Նենեցներ (նախկին անվանումը՝ սամոյեդներ, յուրակներ), ժողովուրդ։ Բնակվում են Կոլա թերակղզուց մինչև Ենիսեյ գետի ստորին հոսանքի աջափնյա շրջաններն ընդգրկող տարածքում, մեծ մասը՝ ՌԴ Արխանգելսկի մարզի Նենեցական, Տյումենի մարզի Յամալո-Նենեցական և Կրասնոյարսկի երկրամասի Թայմիրական (Դոլգանո-Նենեցական) օկրուգներում։ Թիվը՝ 30 հազար (1979)։ Խոսում են նենեցերեն։
Հոկտեմբերյան հեղափոխությունից հետո նենեցական մշակույթը տուժեց խորհրդային կոլեկտիվացման քաղաքականության պատճառով։ Նենեցների մի մասն ընդունեց ուղղափառություն, մեծամասնությունը պահպանեց ոգեպաշտական հավատալիքները, տարածված էր շամանությունը։