Իվան Մայսկի

Մայսկի Իվան Միխայլովիչ (1884-1975), խորհրդային դիվանագետ, ԽՍՀՄ արտակարգ և լիազոր դեսպան, պատմաբան: ԽՍՀՍ ԳԱ ակադեմիկոս (1946); ԽՄԿԿ անդամ 1921 թվականից: 1902 թվականից ընդգրկվել է հեղափոխական շարժման մեջ, 1903 թվականին հարել է մենշևիկներին (որոնցից հրաժարվել է 1918-ին): 1908 թվականից տարագրվել է: 1912 թվականին ավարտել է Մյունխենի համալսարանը: 1917 թվականի Փետրվարյան հեղափոխությունից հետո վերադարձել է Ռուսաստան: 1922 թվականից անցել է դիվանագիտական աշխատանքի:

1929—1932 թվականներին՝ լիազոր ներկայացուցիչ Ֆինլանդիայում, 1932-1943 թվականներին՝ ԽՍՀՄ դեսպան Մեծ Բրիտանիայում: 1943-1946 թվականներին՝ ԽՍՀՄ արտգործժողկոմի տեղակալ: Մասնակցել է Ղրիմի (1945), Պոտսդամի (1945) կոնֆերանսներին: 1935-1937 թվականներին եղել է ԽՍՀՄ Կենտգործկոմի անդամ, 1941-1947 թվականներին՝ ԽՄԿԿ ԿԿ անդամության թեկնածու: 1946 թվականից զբաղվել է գիտական և գիտամանկավարժական աշխատանքով:

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։