Պողոս-Լևոն Զեքիյան
Պողոս-Լևոն Զեքիյան | |
|---|---|
| Ծնվել է | 1943 հոկտեմբերի 21 Թուրքիա Կոստանդնուպոլիս |
| Քաղաքացիություն | Թուրքիա |
| Ազգություն | Հայ |
| Դավանանք | Հռոմի Կաթոլիկ եկեղեցի[1] և Հայ Կաթողիկէ Եկեղեցի |
| Մասնագիտություն | Պատմություն բանասիրություն |
| Պաշտոն(ներ) | կաթոլիկ արքեպիսկոպոս, տիտղոսակիր արքեպիսկոպոս և առաքելական ադմինիստրատոր |
| Անդամակցություն | Վենետիկի գիտությունների, գրականության և արվեստի համալսարան |
| Ալմա մատեր | Կոստանդնուպոլսի վարժարաններ Վենետիկի Մխիթարյան միաբանության դպրեվանք Հռոմի Գրիգորյան պապական համալսարան |
| Տիրապետում է լեզուներին | իտալերեն[2] և հայերեն[2] |
| Ինչով է հայտնի | Վենետիկի գիտության, բանասիրության և արվեստի ինստիտուտի թղթակից անդամ (1992), ԵՊՀ պատվավոր դոկտոր (2000) |
| Կայք | unive.it/persone/zkybhs(իտալ.) |
Պողոս-Լևոն Անտոնի Զեքիյան (հոկտեմբերի 21, 1943, Ստամբուլ, Թուրքիա[3] և Կոստանդնուպոլիս), հայագետ, փիլիսոփա, Մխիթարյան միաբանության անդամ, վարդապետ (1959-1987), Ստամբուլի համալսարանի պրոֆեսոր (1973), ՀՀ ԳԱԱ արտասահմանյան անդամ (1994), Վենետիկյան ակադեմիայի անդամ (1992), Վենետիկյան ակադեմիայի իսկական անդամ (2005), Պոլսի հայ կաթողիկե աթոռի առաքելական կառավարիչ, արքեպիսկոպոս (2014-)
Կենսագրություն[խմբագրել | խմբագրել կոդը]
Պողոս-Լևոն Զեքիյանը ծնվել է Կոստանդնուպոլսում։ Սովորել Է Կոստանդնուպոլսի վարժարաններում, Վենետիկի Մխիթարյան միաբանության դպրեվանքում։ 1962 թվականին ավարտել է Հռոմի Գրիգորյան պապական համալսարանի փիլիսոփայության ֆակուլտետը, 1966 թվականին՝ նույն համալսարանի աստվածաբանության ֆակուլտետը։ 1966-1968 թվականներին մասնագիտացել է Արևելյան աստվածաբանության բնագավառում։
1968-1974 թվականներին ուսուցչություն է արել Կոստանդնուպոլսի Մխիթարյան և Կեդրոնական, 1974 թվականից՝ Վենետիկի Մուրադ-Ռափայելյան վարժարանում, 1982-1985 թվականներին՝ տնօրեն, 1981 թվականից՝ Վենետիկի համալսարանի հայոց լեզվի և գրականության ամբիոնի վարիչ, 1980-1985 թվականներին՝ «Բազմավեպի» խմբագիր[4]։
1974 թվականից բնակվում է Իտալիայում։
Մինչև 2011 թվականը Վենետիկի Կա Ֆոսկարի համալսարանում վարել է իր իսկ կողմից 1976 թվականին հիմնված հայագիտական ամբիոնը։ Ներկայումս Հռոմի Արևելյան հայրապետական համալսարանում աստվածաբանության և հայ եկեղեցու դավանանքի դասախոս է։ 2014 թվականին նշանակվել է Կոնստանդնուպոլսի և Թուրքիայի հայ կաթոլիկ համայնքի արքեպիսկոպոս[5]։
Հիմնական աշխատանքները վերաբերում են գիտակցության, Օգոստինոսյան ներգոյապաշտության, հումանիզմի, հայոց պատմության, բանասիրության և մշակույթի, ազգային և կրոնական ինքնության հարցերին, հայ տեսահայեցողական և աստվածաբանական մտքին։ Անդրադարձել Է նաև Հովհան Մանդակունու, Ներսես Շնորհալու, Պետրոս Դուրյանի, Դանիել Վարուժանի և այլոց ստեղծագործություններին, հայ-վրացական մշակութային կապերին, գրաբարի հոլովման համակարգին և այլն[6]։
Տիրապետում է հայերենին (նաև գրաբար), թուրքերենին, իտալերենին, ֆրանսերենին, գերմաներենին, անգլերենին, ռուսերենին։ Հեղինակ է շուրջ հարյուր գիտական ուսումնասիրությունների, հոդվածների ու տասնյակ թեմատիկ գրքերի[7]։
Պարգևներ[խմբագրել | խմբագրել կոդը]
- ԵՊՀ ոսկե մեդալ, 2000
Երկեր[խմբագրել | խմբագրել կոդը]
- Հայ թատրոնի սկզբնաքայլերը և հայ վերածնունդի շարժումը, 1975։
- Բանակցութիւններ Ա. Ներսես Շնորհալիի եւ կայսերական նուիրակ Թէորիւսնոսի միջեւ..., 1978։
- Իտալիայի հայ գաղութները, 1978։
- Հումանիզմական գաղափարային բովանդակութիւնը և պատմական արմատները, 1981։
- Վենետիկ և հայերը, Վնտ., 1990։
- Հոգիի և ինքնութեան հետքերով, Երևան, 2000։
- Ինքնութեան խճանկար, Բեյրութ 2000։
- Հայապատում... ներտողային, Լոս ԱՆջելես, 2001։
Ծանոթագրություններ[խմբագրել | խմբագրել կոդը]
- ↑ Catholic-Hierarchy.org — USA: 1990.
- ↑ 2,0 2,1 Bibliothèque nationale de France data.bnf.fr (ֆր.): տվյալների բաց շտեմարան — 2011.
- ↑ 3,0 3,1 Deutsche Nationalbibliothek Record #122454677 // Gemeinsame Normdatei (գերմ.) — 2012—2016.
- ↑ Պողոս-Լևոն Զեքիյանի կենսագրությունը ՀՀ ԳԱԱ կայքում
- ↑ «Հայր Լևոն Զեքիյանին Հռոմի Ֆրանցիսկոս պապը նշանակել է Կ. Պոլսի հայ կաթոլիկ համայնքի արքեպիսկոպոս». Արխիվացված է օրիգինալից 2014 թ․ նոյեմբերի 17-ին. Վերցված է 2015 թ․ օգոստոսի 18-ին.
- ↑ Ով ով է. Հայեր. Կենսագրական հանրագիտարան, հատոր առաջին, Երևան, 2005.
- ↑ 70 ամեակ. պրոֆեսոր Հայր Պօղոս Լեւոն Զէքիեան
Արտաքին հղումներ[խմբագրել | խմբագրել կոդը]
- Պողոս-Լևոն Զեքիյան Արխիվացված 2021-05-19 Wayback Machine
| ||||||||||||||||||||
