Սահմանային շերտ, մածուցիկ հեղուկով (գազով) շրջհոսվող պինդ մարմնի մակերևույթի մոտ կամ տարբեր արագություններ, ջերմաստիճաններ, քիմիական բաղադրություն ունեցող երկու հեղուկների հոսքերի բաժանման սահմանում առաջացող հոսանքի նեղ տիրույթ։ Բնութագրվում է լայնական ուղղությամբ արագության (դինամիկական սահմանային շերտ), ջերմաստիճանի (ջերմային կամ ջերմաստիճանային սահմանային շերտ) կամ առանձին քիմիական բաղադրիչների (դիֆուզիայի սահմանային շերտ) կտրուկ փոփոխությամբ։ Դինամիկական սահմանային շերտի ներսում տեղի է ունենում արագության սահուն փոփոխություն արտաքին շերտում ունեցած արժեքից մինչև զրոյական արժեքը։ Նույն ձևով սահմանային շերտի ներսում սահուն կերպով փոփոխվում են ջերմաստիճանը և խտությունը։ Սահմանային շերտի առաջանալը պայմանավորված է մածուցիկ հեղուկի (գազի)՝ շրջհոսվող մարմնի մակերևույթին կամ շրջհոսվող պատերին կպչելու հատկությամբ։ Կախված արտաքին հոսանքի ռեժիմից, մակերևույթի խորդուբորդությունից և շերտի հաստությունից՝ սահմանային շերտի ռեժիմը կարող է լինել լամինար կամ տուրբուլենտ։ Այդ երկու ռեժիմների դեպքում սահմանային շերտի հաստությունը հակադարձ համեմատական է Ռեյնոլդսի թվին (Re)։ Re-ի շատ մեծ արժեքների դեպքում սահմանային շերտի հաստությունը շատ փոքր է մարմնի բնութագրական չափերի համեմատությամբ։ Այդ իսկ պատճառով հոսանքի գրեթե ամբողջ տիրույթում (բացառությամբ բարակ սահմանային շերտի) մածուցիկության ուժերի ազդեցությունը էական չէ իներցիոն ուժերի համեմատությամբ, և հեղուկը այդ տիրույթում կարելի է համարել իդեալական։
Սահմանային շերտի տեսությունը կարևոր կիրառություն ունի ինքնաթիռաշինության, նավաշինության, հրթիռաշինության, էներգամեքենաշինության և այլ բնագավառներում։ Այն հնարավորություն է տալիս տեսականորեն հաշվարկելու շրջհոսվող մարմինների շփման դիմադրությունը, ուսումնասիրելու շրջհոսման աերոդինամիկական հետքերը, շիթերը ևն։ Սահմանային շերտի տեսության հիմնական գաղափարները 1904-ին ձևակերպել է Լ․ Պրանդտլը։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 10, էջ 145)։
