Վալերի Հարությունով

Վալերի Հարությունով
Ծնվել է	հոկտեմբերի 8, 1941(1941-10-08) Բաքու, Ադրբեջանական ԽՍՀ, ԽՍՀՄ
Երկիր	ԽՍՀՄ և  Հայաստան
Մահացել է	ապրիլի 22, 2017(2017-04-22) (75 տարեկան) Երևան, Հայաստան
Ժանրեր	օպերա
Մասնագիտություն	օպերային երգիչ և երաժշտության ուսուցիչ
Երգչաձայն	բաս
Աշխատավայր	Ղազարոս Սարյանի անվան արվեստի դպրոց և Երևանի Կոմիտասի անվան պետական կոնսերվատորիա
Կրթություն	Բաքվի երաժշտական քոլեջ (1969) և Երևանի Կոմիտասի անվան պետական կոնսերվատորիա (1974)
Պարգևներ	Հայաստանի մշակույթի նախարարության ոսկե մեդալ և Սուրբ Սահակ-Սուրբ Մեսրոպ շքանշան

Վալերի Ապրեսի Հարությունով (հոկտեմբերի 8, 1941(1941-10-08), Բաքու, Ադրբեջանական ԽՍՀ, ԽՍՀՄ - ապրիլի 22, 2017(2017-04-22), Երևան, Հայաստան), հայ օպերային երգիչ (բաս), մանկավարժ։ Հայկական ԽՍՀ վաստակավոր արտիստ (1982)։

Կենսագրություն

Վալերի Հարությունովը ծնվել է 1941 թվականի հոկտեմբերի 8-ին Բաքվում։ 1969 թվականին ավարտել է Բաքվի երաժշտական ուսումարանը, 1974 թվականին՝ Երևանի պետական կոնսերվատորիան (Թ. Շահնազարյանի դասարան)։

1969 թվականին եղել է Բաքվի օպերային թատրոնի մեներգիչ, 1969-2009 թվականներին՝ Մայր Աթոռ Սբ. Էջմիածնի երգչախմբի մենակատար։ 1974-2017 թվականներին դասավանդել է Երևանի Մանկական ձայնի պահպանման դպրոցում, 1992 թվականից՝ Ղ. Սարյանի անվան արվեստի դպրոցում (2017 թվականին վոկալ բաժինը կոչվել է Վալերի Հարությունովի անունով), 1974 թվականից՝ Երևանի պետական կոնսերվատորիայում (1992 թվականից՝ պրոֆեսոր)։ Հարությունովի մի շարք սաներ (Ա. Քոչարյան, Ս. Աղամալան, Գ. Հարությունյան, Ա. Միքայելան, Գ. Բավեյան, Ա. Կուզիկյան, Գ. Սալնազարյան և ուրիշիներ) դարձել են միջազգային և հանրապետական մրցույթների դափնեկիրներ։

1972-1999 թվականներին եղել է Երևանի օպերայի և բալետի թատրոն մեներգիչ. դերերգերից են՝ Բարտոլո (Ջ. Ռոսսինիի «Սևիլյան սափրիչ»), Կալիստեն, Ռայմոնդ (Գ. Դոնիցետտիի «Պողիկտոս», «Լյուչիա դի Լամերմուր»), Օրոֆեզ (Վ. Բելլինիի «Նորմա»), Եգիպտոսի թագավոր, Ինկվիզիտոր, Ֆեռանդո, Զաքարիա (Ջ. Վերդիի «Աիդա», «Դոն Կառլոս», «Տրուբադուր», «Նաբուկկո»), Մեֆիստոֆել (Շ. Գունոյի «Ֆաուստ»), Ռենե թագավոր (Պ. Ի. Չայկովսկու «Իոլանտա»), Ներսես (Տ. Չուխաճյանի «Արշակ Երկրորդ»), Նադիր շահ (Ա. Սպենդիարյանի «Ալմաստ»), Կոմս Բեկենդորֆ (Է. Հովհաննիսյանի «Ճանապարհորդություն դեպի Արզրում», ըստ Ա. Ս. Պուշկինի) և այլն։

Մեներգել է Վ. Ա. Մոցարտի, Ջ. Վերդիի, Գ. Ֆորեի ռեքվիեմերում, Ջ. Ռոսսինիի «Ստաբատ Մատեր»-ում, Հ. Բեռլիոզի «Ռոմեո և Ջուլիետ» դրամատիկ սիմֆոնիայում։

Ունի ֆոնդային ձայնագրություններ ՀՀ ռադիոյում։

Համերգներով շրջագայել է Գերմանիայում, Ֆրանսիայում, Անգլիայում, Իսպանիայում, Ռուսաստանում, Մոլդովայում, ԱՄՆ-ում և այլուր։

Վալերի Հարությունովը մահացել է 2017 թվականի ապրիլի 22-ին Երևանում։

Մրցանակներ և պարգևներ

• 1972 – Երիտասարդ կատարողների այսրկովկասյան մրցույթի 1-ին մրցանակ (Բաքու),
• 2011 – ՀՀ մշակույթի նախարարության ոսկե մեդալ,
• 2011 – Հայաստանյայց առաքելական եկեղեցու «Սբ Սահակ-Սբ Սեսրոպ» շքանշան։

Այս հոդվածի կամ նրա բաժնի որոշակի հատված վերցված է «Հայ երաժշտության հանրագիտարանից», որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։