Սևակ Խանաղյան

Վիքիպեդիայից՝ ազատ հանրագիտարանից
Սևակ Խանաղյան
Ծնվել էհուլիսի 28, 1987(1987-07-28)[1] (36 տարեկան)
Մեծավան, Կալինինոյի շրջան, Հայկական ԽՍՀ, ԽՍՀՄ
Երկիր Ռուսաստան և  Հայաստան
Ժանրերփոփ և ջազ
Մասնագիտություներգիչ, երգերի հեղինակ և երաժիշտ
Երգչաձայնտենոր
Գործիքներստեղնաշարային գործիքներ և վոկալ
ԼեյբլPervoye muzykalnoye? և Believe?
Պարգևներ
 Sevak Khanagyan Վիքիպահեստում

Սևակ Խանաղյան (հուլիսի 28, 1987(1987-07-28)[1], Մեծավան, Կալինինոյի շրջան, Հայկական ԽՍՀ, ԽՍՀՄ), հայ երգիչ, երգահան, ռուսական «Գլխավոր բեմ» և «Ձայն» հեռուստանախագծերի մասնակից, ինչպես նաև ուկրաինական «X ֆակտոր» նախագծի 7-րդ եթերաշրջանի հաղթող, «Հայաստանի ձայնը» նախագծի 4-րդ եթերաշրջանի ժյուրիի անդամ[2], «Դեպի Եվրատեսիլ» նախագծի 2-րդ եթերաշրջանի մասնակից[3]։ Ներկայացրել է Հայաստանը Եվրատեսիլ 2018 երգի մրցույթում[4]՝ դուրս մնալով եզրափակիչ փուլի ուղեգրի համար անցկացվող փուլից։

Կենսագրություն[խմբագրել | խմբագրել կոդը]

Սևակ Խանաղյանը կամ ինչպես նրան կոչում են մտերիմներն ու ընկերները՝ Սևան, ծնվել է 1987 թվականի հուլիսի 28-ին ՀԽՍՀ Կալինինոյի շրջանի Մեծավան գյուղում։ Դեռևս մանկուց նա մեծ սեր էր տածում երաժշտության հանդեպ, հատկապես երբ հայրն ընտանեկան խնջույքների ժամանակ կատարում էր հայկական ժողովրդական երգեր։ Երբ նա առաջին անգամ լսում է հայկական «Սև-սև աչքեր» երգը, խնդրում է հորն իրեն սովորեցնել նվագել ինչ-որ երաժշտական գործիք։ Այդպես 7 տարեկանում Սևակն արդեն սինթեզատոր էր նվագում, իսկ հետագայում ընդունվում է երաժշտական դպրոց, որտեղ բավականին ժամանակ ակորդեոնի դասերի է հաճախում[5]։

7-րդ դասարանում Սևակն իր ընտանիքի հետ մեկնում է Ռուսաստան։ Կուրսկում նա ընդունվում է երաժշտական քոլեջ, որն ավարտելուց հետո մեկնում է Մոսկվա և ընդունվում Մոսկվայի Մայմոնիդի անվան պետական ակադեմիա։ Սևակը ավելի խորն է ուսումնասիրում էստրադա և ջազ ոճերը և արդեն 2014 թվականին ստանում է համաշխարհային մշակութային երաժշտության ֆակուլտետի դիպլոմ[6]։

Հանդիսանում է Ռուսաստանի Դաշնության քաղաքացի։

Ընտանիք[խմբագրել | խմբագրել կոդը]

Սևակ Խանաղյանն իր կնոջը՝ Մարիա Իվանովային[7] հանդիպել է Ռուսաստանի Դաշնության Կուրսկ քաղաքում, որտեղ նրանք միասին սովորում էին երաժշտական ուսումնարանում։ Չնայած Սևակի մանկությունն անցել է Հայաստանում, սակայն երկար ժամանակ նա ապրել է Ռուսաստանում, այդ պատճառով էլ նա իր հարազատ քաղաքը համարում է Կուրսկը։ Սևակն ունի մեկ որդի՝ Բագրատը։

Ստեղծագործական գործունեություն[խմբագրել | խմբագրել կոդը]

Նորելուկ երգիչն իր կարիերան սկսում է կորպորատիվ երեկոներում, ակումբներում և իր շրջապատում երգելով։ Նա ինքն էր գրում իր երգերը՝ ինչպես ռուսերեն, այնպես էլ հայերեն, իսկ դրանք նաև շուտով հնչում էին հեռուստատեսությամբ և ռադիոյով։ Նրա հեղինակային երգերից են՝ «Մի՛ լռիր» (Не молчи), «Միլիոն համբույր» (Миллион поцелуев), «Հայրենիք» (Родина), ինչպես նաև «Վերադարձիր տուն» (Возвращайся домой) երգը, որը ներկայացրել է «X ֆակտոր»-ի լսումների փուլերում։

Ես երգում եմ հայերեն, ունեմ հեղինակային երգ, որը կոչվում է «Հայրենիք»։ Ամեն տեղ չեմ երգում այն, քանի որ ոչ բոլորը կհասկանան։ Այդ երգի մեծ հաջողությունը իր`շատ խորիմաստ տեքստ ունենալու մեջ է։ Հայկական երաժշտությունը բխում է հոգու խորքից։ Այն չի կարող չհուզել։ Ես պաշտում եմ ազգային արվեստը, հատկապես ազգային երաժշտությունը, այլ ոչ թե այն, ինչ անվանում են հայկական երաժշտություն, թեև դա ընդհանրապես կապ չունի ազգային երաժշտության հետ։
- Սևակ Խանաղյան

2015 թվականի սկզբին Սևակը մասնակցեց իր առաջին հեռուստանախագծին՝ «Գլխավոր բեմին»։ Առաջին փուլում նա կատարեց Մաքսիմ Ֆադեևի «Պարեր ապակու վրա» (Танцы на стеклах) երգը և ընդգրկվեց հենց Մաքսի խմբում։ Սևակը նախագծում հասավ մինչև 1/4 եզրափակիչ[8]։

Տարվա ավարտին նա մասնակցեց ևս մեկ նախագծի՝ «Ձայն»-ին[9]։ Կույր լսումների ժամանակ նա կատարեց Վիկտոր Ցոյի «Կկու» ("Кукушка") երգը, սակայն իր մշակմամբ։ Սևակի ձայնը դուր եկավ ռեպեր Բաստային և Պոլինա Գագարինային, որի խմբում էլ հայտնվեց հայ երգիչը։ Հաջորդ փուլում նա պետք է «մենամարտեր» ջազային երգչուհի Սոֆի Օկրանի հետ, սակայն պարտվեց և դուրս մնաց նախագծից։

Իսկ ահա 2016 թվականին նա մասնակցեց ուկրաինական «Х-ֆակտոր» նախագծի 7-րդ եթերաշրջանին։ Քասթինգի ժամանակ նա երգեց իր հեղինակային «Մի՛ լռիր» (Не молчи) երգը, որն էլ հուզեց ժյուրիի անդամներին։ Նրա մարզիչը դարձավ հայտնի երաժիշտ Անտոն Սավլեպովը։ Ուղիղ եթերներից մեկի ժամանակ նա կատարեց Ալեքսանդր Պանայոտովի «Անհաղթելի» ("Непобедимый") երգը, իսկ հետո շարունակեց ներկայացնել իր հեղինակային ստեղծագործությունները։

Հաղթանակից հետո Սևակն առաջին անգամ Հայաստանում մենահամերգ ունեցավ 2017 թվականի հունվարի 13-ին՝ Հավանա ռեստորանային համալիրում, իսկ դրանից հետո հայտնեց համերգային հյուրախաղերի մասին ինչպես Հայաստանում, այնպես էլ Ռուսաստանի տարբեր քաղաքներում։

Փետրվարի 19-ին Արամ Խաչատրյան մեծ համերգասրահում տեղի ունեցավ Սևակի երկրորդ մենահամերգը, որի ժամանակ երգիչը ներկայացրեց ինչպես իր հեղինակային ստեղծագործությունները, այնպես էլ հայտնի երգերի քավրներ, որոնք իր կատարմամբ մեծ հնչեղություն են ստացել X Factor-ի շրջանակներում։ Նա մենահամերգով հանդես կգա նաև փետրվարի 26-ին և մարտի 13-ին, քանի որ նրա համերգների տոմսերը շատ շուտ են սպառվում[10]։

Սևակի մայրը՝ տիկին Նազիկն այսպես է արտահայտվում որդու մասին.

Ես սպասում էի, որ Սևակն այսպիսի հաջողության կհասնի, որովհետև մանկուց շատ էր սիրում երգը։ 7 տարեկան էր, ձեռքերը չէին հասնում սինթեզին, ձգվում էր, որ նվագեր։ 10 տարեկանից դպրոցի բոլոր միջոցառումներին երգում ու նվագում էր։ Ինքը միայն դեպի լավն է փոխվել ամեն հարցում։ Այնքան շնորհքով է։ Այդքան ժամանակ Ռուսաստանում թեկուզ մենակ է մնացել, ոչինչ չի փոխվել։ Ինքը փոքրուց ինչպիսին կար, նույնպիսին էլ մնացել է։ Վստահ եմ՝ իրեն կյանքում ոչինչ չի փոխի[11]։

Սկավառակագրություն[խմբագրել | խմբագրել կոդը]

Տարի Հայերեն անվանում Բնօրինակ անվանում
2016 Հին ֆայտոն ռուս.՝ Старый Фаэтон
2016 Վերադարձիր ռուս.՝ Возвращайся
2016 Երբ միասին ենք ռուս.՝ Когда Мы С Тобой
2016 Մի լռիր ռուս.՝ Не молчи
2016 Անկշռություն ռուս.՝ Невесомость
2016 Հայրենիք ռուս.՝ Родина
2017 Այայի երկիր Արցախ
2017 Իմ թթվածին ռուս.՝ Мой кислород

Սևակ Խանաղյանի կատարմամբ երգեր՝

Տարի Հայերեն անվանում Բնօրինակ անվանում
2015 Գեղեցիկ ռուս.՝ Красиво
2015 Կկու ռուս.՝ Кукушка
2016 Ես չեմ կարող առանց քեզ ռուս.՝ Я не могу без тебя
2016 Միասին ռուս.՝ Вдвоем
2016 Խոստովանություն ռուս.՝ Исповедь
2016 Սիրիր ինձ, սիրիր ռուս.՝ Люби Меня, Люби
2016 Աղոթք ռուս.՝ Молитва
2016 ռուս.՝ Непобедимый

Ծանոթագրություններ[խմբագրել | խմբագրել կոդը]

  1. 1,0 1,1 https://pantheon.world/profile/person/Sevak_Khanagyan
  2. «Հայաստանի ձայնը». Արխիվացված է օրիգինալից 2017 թ․ դեկտեմբերի 22-ին. Վերցված է 2018 թ․ հունվարի 22-ին.
  3. Եթե հաղթելու հույս չունես, անիմաստ է մասնակցել». Սևակ Խանաղյանը կմասնակցի «Դեպի Եվրատեսիլին»(չաշխատող հղում)
  4. «Սևակ Խանաղյանը Հայաստանը կներկայացնի «Եվրատեսիլ-2018»-ում». armenpress.am. Վերցված է 2018 թ․ փետրվարի 25-ին.
  5. Севак Ханагян (биография, фото, видео)
  6. Ես շատ հպարտ եմ իմ հայ լինելով. Սևակ Խանագյան
  7. Ո՞վ է Սևակ Խանաղյանի կինը:
  8. «Сева Ханагян». Արխիվացված է օրիգինալից 2017 թ․ սեպտեմբերի 1-ին. Վերցված է 2017 թ․ փետրվարի 27-ին.
  9. ПЕРВЫЙ КАНАЛ. ГОЛОС-4
  10. Սևակ Խանաղյան. «Ինձ ոչինչ չի կանգնեցնի»
  11. Սևակ Խանաղյանի մայրիկի բացահայտումները երգչի մասին