«Լայն փակված աչքերով» (անգլ.՝ Eyes Wide Shut), ռեժիսոր Սթենլի Կուբրիկի վերջին ֆիլմը (1999), որն էկրան է բարձրացել ռեժիսորի մահից մի քանի ամիս անց։ Ֆիլմի սյուժեն հիմնված է Արթուր Շնիցլերի «Երազանքների պատմություն» (1925) նովելի վրա, միայն թե էկրանավորման մեջ ներառված են նոր գործող անձինք, իսկ գործողությունները 1920-ականների Վիեննայից տեղափոխված են 1990-ականների Նյու Յորք։ Գլխավոր դերերում Թոմ Քրուզը և Նիկոլ Քիդմանն են, որոնք նկարահանումների ժամանակ դեռևս ամուսիններ էին։ Քննադատների կարծիքները ֆիլմի մասին բևեռայնորեն հակասական են. մի մասը այն անվանել է Կուբրիկի ամենաանհաջող ֆիլմը, մյուսները՝ նրա վերջին գլուխգործոցը։
