Մաքսիմ Կատվալյան
| Մաքսիմ Կատվալյան | |
|---|---|
| Ծնվել է | 1936 թվականի Նոյեմբերի 1, |
| Ծննդավայր | Սարուխան, Գեղարքունիքի մարզ |
| Մահացել է | 2007 |
| Մահվան վայր | Երևան |
| Քաղաքացիություն |  Հայաստան |
| Ազգություն | հայ |
| Կրթություն | Երևանի պետական համալսարան |
| Գիտական աստիճան | պատմական գիտությունների թեկնածու |
| Մասնագիտություն | պատմաբան |
| Աշխատանք | խմբագիր, դասախոս |
| Աշխատավայր | Հայկական սովետական հանրագիտարանի խմբագրություն, Հայկական պետական մանկավարժական համալսարան, Երևանի պետական համալսարան |
Մաքսիմ Կատվալյան (1936, Սարուխան, Գեղարքունիքի մարզ – 2007, Երևան), պատմաբան, պատմական գիտությունների թեկնածու, դոցենտ։
Կենսագրություն[խմբագրել | խմբագրել կոդը]
Ծնվել է 1936 թվականի նոյեմբերի 1-ին Գեղարքունիքի մարզի Սարուխան գյուղում։ 1954 թվականին միջնակարգ դպրոցն ավարտելուց հետո ընդունվել է Նոր Բայազետի անասնաբուժական-անասնաբուծական տեխնիկումը։ 1955 թվականին զորակոչվել է խորհրդային բանակ և ծառայել ԽՍՀՄ ռազմաօդային ուժերում։ 1959 թվականին ընդունվել է Երևանի պետական համալսարանի Պատմության ֆակուլտետը։ Ուսումն ավարտելուց հետո՝ 1964 թվականին գործուղվել է Աբովյանի շրջանի Նոր Հաճն ավանի երկօրյա դպրոցներից մեկը՝ որպես պատմության և հասարակագիտության ուսուցիչ։ 1967 թվականին աշխատանքի է անցել ՀԽՍՀ ԳԱ Հայկական սովետական հանրագիտարանի խմբագրությունում որպես գիտական խմբագիր, 1970 թվականից՝ ավագ գիտական խմբագիր, իսկ 1981 թվականից որպես հայ ժողովրդի պատմության խմբագրության վարիչ։ 1980 թ. պաշտպանել է թեկնածուական ատենախոսություն «Հայկական լեռնաշխարհի հնագույն պետական կազմավորումները և հայկական ցեղերի համախմբման ընթացքը Մ. թ. ա. IX-VI դարերում» թեմայով։ 1985 թվականից համատեղությամբ Հայոց պատմություն է դասավանդել Երևանի պետական մանկավարժական համալսարանում։ 1987 թ. աշխատանքի է անցել ԵՊՀ Պատմության ֆակուլտետի Հայոց պատմության ամբիոնում որպես դասախոս։ 1995 թվականին Մաքսիմ Կատվալյանին շնորհվել է դոցենտի գիտական կոչում։ Մահացել է 2007 թվականի վերջին, Երևանում։ Շուրջ 300 գիտական հոդվածների հեղինակ է, ուսումնական ծրագրերի, ձեռնարկների, դասագրքերի և գիտական աշխատությունների համահեղինակ։ Գիտական աշխատությունները վերաբերում են հայ ժողովրդի կազմավորման, հայոց պետականության, հնագույն, հին և միջին դարերի պատմության բազմաթիվ հիմնահարցերի։
Գրականություն[խմբագրել | խմբագրել կոդը]
- Երևանի պետական համալսարանի 90-ամյա պատմության ֆակուլտետը, խմբ. Էդիկ Գ. Մինասյան, Երևան, 2009, էջ 212։