոնին։ 1982 թվականին նա վերադարձավ Սիեթլ, որպեսզի ընդունվի տեղի «Empty Space Theater» թատրոն։ Փառատոնին նրան նկատել էր կինոռեժիսոր Դեյվիդ Լինչը։ Այդ ծանոթությունը փոխեց Մաքլաքլանի ողջ կյանքը և կարիերան կինոյում։

Նրա բոլոր առաջին աշխատանքները կինոյում կապված են կինոռեժիսոր Դեյվիդ Լինչի անվան հետ։ «Դյուն» կինոնկարը դարձավ Քայլ Մաքլաքլանի առաջին աշխատանքը կինոյում։ Մաքլաքլանը ստացավ այդ ֆիլմի գլխավոր դերը, որը բեմադրվել էր Ֆրենկ Հերբերտի վեպի հիման վրա։ Նա խաղում էր երիտասարդ Փոլ Ատրեյդեսի կերպարը։ Չնայած ֆիլմը դեռևս ստանում է խառը արձագանքներ, Մաքլաքլանը քննադատների կողմից որևէ բողոք չի առաջացրել։

Քայլ Մաքլաքլանի կարիերան սկսվեց 24 տարեկանում։ Դեյվիդ Լինչը, ըստ Կայլ Մաքլաքլանի, շատ պահանջկոտ ռեժիսոր է․ Նա տեսնում է դերասանի կերպարը և հրավիրում է նրան նկարահանման։ Այսպես Քայլ Մաքլաքլանը սկսեց խաղալ «տարօրինակություններով մարդկանց» կերպարներ։ 1986 թվականին Քայլ Մաքլաքլանը մասնակցեց Դեյվիդ Լինչի նոր սյուրռեալիստական թրիլլերում՝ «Կապույտ Թավիշ» ֆիլմում։ Այդ դերից հետո Քայլ Մաքլաքլանը դարձավ առաջին կարգի աստղ։ Հաջողությունը կինոյում լայն հնարավորություններ բացեց երիտասարդ և տաղանդավոր դերասանի համար։

Քայլ Մաքլաքլանը «Էմմի» մրցանակաբաշխությանը (1991 թվական)

1987 թվականին Քայլ Մաքլաքլանը գլխավոր դեր խաղաց ռեժիսոր Ջեք Շոլդերի «Թաքնված թշնամին» ֆիլմում, որը Ռիդլի Սքոթի «Օտարը» ֆիլմի մի փոքր տարբերակ էր։ Ֆիլմի շարունակության մեջ՝ «Թաքնված թշնամին 2»-ում, Մաքլաքլանը համաձայնվեց հայտնվել միայն մի քանի րոպեով։

1989 թվականին դերասանը համաձայնվում է նկարահանվել «Թվին Փիքս» հեռուստասերիալում։ Այդ հեռուստասերիալը աշխարհին ներկայացրեց Քայլ Մաքլաքլանին, ոչ պարզապես որպես գեղեցիկ տղամարդ, որով հպարտանում է Հոլիվուդը, այլ որպես իրական դերասան։ «Թվին Փիքսը», որ մեծ հաջողությամբ ընդունվեց աշխարհի՝ ինչպես քննադատների, այնպես էլ հանդիսատեսի կողմից, և մրցանակների մեծ շարքի արժանացավ, այդ թվում նաև «Էմմի», Պիբոդի և «Ոսկե Գլոբուս» մրցանակներին։ Նա դարձավ հանրաճանաչ և շատ հայտնի։ Մինչև օրս օրագրերը, գրելով դերասան Քայլ Մաքլաքլանի մասին՝ պարզաբանում են, որ դա «Թվին Փիքս» հեռուստասերիալի հատուկ գործակալ Դեյլ Քուփերն է։ «Իդեալական տղամարդու» և պարտաճանաճ ՀԴԲի հատուկ գործակալի կերպարը ավելի դուր եկավ Քայլ Մաքլաքլանին։

Քայլ Մաքլաքլանն ասում է[5], որ միշտ ձգտում է ընդլայնել իր փորձը և փորձել ինչ-որ նոր բան: Քննադատ Ռոջեր Էբերտը Քայլ Մաքլաքլանի մասին գրել է. «Մաքլաքլանն այնքան գեղեցիկ և արտահայտիչ է, որ անհնար է պատկերացնել նրան ժամանակակից Չիկագոյի փողոցներում»:

1991 թվականին դերասանը նկարահանվեց երաժշտա-կենսագրական «Դորս» ֆիլմում։ Մաքլաքլանը խաղում էր Ռեյ Մանզարեկի դերը։ Այդ ֆիլմում նկատելի է դերասանի՝ իրեն նոր ամպլուայում փորձելու ցանկությունը։

1992 թվականին թողարկվեց «Թվին Փիքս․ Կրակի միջով» լիամետրաժ ֆիլմը, որտեղ Մաքլաքլանը Դեյլ Քուփերի դերում հայտնվում է միայն էպիզոդներում։ Քննադատները ոչ այդքան բարձր գնահատեցին Քայլի կատարումը ֆիլմում։

Ժամանակի ընթացքում Մաքլաքլանը ցանկացավ ազատվել իրեն՝ Դեյվիդ Լինչի կողմից տրված, «տարօրինակ մարդու» կարծրատիպից։ Կարծես հենց այդ պատճառով էլ Քայլ Մաքլաքլանը վիճեց Դեյվիդ Լինչի հետ, բայց ոչ երկար ժամանակով։ Ներկայումս նա ռեժիսորի մասին խոսում է, որպես «լավ և զվարթ տղամարդու»։

1992 թվականին միակ անգամ նա փորձեց իրեն որպես ռեժիսոր։ Նրա կողմից նկարահանվեց «Պատմություններ դամբարանից» սերիալի մի էպիզոդը։

1993 թվականին Մաքլաքլանը կրկին նկարահանվեց «տարօրինակ մարդու» դերում։ Ինչպես հայտարարել է Մաքլաքլանը, «Դատավարություն» ֆիլմն իր ամենանշանակալի աշխատանքներից է։ Ֆիլմը նկարահանվել է Ֆրանց Կաֆկայի վեպի հիման վրա, սցենարը օգնել է գրել Մաքլաքլանի «ուսուցիչը»՝ Դեյվիդ Լինչը։ Ինչպես ավելի ուշ նշել է Մաքլաքլանը․ «Ոչ ոք գոյության աբսուրդը չի արտացոլում այնպես, ինչպես Լինչը։ Նա վարպետ է դրանում»։ Քայլ Մաքլաքլանը ոչ միայն խաղացել է գլխավոր հերոսներից մեկի՝ Ջոզեֆ Կ.-ի դերը, այլև եղել է վեպի կինոադապտացիայի պրոդյուսերներից մեկը՝ հայթայթելով միջոցներ և ընտրելով դերասաններին և այլ անձնակազմին։ Սակայն, երբ ֆիլմը թողարկվեց, նա պնդեց, որ իր անունը չհայտնվի որպես պրոդյուսեր։ Մաքլաքլանի համար ավելի կարևոր էր, որ քննադատներն ու հանդիսատեսը ողջունեն նրա դերը։ Քննադատները չգնահատեցին «Դատավարությունը», չնայած որ որևէ բացահայտ մերժում չեղավ։ Այս ֆիլմից հետո Քայլ Մաքլաքլանը մի քանի տարով դադարեցրեց նկարահանվել խոշոր ֆիլմերում։ Հնարավոր է, դա կապ ուներ նաև իր անձնական կյանքի հետ։

1994 թվականին Քայլ Մաքլաքլանը նկարահանվեց «Ֆլինտսթոունները» ընտանեկան ֆիլմում՝ մարմնավորելով «կատակերգական չարագործ» Քլիֆ Վանդերքեյվին։ Նա դեռևս չի հասկանում, թե ինչու է ընտրել այդ դերը. «Ես պարզապես գնացի, և վերջ»։ 1995 թվականին նա մարմնավորեց շոուի մենեջերի Լաս Վեգասի շքեղ հյուրանոցում Փոլ Վերհովենի «Շոու աղջիկներ» սկանդալային ֆիլմում, որի համար նա արժանացավ «Ոսկե ազնվամորի» մրցանակի՝ «Վատագույն դերասան» անվանակարգում[6]։

1996 թվականին նա վերադարձավ մեծ էկրան՝ կրկին ընտրելով ֆենտեզի թեմատիկայով ֆիլմ՝ «Տրիգերի Էֆեկտ»-ը։ Քայլ Մաքլաքլանը խաղում է սովորական տղայի դեր, որը պետք է փրկի իր ընտանիքը ճգնաժամի մեջ։

1997-2000 թվականներին Քայլ Մաքլաքլանը նկարահանվել է մի քանի հեռուստասերիալներում և կարճամետրաժ ֆիլմերում։ Նա զգալի ժամանակ է անցկացրել «Սեքսը մեծ քաղաքում» հիթային սերիալի նկարահանումներին՝ մարմնավորելով Շառլոտի «իդեալական ամուսնուն»։

2000 թվականին նա նկարահանվեց «Ժամանակի կոդ» ֆիլմում, որը կինոյի պատմության մեջ առաջին լիամետրաժ ֆիլմն էր, որը նկարահանվել էր չորս տեսախցիկով՝ իրական ժամանակում, առանց որևէ մոնտաժի։ Էկրանը բաժանված է չորս մասի, որոնցից յուրաքանչյուրը պատկերում է տարբեր գործողություն, չնայած սյուժեն բոլորի համար նույնն է՝ Լոս Անջելես։ Նույն թվականին թողարկվեցին դերասանի մասնակցությամբ մի քանի այլ փոքր ֆիլմեր։

2002 թվականին Մաքլաքլանը վերադարձավ էկրան՝ որպես «Գտնելով Ալիսին» (սկզբնական անվանումը՝ Միրանդա) ֆիլմի գլխավոր դերակատարներից մեկը։ Ֆիլմը պատմում է անսովոր երիտասարդ կնոջ՝ Միրանդայի մասին, որի դերը մարմնավորում է Քրիստինա Ռիչին։ Քննադատները ֆիլմը բարձր գնահատեցին որպես Դեյվիդ Լինչի լավագույն ավանդույթներին համապատասխանող։ Այստեղ Քայլ Մաքլաքլանը կրկին ցուցադրում է իր տաղանդը՝ որպես «տարօրինակի»։

2004 թվականին թողարկվեց «Վարդագույն հպում» ֆիլմը, որտեղ գլխավոր դերում Քայլ Մաքլաքլանը խաղաց Քերի Գրանտի ուրվականի դերը: Ֆիլմը ուսումնասիրում է զգացմունքների բազմազան ընկալումները՝ ուսումնասիրելով անգլիացի համասեռամոլներին, նրանց կյանքն ու սովորույթները: Ինչպես նախորդ տարիներին, Քայլ Մաքլաքլանի դերը սահմանափակ է, բայց նրա դերասանական խաղի բարձր որակը միշտ ակնհայտ է: Մաքլաքլանն ինքը ֆիլմը համարում է անկախ և գրավիչ[7]:

2006 թվականին Քայլ Մաքլաքլանը նկարահանվել է տարբեր հեռուստասերիալների մի քանի դրվագներում և նաև հնչյունավորել է «Ազատ Ջիմմի» մուլտֆիլմը, որտեղ նա հնչյունավորել է Մարիուս անունով կերպարին։

2006-2012 թվականներին Մաքլաքլանը նկարահանվել է «Հուսահատ տնային տնտեսուհիներ» սերիալում[8]։ 2008 թվականին նա հնչյունավորել է Սուպերմենին «Արդարության լիգա. Նոր սահման» մուլտֆիլմում։

2014 թվականին նա նկարահանվեց «S.H.I.E.L.D.-ի գործակալները» սերիալում՝ մարմնավորելով բժիշկ Քալվին Զաբոյին, որը հայտնի է նաև որպես պարոն Հայդ: Նույն թվականին նա խաղաց գլխավոր չարագործի դերը «Հավատա» սերիալում:

2017 թվականի մայիսին պրեմիերան կայացավ «Թվին Փիքս» սերիալի երրորդ եթերաշրջանը, որում ՄաքԼաքլանը վերադարձավ Դեյլ Քուփերի դերին և խաղաց ևս երկու կերպար:

2024 թվականի ապրիլին պրեմիերան կայացավ «Ֆոլաութ» սերիալի առաջին եթերաշրջանը, որում ՄաքԼաքլանը խաղում է Լյուսիի հոր և Vault 33-ի վերակացուի դերը:

Անձնական կյանք

[խմբագրել | խմբագրել կոդը]
Մաքլաքլանը և Լարա Ֆլին Բոյլը «Էմմի» մրցանակաբաշխության ժամանակ, 1990 թվական

1985-1989 թվականներին Մաքլաքլանը հանդիպում էր «Կապույտ Թավիշ» ֆիլմում իր գործընկերուհու՝ դերասանուհի Լորա Դերնի հետ[9][10]։ Ապա նա մոտ երկուսուկես տարի հանդիպում էր «Թվին Փիքս» սերիալից իր գործընկերուհու՝ դերասանուհի Լարա Ֆլինի հետ։ 1992 թվականին Մաքլաքլանը սկսեց հանդիպել մոդել Լինդա Եվանգելիստայի հետ։ Ըստ Մաքլաքլանի, նրանք մինչև բաժանումը մի քանի տարի նշանված են եղել, մինչ 1998 թվականի նրանց բաժանումը[11][12][13]։

1999 թվականին Մաքլաքլանը սկսեց հանդիպել հրապարակախոս Դեզրի Գրուբերի հետ[14], ում հետ ամուսնացել են 2002 թվականին[15]։ Նրանց որդին՝ Կալում Լայոն Մաքլաքլանը ծնվել է 2008 թվականին[16]։

Ֆիլմագրություն

[խմբագրել | խմբագրել կոդը]
Տարի Հայերեն անվանում Բնօրինակ անվանում Դեր
1984 Դյուն Dune Պոլ Ատրեյդես
1986 Կապույտ թավիշ Blue Velvet Ջեֆրի Բոմոն
1987 Թաքնված թշնամի The Hidden Լլոյդ Գալագեր
1989 Dream Breakers Բոբի Օքոնոր
1990 Մի՛ ասա նրան, որ դա ես եմ Don’t Tell Her It’s Me Թրաուտ
1990 American Experience Պատմող
1990-1991 Թվին Փիքս Twin Peaks ՀԴԲ հատուկ գործակալ Դեյլ Քուփեր
1991 Հեքիաթներ Կրիպտից Tales from the Crypt Էրլ Դեյմոնդ Ռիգս
1991 Գնալով հոսքի ուղղությամբ Where the Day Takes You Թեդ
1991 Դորս The Doors Ռեյ Մանզարեկ
1992 Հարստությունը սիրո մեջ Rich in Love Բիլլի ՄաքՔուին
1992 Թվին Փիքս․ Կրակի միջով Twin Peaks: Fire Walk With Me ՀԴԲ հատուկ գործակալ Դեյլ Քուփեր
1993 Դատավարություն The Trial Յոզեֆ Կ․
1994 Ֆլինտսթոունները The Flintstones Կլիֆ Վանդերկեյֆ
1994 Ռոզուել Roswell մայոր Ջեֆ Մարսել
1994 Պատի դեմ Against The Wall Մայքլ Սմիթ
1994 Սարսափի պահոց I Vault of Horror I
1995 Շոու-աղջիկներ Showgirls Զակ Քերի
1996 Տրիգերի էֆեկտը The Trigger Effect Մեթյու
1996 Կատաղած շների ժամանակը Mad Dog Time Ջեյք Պարկեր
1996 «Լուսնի լույս» մայրուղի Moonshine Highway Ջեդ Մալդուն
1997 Հանդիպում՝ մեկ գիշերով One Night Stand Վերնոն
1997 Բռնել արքային Windsor Protocol Շոն Դիլոն
1998 Մինչ ամպրոպը կհայտնվի Thunder Point Շոն Դիլոն
1998 Մայրուղի № 9 Route 9 Բուտ Պարկեր
1998 Անտեսանելի մարդը The Invisible Man Ջեք Գրիֆին
2000-2002 Սեքսը մեծ քաղաքում Sex and the City Թրեյ Մաքդուգալ
2000 Գարուն The Spring Դենիս Կոնվեյ
2000 Համլետ Hamlet Կլավդիուս
2000 Փոխանակում մարմիններով XChange Ֆիսկ / Թոֆլեր 2
2000 Թայմկոդ Timecode Բանի Դրիսդեյլ
2001 Քեզ հետ և առանց քեզ Me Without You Դենիել
2001 Օծանելիք Perfume ղեկավար
2001 Grand Theft Auto III Grand Theft Auto III Դոնալդ Լավ
2002 Ջո Jo
2002 Միրանդա Miranda Նեյլոր
2003 Նորթֆորկ Northfork միսթեր Հոուլ
2004 Վարդագույն հպում Touch of Pink Քերի Գրանտի հոգի
2004 Օրենք և կարգուկանոն. Հատուկ զոհերի ստորաբաժանում Law & Order: Special Victims Unit բժիշկ Բրետ Մորթոն
2004 Գրադարանավարը։ Ճակատագրի նիզակի որոնումներում The Librarian: Quest for the Spear Էվդարդ Ուայլդ
2005 Գաղտնի կղզի Mysterious Island Սայրուս
2006 Արդարությամբ In Justice Դեյվիդ Սվեյն
2006-2012 Հուսահատ տնային տնտեսուհիներ Desperate Housewives Օրսոն Հոդջ
2006 Ազատե՛ք Ջիմիին Slipp Jimmy fri Մարիուս
2008 Արդարության լիգա․ Նոր պատնեշ Justice League: The New Frontier Քլարկ Կենտ / Սուպերմեն
2008 Ճանապարհորդող տաբատների քույրությունը 2 The Sisterhood of the Traveling Pants 2 Բիլ Քեր
2009 Մաոյի վերջին պարողը Mao’s Last Dancer Չարլզ Ֆոսթեր
2009 Հաջողության բույրը The Smell of Success Ջիմի Սենթ Ջեյմս
2010-2014 Ինչպես ես հանդիպեցի ձեր մայրիկին How I met your mother Կապիտան
2011-2017 Պորտլանդիա Portlandia քաղաքապետ
2011 Օրենք և կարգուկանոն. Հատուկ զոհերի ստորաբաժանում Law & Order: Special Victims Unit Էնդրյու Ռեյնս
2011 Բժիշկ The Doctor Ջեյսոն
2011 Աշխարհ, սեր և թյուրիմացություն Peace, Love & Misunderstanding Մարկ Հադսոն
2012 Muppets vs. Goldman Sachs
2012 Պատրաստված է Ջերսիում Made in Jersey Դոնովան Սթարկ
2013-2014 Լավ կին The Good Wife Ջոշ Փերոթի
2013 Շնչիր խորը Breathe In Փիթեր Սեբեկ
2014 Թվին Փիքս․ Ջնջված տեսարաններ Twin Peaks: The Missing Pieces ՀԴԲ հատուկ գործակալ Դեյլ Քուփեր
2014-2015 S.H.I.E.L.D.-ի գործակալները Agents of S.H.I.E.L.D. Քելվին Զաբո / միտեր Հայդ
2014 Հավատա Believe բժիշկ Ռոման Սկուրաս
2015 Գլուխկոտրուկ Inside Out Բիլ Անդերսոն
2015 Ռայլիի առաջին հանդիպումը Riley’s First Date? Բիլ Անդերսոն
2016 Գրավիտի Ֆոլս Gravity Falls ավտոբուսի վարորդ
2017 Թվին Փիքս Twin Peaks: The Return Դեյլ Քուփեր
2018 Ամերիկական Հայրիկ American Dad! Դել
2018 Պատերին ժամացույցով տան առեղծվածը The House with a Clock in its Walls Այզեկ Իզարդ
2019 Բարձր թռչող թռչունը High Flying Bird Դեյվիդ Սեթոն
2019 Անվճռական The Staggering Girl Մատթեո / Բրունո / Անջելո
2019 Քերոլի երկրորդ հնարավորությունը Carol’s Second Act բժիշկ Սթիվեն Ֆրոսթ
2020 Կապոնե Capone Կառլոկ
2020 Տեսլա Tesla Թոմաս Էդիսոն
2022 Խոստովանի՛ր, Ֆլեչ Confess, Fletch Ռոնալդ Հորան
2023 Միրանդայի զոհը Miranda’s Victim Գլխավոր դատավոր Էրլ Ուորեն
2024 Գլուխկոտրուկ 2 Inside Out 2 Բիլ Անդերսոն
2024 Թարթիր երկու անգամ Blink Twice Ռիչ
2024 Ֆոլաութ Fallout Հենկ
2025 Արձագանքների հովիտը Echo Valley Ռիչարդ Հարեթ
2025 The Lowdown The Lowdown Դոնալդ Ուոշբերգ

Ծանոթագրություններ

[խմբագրել | խմբագրել կոդը]
  1. 1 2 http://www.gala.fr/stars_et_gotha/kyle_maclachlan
  2. 1 2 3 Geni(բազմ․) — 2006.
  3. ↑ «Kyle MacLachlan Biography (1959?-)». Արխիվացված օրիգինալից 2014-07-25-ին. Վերցված է 2012-09-13-ին.
  4. ↑ «This much I know: Kyle MacLachlan, actor, 49, London Արխիվացված 2008-09-17 Wayback Machine». The Observer. April 6, 2008.
  5. ↑ «Интервью каналу CNN 20 января 2006». Արխիվացված օրիգինալից 2007-10-12-ին. Վերցված է 2007-04-22-ին.
  6. ↑ Metacritic, http://www.metacritic.com/video/titles/showgirls Արխիվացված 2010-03-10 Wayback Machine accessed May 22, 2008
  7. ↑ «Интервью с Кайлом о фильме «Почти натурал» для сайта Groucho». Արխիվացված օրիգինալից 2007-10-08-ին. Վերցված է 2007-04-22-ին.
  8. ↑ «Биографические сведения официального сайта Кайла Маклахлена». Արխիվացված օրիգինալից 2007-08-23-ին. Վերցված է 2007-04-22-ին.
  9. ↑ Schneller, Johanna (1992-08-01). «The Secret World of Kyle MacLachlan». GQ (անգլերեն).
  10. ↑ Ivie, Devon (2017-09-16). «Even Kyle MacLachlan Isn't Immune to Weird Onscreen Sex With an Ex-Girlfriend». Vulture (անգլերեն). Արխիվացված է օրիգինալից 2019-05-09-ին. Վերցված է 2019-05-09-ին.
  11. ↑ «Fashion Exchange». People (անգլերեն). 1998-08-17. Արխիվացված է օրիգինալից 2019-05-09-ին. Վերցված է 2019-05-09-ին.
  12. ↑ Tozer, Paul (2000-12-10). «Kyle MacLachlan: I, Claudius». The Guardian (անգլերեն). Արխիվացված է օրիգինալից 2019-05-09-ին. Վերցված է 2019-05-09-ին.
  13. ↑ Rumbold, Judy (2001-06-04). «The art of darkness». The Telegraph (անգլերեն). Արխիվացված է օրիգինալից 2019-05-09-ին. Վերցված է 2019-05-09-ին.
  14. ↑ Cavendish, Lucy (2003-06-16). «Kyle reaches new peaks». Evening Standard. Արխիվացված է օրիգինալից 2019-05-09-ին. Վերցված է 2019-05-09-ին.
  15. ↑ «Swoon Over Miami». People (անգլերեն). 2002-05-06. Արխիվացված է օրիգինալից 2019-05-09-ին. Վերցված է 2019-05-09-ին.
  16. ↑ «Kyle MacLachlan and Desiree Gruber Welcome Callum Lyon». People (անգլերեն). 2008-07-28. Արխիվացված է օրիգինալից 2019-05-09-ին. Վերցված է 2019-05-09-ին.
Վիքիպահեստն ունի նյութեր, որոնք վերաբերում են «Քայլ Մաքլաքլան» հոդվածին։
Ստացված է «https://hy.wikipedia.org/w/index.php?title=Քայլ_Մաքլաքլան&oldid=10760211» էջից