Վահե Սեթյան

Վահե Սեթյան
Ծնվել է	1905
Ծննդավայր	Հալեպ
Մահացել է	հոկտեմբերի 4, 1995(1995-10-04)
Մահվան վայր	Մոնրեալ
Քաղաքացիություն	Լիբանան և  Կանադա
Մասնագիտություն	մշակութային գործիչ, հրատարակիչ և մեկենաս
Պարգևներ և մրցանակներ

Վահե Սեթյան (արմտ. հայ.՝ Վահէ Սէթեան, 1905, Հալեպ - հոկտեմբերի 4, 1995(1995-10-04), Մոնրեալ), լիբանանահայ մշակութային գործիչ, Համազգային մշակութային միության «Վահե Սեթյան» տպարան-հրատարակչության հիմնադիր, արվեստի և մշակույթի գործիչ, գրի, գրչության և գեղանկարչության պաշտպան։

Կենսագրություն

Վահե Սեթյանը ծնվել է 1905 թվականին, Հալեպում, որտեղ էլ ստացել է կրթությունը։ Եղել է գործի մարդ, զբաղվել է առևտրով և առևտրական հաստատություններ հիմնելով։ Հետաքրքրվել է նաև արդյունաբերական աշխատանքով և այդ ասպարեզում հասել է որոշ հաջողությունների։

Երկար տարիներ ընտանիքի հետ ապրել է Լիբանանում, որտեղ վարել է մշակութային գործունեություն, հատկապես՝ Համազգայինում, որի երկարամյա պատվո անդամ է եղել մինչև մահը։ Թե՛ մշակութային, թե՛ արդյունաբերական գործունեության համար 1970-ական թվականներին Լիբանանի պետության կողմից պարգևատրվել է Մայրու ազգային շքանշանով։

Կյանքի վերջին տարիներին Վահե Սեթյանը հաստատվել է Մոնրաալում (Կանադա), բայց հաճախակի այցելել է Լիբանան, որին մեծ սիրով կապված էր։

Վահե Սեթյանը, լինելով արվեստագետների և գրողների հովանավոր, կատարել է հայ գրողների գործերի մեկենասություն։ Նա նաև ուներ հայ և օտար արվեստագետների գեղանկարչական կտավների, արվեստի թանկարժեք իրերի և ստեղծագործությունների պատկառելի հավաքածու։

Վահե Սեթյանը վախճանվել է 1995 թվականի հոկտեմբերի 4-ին, Մոնրեալում։ Ազգային հոգեհանգիստը կատարվել է հոկտեմբերի 11-ին, Անթիլիասի Սուրբ Գրիգոր Լուսավորիչ մայր տաճարում՝ Արամ Ա կաթողիկոսի ներկայությամբ։ Մարմինը հանգչում է Բուրջ Համուդի ազգային գերեզմանատանը։

Աղբյուրներ

• Ազդակ օրաթերթ, 1996 - բացառիկ, Պէյրութ։
• Մահ Վահէ Սեթեանի։ Լիբանանահայ մանկավարժ, հաս. գործիչ։ 1905-1995։ Մահախոս. // Յառաջ. – 1995. – 10 հոկտ.