Սուրբ Հարություն եկեղեցի (Բեյրութ)
| Սուրբ Հարություն եկեղեցի | |
|---|---|
| Հիմնական տվյալներ | |
| Տեսակ | եկեղեցի |
| Երկիր |  Լիբանան |
| Տեղագրություն | Բեյրութ |
| Դավանանք | Հայ Առաքելական Եկեղեցի |
| Թեմ | Լիբանանի թեմ |
| Հիմնական ամսաթվերը | 1931 |
| Ժառանգության կարգավիճակ | Մեծի Տանն Կիլիկիո Կաթողիկոսություն |
| Ճարտարապետական ոճ | հայկական ճարտարապետություն |
| Հիմնադրված | 1931 |
 | |
 | |
Անվան այլ կիրառումների համար տե՛ս՝ Սուրբ Հարություն եկեղեցի (այլ կիրառումներ)
Սուրբ Հարություն եկեղեցի, Բեյրութ քաղաքում գտնվող կրոնական կառույց։ Պատկանում է Մեծի Տանն Կիլիկիո կաթողիկոսության Լիբանանի թեմին։ Կազմակերպում է Լիբանանի մայրաքաղաք Բեյրութում բնակվող առաքելական հայության մի մասի հոգևոր կյանքը, հանդիսանում է լիբանանահայ համայնքի կարևոր հոգևոր կենտրոններից մեկը[1]։
Պատմություն
[խմբագրել | խմբագրել կոդը]Սուրբ Հարություն Եկեղեցու հիմնաքարը տեղադրվել է 1930 թվականին։ Շինարարական աշխատանքները սկսվել են 1931 թվականին՝ ճարտարապետ Մարտիրոս Ալթունյանի ղեկավարությամբ, որը կազմել է նաև եկեղեցու հատակագիծը։ 1934 թվականի հոկտեմբերի 14-ին շինարարությունը ավարտվել է, իսկ եկեղեցու օծումը տեղի է ունեցել հոկտեմբերի 28-ին՝ ձեռամբ Տեր Շահե եպիսկոպոս Գասպարյանի։ Եկեղեցին անվանակոչվել է Սուրբ Հարություն՝ ի հիշատակ եկեղեցու և շրջանի բարերար Նևրիկ Քեհեյանի վաղամեռիկ որդու՝ Հարությունի։ Քեհեյանը Մար Մըխայել թաղամասում հայ համայնքին նվիրաբերել է մի հսկայական տարածք[1]։
1974 թվականին վերանորոգվել է խորանը։ 1993 թվականին՝ Կարապետ Տեր Ստեփանյանի բարերարությամբ, նորոգվել է մկրտարանը, որը 2013 թվականին կրկին նորոգվել է Գոգո և Ռիտա Տեր Ստեփանյանների աջակցությամբ։ 2014 թվականին եկեղեցու խորանի առաստաղին որմնանկարիչ Լուսինե Գաբրիելյանի ջանքերով նկարվել է «Աղավնու» պատկերը, որը խորհրդանշում է Սուրբ Հոգին[1]։
Եկեղեցու հոգևոր հովիվներ
[խմբագրել | խմբագրել կոդը]- Տեր Արսեն քահանա Հովհաննիսյան (1934-1938)
- Տեր Վարդան քահանա Վարդերեսյան (1938-1945)
- Տեր Հովհաննես քահանա Թովմասյան (1946-1949)
- Տեր Մեսրոպ քահանա Բագամջյան (1949-1951)
- Տեր Պսակ քահանա Էթարյան (1951-1978)
- Տեր Օշական քահանա Աշըքյան (1978-2010)
- Տեր Ղևոնդ քահանա Լոշխաջյան (2012-ից մինչ օրս)
Սուրբ Հարություն Եկեղեցու ներկայիս Թաղական խորհրդի անդամներն են՝ Թորոս Ավետիսյանը (նախագահ), Նազարեթ Սեոքյունյանը, Գևորգ Արսլանյանը, Լուսին Թապաքյանը, Հայկազ Գյոքգյոզյանը և Հարութ Պասմաճյանը։
2023 թվականի մարտի 12-ին կայացել է Թաղական խորհրդի ընտրություն։ Նորընտիր Թաղական խորհրդի անդամներն են՝ Թորոս Ավետիսյանը (նախագահ), Սիլվա Հակոբյանը, Նազարեթ Սեոքյունյանը, Գևորգ Ասլանյանը, Հայկազ Գյոքգյոզյանը, Հարություն Պասմաճյանը և Սևակ Գյուլեքճյանը[1]։
Ծանոթագրություններ
[խմբագրել | խմբագրել կոդը]- ↑ 1,0 1,1 1,2 1,3 Լիբանանի թեմ. «Ս. Գէորգ Եկեղեցի (Հաճըն)». www.armprelacylb.org. Առաջնորդարան հայոց Լիբանանի.
Այս հոդվածի կամ նրա բաժնի որոշակի հատվածի սկզբանական տարբերակը վերցված է «Հայ Սփյուռք» հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ 
|
