Վինի ճառագայթման օրենք

Վիենի և Պլանկի ճառագայթման օրենքների համեմատություն

Վինի ճառագայթման օրենք, բացարձակ սև մարմնի ճառագայթման (հավասարակշիռ ճառագայթում) էներգիայի սպեկտրային բաշխման ջերմաստիճանային կախումն արտահայտող օրենք։ Տեսականորեն արտածել է Վիլհելմ Վինը, 1893 թվականին։ Դիտարկելով իդեալական հայելային պատեր ունեցող անոթում հավասարակշիռ ճառագայթման սեղմման պրոցեսը և հաշվի առնելով շարժվող հայելուց անդրադառնալու հետևանքով ճառագայթման հաճախականության փոփոխությունը (Դոպլերի էֆեկտ), Վինը սև մարմնի ճառագայթման էներգիայի խտության համար ստացել է հետևյալ առնչությունները․ $u_{v,T}=v^{3}f({\frac {v}{T}})$ կամ $u_{\lambda ,T}=\lambda ^{-3}\varphi (\lambda T)$, որտեղ $f$-ը և $\varphi$-ն համապատասխանաբար ${\frac {v}{T}}$-ի և $\lambda T$-ի ֆունկցիաներ են, $v$-ն ճառագայթման հաճախականությունն է, $\lambda$-ն՝ ալիքի երկարությունը, $T$-ն՝ բացարձակ ջերմաստիճանը։

Վինի տեսական կանխագուշակումը հետագայում հաստատվել է փորձերով։ Վինի ճառագայթման օրենքը Պլանկի ճառագայթման օրենքի սահմանային դեպքն է և ճիշտ է միայն մեծ հաճախականությունների տիրույթում։ Վինի ճառագայթման օրենքից կարելի է ստանալ Վինի շեղման օրենքը։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 11, էջ 454)։