Հասմիկ Սիմոնյան (բանաստեղծ)

Անվան այլ կիրառումների համար տե՛ս՝ Հասմիկ Սիմոնյան (այլ կիրառումներ)

Վիքիպեդիայում կան հոդվածներ Սիմոնյան ազգանունով այլ մարդկանց մասին:

Հասմիկ Սիմոնյան
Ծնվել է	մարտի 7, 1987(1987-03-07) (36 տարեկան)
Ծննդավայր	Երևան, Հայկական ԽՍՀ, ԽՍՀՄ
Մասնագիտություն	բանաստեղծուհի և գրող
Քաղաքացիություն	Հայաստան
Կրթություն	Հայկական պետական մանկավարժական համալսարան (2008)
Անդամակցություն	ՀԳՄ
Պարգևներ	Հայաստանի նախագահի երիտասարդական մրցանակ

Հասմիկ Գագիկի Սիմոնյան (մարտի 7, 1987(1987-03-07), Երևան, Հայկական ԽՍՀ, ԽՍՀՄ), հայ բանաստեղծ, Հայաստանի գրողների միության անդամ (2007):

Կենսագրություն

Հասմիկ Սիմոնյանը ծնվել է 1987 թվականին Երևանում։ 2003 թվականին ավարտել է Երևանի Մուշեղ Գալշոյանի անվան թիվ 148 միջնակարգ դպրոցը, 2003-2008 թվականներին սովորել է Երևանի Խաչատուր Աբովյանի անվան պետական մանկավարժական համալսարանի բանասիրական ֆակուլտետում, 2008-2009 թվականներին՝ Կովկասի ինստիտուտի լրագրության բաժնում։ 2005 թվականին հրատարակված Սիմոնյանի «Լուսնոտ բառեր» բանաստեղծությունների ժողովածուն ձեռագիր վիճակում արժանացել է Սլավիկ Չիլոյանի անվան մրցանակի։ 2010 թվականին հրատարակվել է «Թափթփված սենյակներ» բանաստեղծությունների երկրորդ ժողովածուն։ Տպագրվել է «Գրական թերթ», «Գրեթերթ», «Եղիցի լույս», «Գարուն», «Նարցիս», «Ցոլքեր», «Ինքնագիր», «Հետք» և այլ թերթերում ու ամսագրերում, ինչպես նաև՝ «Գրանիշ» և «Հետք» ինտերնետային կայքերում։

Պարգևներ, մրցանակներ

• «Գրեթերթի» մրցանակ՝ «Պոեզիա» անվանակարգում, 2010
• «Գրեթերթի» մրցանակի՝ «Հրապարակախոսություն և ակնարկ» անվանակարգում, 2008
• Հրանտ Մաթևոսյանի անվան կրթաթոշակ-մրցանակ, 2007
• Հակոբ Կարապենցի անվան մրցանակ, 2006
• Հայաստանի Նախագահի երիտասարդական մրցանակի «Գրականություն» բնագավառում, 2006

Երկեր

• Թափթփված սենյակներ, Երևան, 2010։
• Լուսնոտ բառեր, Երևան, 2005։