Ջրածնային էլեկտրոդ

Ջրածնային էլեկտրոդ, որոշակի կոնցենտրացիայով թթվի լուծույթում ընկղմված և գազային ջրածնի հոսքում գտնվող պլատինե թիթեղ։ Ջրածնային էլեկտրոդի վրա ընթացող $H_{2}\rightleftarrows 2H^{+}+2e^{-}$ դարձելի ռեակցիայի հետևանքով էլեկտրոդի վրա առաջանում է պոտենցիալ։ Եթե ջրածին իոնների ակտիվությունը 1 գ․ իոն/լ է, իսկ գազային ջրածնի ճնշումը՝ 1 կգ/սմ² (մթն), ջրածնային էլեկտրոդի պոտենցիալը կոչվում է ստանդարտ (նորմալ) պոտենցիալ, որի արժեքը պայմանականորեն ընդունված է համարել $0$։ Ջրածնային էլեկտրոդի ստանդարտ պոտենցիալի համեմատությամբ են որոշվում մյուս բոլոր էլեկտրոդների պոտենցիալները։ Ջրածնային էլեկտրոդը օգտագործվում է որպես համեմատական էլեկտրոդ։

Ջրածնային էլեկտրոդի սխեման՝

1. Պլատինե էլեկտրոդ։
2. Մատակարարվում է ջրածնային գազ։
3. Թթվի (սովորաբար $HCl$) լուծույթ, որում $H^{+}$ կոնցենտրացիան = 1 մոլ/լ։
4. Ջրային փական, որը կանխում է մթնոլորտային թթվածնի մուտքը։
5. Էլեկտրոլիտիկ կամուրջ (բաղկացած $KCl$ կոնցենտրացված լուծույթից), որը թույլ է տալիս միացնել գալվանական էլեմենտի երկրորդ կեսը։

Ծանոթագրություններ

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 9, էջ 527)։