Կասսանդրա

Կասանդրա (հուն.՝ Κασσάνδρα), Տրոյայի թագավոր Պրիամոսի և թագուհի Հեկաբեի դուստրը։

Ապոլլոնը սիրահարվել էր Կասանդրաին և նրան օժտել գուշակելու ձիրքով, բայց ստանալով նրա մերժումը այնպես է անում, որ ոչ ոք չհավատա նրա գուշակություններին։ Կասանդրան իզուր է կանխագուշակում Տրոյայի կործանումը, այն վտանգը, որ թաքնված էր հույների լքված փայտե ձիու մեջ։ Տրոյայի անկման ժամանակ Կասանդրան թաքնվել է Աթենասի արձանի մոտ, բայց բռնվել է Էաս լոկրացու կողմից։ Ավար բաժանելու ժամանակ Կասանդրան բաժին է ընկնում Ագամեմնոնին և նրա հետ սպանվում Միկենեում Կլիտեմնեստրայի և Էգիսթոսի ձեռքով։

Կասանդրաի մասին առասպելը մշակվել է Էսքիլեսի «Օրեստեյա» դրամատիկական տրիլոգիայում և հելլենիստական գրող Լիկոփրոնի արհեստական էպոսում։ Նոր շրջանի գրականության մեջ Կասանդրաի ճակատագիրը երգել է Շիլլերը։

Աղբյուրներ

• Դիցաբանական բառարան, «Լույս», Երևան, 1985, էջ 117։