Հովսեփ Տեր-Դավթյան

Հովսեփ Տեր-Դավթյան
Ծնվել է	1862 Թիֆլիս, Ռուսական կայսրություն
Մահացել է	1938 Թբիլիսի, ԽՍՀՄ
Մասնագիտություն	հասարակական գործիչ, դաշնակահար և մանկավարժ
Գործիքներ	դաշնամուր
Շրջանավարտ	Մոսկվայի Չայկովսկու անվան պետական կոնսերվատորիա

Հովսեփ Գևորգի Տեր-Դավթյան (1862, Թիֆլիս - 1938, Թբիլիսի), հայ դաշնակահար, մանկավարժ, երաժշտական-հասարակական գործիչ։

Կենսագրություն

Ավարտել է Մոսկվայի կոնսերվատորիան (Պ․ Պաբստի դասարան)։ 1894 թվականից ապրել և գործել է Թիֆլիսում։ Պրոպագանդել է հայկական դաշնամուրային երաժշտությունը (Ս․ Բարխուդարյան, Ն․ Տիգրանյան, Ա․ Մայիլյան, Կ․ Զաքարյան և ուրիշներ)։

Համերգներով հանդես է եկել Անդրկովկասի տարբեր քաղաքներում։ Թիֆլիսում հիմնել է իր մասնավոր երաժշտական դպրոցը, որտեղ նրան աշակերտել են կոմպոզիտորներ Սպիրիդոն Մելիքյանը, Մարտին Մազմանյանը, Ս․ Գալիկյանը, դաշնակահարուհի Օլգա Բաբասյանը, երգչուհի և դաշնակահարուհի Ա․ Աբալյանը և ուրիշներ։ Եղել է Թիֆլիսի հայոց երաժշտական ընկերության նախագահը (1914-1917)։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 11, էջ 667)։