Պոլիսուլֆիդներ

Պոլիսուլֆիդներ, $H_{2}S_{x}$-ի ածանցյալներ, որտեղ $x$-ը կարող է լինել $2$-ից մինչև $9$։ Տհաճ, սուր հոտով, բաց դեղնավունից մինչև դարչնակարմրավուն պինդ նյութեր են։ Հայտնի են ամոնիումի, ալկալիական և հողալկալիական մետաղների պոլիսուլֆիդներ, օրինակ՝ կալիումն առաջացնում է $K_{2}S_{2},K_{2}S_{3},K_{2}S_{4},K_{2}S_{5}$ և $K_{2}S_{6}$։ Պոլիսուլֆիդների մոլեկուլներում ծծումբի ատոմները տեղադրված են շղթայով, $-S-S-S-$։ Պոլիսուլֆիդների հալման ջերմաստիճանը ավելի ցածր է, քան սուլֆիդներինը, օրինակ․ $K_{2}S$-ի հալման ջերմաստիճանը 835 °C, $K_{2}S_{6}$-ինը՝ 183 °C։ Պոլիսուլֆիդներ քիմիապես կայուն չեն, տաքացնելիս քայքայվում են՝ առաջացնելով սուլֆիդներ։ Պոլիսուլֆիդները ստանում են սուլֆիդները, հիդրօքսիդները, կարբոնատները ծծմբի հետ հալելով (ծծումբը կարելի է ավելացնել սուլֆիդի ջրային լուծույթին)։ Կալցիումի, բարիումի պոլիսուլֆիդները օգտագործվում են գյուղատնտեսական վնասատուների դեմ պայքարի համար, անօրգանական պոլիսուլֆիդների՝ մորթու վրայից մազերը հեռացնելու, ներկերի, պոլիսուլֆիդային կաուչուկների արտադրության մեջ։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 9, էջ 360)։