Լուսանկարչության պատմության թանգարան (Կրակով)
Լուսանկարչության պատմության թանգարան | |
---|---|
Տեսակ | լուսանկարչության թանգարան |
Երկիր | Լեհաստան |
Տեղագրություն | Կրակով |
Վայր | Կրակով |
Ղեկավարության նստավայր | Կրակով, Լեհաստան |
Հիմնադրվել է | 1986 |
Կայք | mhf.krakow.pl(լեհ.) |
Լուսանկարչության պատմության թանգարան (լեհ.՝ Muzeum Historii Fotografii im. Walerego Rzewuskiego, ամբողջական անվանումը՝ Վալերի Ժևուսկու անվան լուսանկարչության պատմության թանգարան), թանգարան Կրակովում՝ Յուզեֆիտով փողոցի թիվ 16 հասցեում։ Թանգարանը կոչվում է կրակովցի լուսանկարիչ Վալերի Ժևուսկու անունով։ Գրանցված է թանգարանների պետական ռեգիստրում։
Պատմություն[խմբագրել | խմբագրել կոդը]
Թանգարանը հիմնադրվել է 1972 թվականին՝ Կրակովի լուսանկարչական ընկերության նախագահ Վլադիսլավ Կլիմչակի նախաձեռնությամբ։ Թանգարանի առաջին հավաքածուն գտնվել է Ստարովիսլա փողոցի թիվ 13 հասցեում գտնվող Պուգետով պալատում, որտեղ տեղակայված է եղել Կրակովի լուսանկարչական ընկերությունը։ 1975 թվականին թանգարանը կոչվել է կրակովցի լուսանկարիչ Վալերի Ժևուսկու անունով։ 1982 թվականին թանգարանը տեղափոխվել է Հետմանական տուն, որը գտնվում է Գլխավոր շուկայի հրապարակի թիվ 17 հասցեում։
1986 թվականի դեկտեմբերի 31-ին թանգարանը դուրս է եկել Կրակովի լուսանկարչական ընկերությունից և դարձել անկախ մշակութային հաստատություն՝ ենթակա Մալոպոլսկի վոևոդության մշակույթի և զբոսաշրջության վարչությանը։ Լուսանկարչության պատմության թանգարանի առաջին տնօրեն է նշանակվել Վլադիսլավ Կլիմչակը։ 1989 թվականին Կրակովի պատմական թանգարանի աշխատակից Ստանիսլավ Պիվովարսկին կարճ ժամանակով եղել է թանգարանի տնօրեն։
1990 թվականին Վլադիսլավ Կլիմչակը հրաժարական է տվել թանգարանի տնօրենի պաշտոնից, իսկ նրա փոխարեն նշանակվել է Անտոնի Պետրովսկին։ 1991 թվականի նոյեմբերին թանգարանի տնօրեն է նշանակվել Բարբարա Օխմանսկայա-Յոդլովսկայան։
1992 թվականի հուլիսին թանգարանը տեղափոխվել է Յուզեֆիտով փողոցի թիվ 16 հասցեում գտնվող նոր շենք։ 1995 թվականին թանգարանը հրատարակել է իր առաջին կատալոգը՝ «1920 թվականի խորհրդային ռազմագերիները Յան Զիմովսկու լուսանկարներում» անվանումով։ 1996 թվականի հունիսի 12-ին շենքը, որտեղ գտնվում է թանգարանը, գրանցվել է Մալոպոլսկի վոևոդության պահպանվող հուշարձանների գրանցամատյանում (№ A-1029)[1]։
1999 թվականի հունվարին Լուսանկարչության պատմության թանգարանը անցել է Կրակով քաղաքի իրավասության ներքո և ընդգրկվել քաղաքային մշակութային հաստատությունների գրանցամատյանում։ 1999 թվականի մարտի 1-ին թանգարանի շենքի վրա տեղադրվել է հուշատախտակ՝ որտեղ նշված է, որ այդ շենքում 1945-1947 թվականներին գործել է «Prafilmówkа Krakowskа» հասարակական կազմակերպությունը՝ այդտեղ կազմակերպվել է Կինեմատոգրաֆիկան եղբայրության III համագումարը, որին մասնակցել են Ստանիսլավ Շիմանսկին, Եժի Կավալերովիչը, Եժի Պասենդորֆերը և Մեչիսլավ Յագոդան։ 1999 թվականի դեկտեմբերին թանգարանի տնօրեն է նշանակվել Մաչեյ Բայեսդորֆը։
2005 թվականի աշնանը թանգարանը հրատարակել է «Յոզեֆ Պիլսուդսկին Լուսանկարչության պատմության թանգարանի լուսանկարներում» լուսանկարների կատալոգը։
2014 թվականին թանգարանն ընդգրկվել է Թանգարանների պետական ռեգիստրում։
Լուսանկարչության պատմության թանգարանում գործում են հետևյալ ցուցադրությունները՝
- Լուսանկարչության նախապատմություն՝ Խավարի մենախուց և կախարդական լապտեր,
- Լուսանկարչական ստուդիաների վերակառուցումը 19-րդ և 20-րդ դարերում,
- Պատմական լուսանկարչություն՝ դագերոտիպիա, ամբրոտիպիա, ֆերրոտիպիա, պաննոտիպիա և ստերեոլուսանկարչություն,
- Լուսանկարչական սարքերի զարգացման պատմությունն առաջին մոդելից մինչև մեր ժամանակները,
- Լեհական «Fotoklub Polski» և «Fotoklub Wileński» լուսանկարչական ընկերությունների պատմություն,
- Լուսանկարչական արվեստանոցների գովազդի պատմություն,
- XX դարի 20-30-ական թվականների լուսանկարչական լաբորատորիաներ։
Ծանոթագրություններ[խմբագրել | խմբագրել կոդը]
- ↑ «Narodowy Instytut Dziedzictwa: Rejestr zabytków nieruchomych — województwo małopolskie» (PDF). Արխիվացված (PDF) օրիգինալից 2018 թ․ մարտի 1-ին. Վերցված է 2014 թ․ օգոստոսի 5-ին.
Արտաքին հղումներ[խմբագրել | խմբագրել կոդը]
- Պաշտոնական կայք
- Anna Szandała, Zbiory Muzeum Historii Fotografii w Krakowie w cyfrowej rzeczywistości. Muzeum Historii Fotografii w Krakowie.
- Muzeum Historii Fotografii im. Walerego Rzewuskiego. MHF w Krakowie. 2010.
Վիքիպահեստն ունի նյութեր, որոնք վերաբերում են «Լուսանկարչության պատմության թանգարան (Կրակով)» հոդվածին։ |
|