Տեղ (գյուղ)

Տեղ
Գյուղ
	Տեղ
	Կոորդինատներ: 39°33′17″ հս․ լ. 46°28′33″ ավ. ե. / 39.55472° հս․. լ. 46.47583° ավ. ե.
Երկիր	Հայաստան
Մարզ	Սյունիքի
Գյուղապետ	Ներսես Շադունց
Մակերես	38.79 կմ²
ԲԾՄ	1360 մ
Պաշտոնական լեզու	Հայերեն
Բնակչություն	2520 մարդ (2010)
Խտություն	65 մարդ/կմ²
Ազգային կազմ	Հայեր
Կրոնական կազմ	Հայ Առաքելական եկեղեցի
Տեղաբնականուն	տղցի
Ժամային գոտի	UTC+4
	Տեղ Վիքիպահեստում

Տեղ, գյուղ Հայաստանի Սյունիքի մարզում, մարզկենտրոնից 85 կմ հյուսիս-արևելք։

Պատմություն[խմբագրել | խմբագրել կոդը]

Ըստ պատմական վկայության, Տեղ գյուղը հիմնել է Սյունիքի թագուհի Շահանդուխտը՝ 10-րդ դարում^[1]։ Մինչ այդ, Տեղի տարածքում եղել է քարանձավային բնակատեղի, որի մոտակայքում 4-5-րդ. դդ կառուցվել է սբ. Գևորգ եկեղեցին։ Ուշ միջնադարում Տեղը եղել է մելիքանիստ գյուղ։

Բնակչություն[խմբագրել | խմբագրել կոդը]

Տեղի ազգաբնակչության փոփոխությունը^[2]՝

Տարի	1831	1873	1897	1922	1926	1931	1939	1959	1970	1979	1989	2001	2004
Բնակիչ	798	2285	2703	2669	2167	2775	2570	2213	2197	2109	1755	2333	2520

Տնտեսություն[խմբագրել | խմբագրել կոդը]

Բնակչությունը հիմնականում զբաղվում է անասնապահությամբ, դաշտավարությամբ, պտղաբուծությամբ, կարտոֆիլի և կերային կուլտուրաների մշակությամբ։ Խորհրդային շրջանում լայն տարածում են ունեցել նաև ծխախոտագործությունը և ճակնդեղի մշակումը^[1]։

Պատմամշակութային կառույցներ[խմբագրել | խմբագրել կոդը]

Տեղում կանգուն Ս. Գևորգ եկեղեցին ունի թաղածածկ դահլիճի հորինվածք և կառուցված է սրբատաշ խոշոր քարերից։ Շենքի տարածքը բաղկացած է 2 մասից։ Հնագույնը՝ արևելյանը, կառուցված է վաղ միջնադարում (4-5-րդ դարերում), իսկ արևմտյան հատվածը կցվել է 1737 թ.-ին։ Տեղից մոտ 3կմ հարավ-արևելք գտնվում է «Սըռնեզցի» կոչվող եկեղեցին։ Այն կառուցված է սրբատաշ բազալտից և լավ է պահպանվել։ Գյուղի մեջ գտնվում են ուշ միջնադարի հայկական բնակելի ճարտարապետության արժեքավոր հուշարձաններ. Մելիք-Բարխուդարյանների «Ամարաթը» (1783 թ.), «քարե օթախը» (թաղածածկ սենյակներից բաղկացած բնակելի համալիր), մի շարք գլխատներ^[1]։