Ինֆիլտրատ ( լատիներեն in-ներս և filtratus - քամվածք), օրգանիզմիհյուսվածքներում բջջային տարրերի կուտակումը՝ ախտահարված օջախի շուրջը։ Լինում է բորբոքային և ուռուցքային ինֆիլտրատ։ Բորբոքային ինֆիլտրատն առավելապես պարունակում է բազմաձև-կորիզային լեյկոցիտներ (թարախային ինֆիլտրատ), էրիթրոցիտներ (հեմոռագիկ ինֆիլտրատ), հիստիոցիաներ և պլազմատիկբջիջներ։ Այս ինֆիլտրատները կարող են ներծծվել, քայքայվել, առաջացնել կավերնա (խոռոչ), թարախակույտ կամ սպի։ Ուռուցքային ինֆիլտրատը բաղկացած է տարբեր բնույթի ուռուցքային բջիջներից (քաղցկեղ, սարկոմա)։ Ինֆիլտրատի առաջացման հատվածում հյուսվածքի ծավալը մեծանում է, գույնը փոխվում, պնդանում, դառնում ցավոտ։ Վիրաբուժական պրակտիկայում «ինֆիլտրատ» են անվանում ետվիրահատական շրջանում վերքի շուրջն առաջացած պնդացումները։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 4, էջ 370)։
