Ժակ Հակոբյան (մշակութային գործիչ)

Անվան այլ կիրառումների համար տե՛ս՝ Ժակ Հակոբյան (այլ կիրառումներ)

Ժակ Հակոբյան
Ծնվել է	հունվարի 12, 1944(1944-01-12)
Ծննդավայր	Երևան, Հայկական ԽՍՀ, ԽՍՀՄ
Մահացել է	մայիսի 1, 2016(2016-05-01) (72 տարեկան)
Մահվան վայր	Երևան, Հայաստան
Կրթություն	Երևանի պետական համալսարան (1977)
Մասնագիտություն	պատմաբան և գրող
Պարգևներ և մրցանակներ	Հայաստանի մշակույթի նախարարության ոսկե մեդալ և Հայաստանի Հանրապետության մշակույթի վաստակավոր գործիչ

Ժակ Նիկոլայի Հակոբյան (հունվարի 12, 1944(1944-01-12), Երևան, Հայկական ԽՍՀ, ԽՍՀՄ - մայիսի 1, 2016(2016-05-01), Երևան, Հայաստան), հայ մշակութային գործիչ։

Կենսագրություն

Ժակ Հակոբյանը ծնվել է 1944 թվականի հունվարի 12-ին Երևանում։ 1971-1977 թվականներին ուսանել է ԵՊՀ պատմության ֆակուլտետում, որն ավարտելուց հետո աշխատանքի է անցել Երևանի գեղարվեստաթատերական ինստիտուտում՝ որպես կոմերիտմիության առաջին քարտուղար։

1987 թվականից պաշտոնավարել է որպես Մշակույթի հայկական ֆոնդի փոխնախագահ։

2004 թվականին որպես բաժնի վարիչ աշխատանքի է անցել Հայոց ցեղասպանության թանգարան-ինստիտուտում, իսկ 2005 թվականից շարունակել աշխատանքն արդեն որպես նույն թանգարան-ինստիտուտի փոխտնօրեն։

2007 թվականից եղել է Առնո Բաբաջանյանի հիշատակի միջազգային հիմնադրամի երևանյան մասնաճյուղի տնօրենը, իսկ 2010 թվականից նշանակվել է Հայաստանի պետական ֆիլհարմոնիայի փոխտնօրեն։

Եղել է Հայաստանի երգիծաբանների միության նախագահը, ՀՀ Նկարիչների միության պատվավոր անդամ։

Ժակ Հակոբյանը վախճանվել է 2016 թվականի մայիսի 1-ին Երևանում։

Ստեղծագործություն

Ժակ Հակոբյանը գրել է բանաստեղծություններ։ Հեղինակ է երգիծական հինգ գրքի՝

• «Ծիծաղի պարտեզ»
• «Սրամտում է Հայկական ռադիոն»
• «Հումորի և երգիծանքի 19 ակնթարթ»
• «Էս շան տղեն գիժ ա»
• «Ապրենք ժպտալով»։

Պարգևներ

2009 թվականին Ժակ Հակոբյանը պարգևատրվել է ՀՀ Մշակույթի նախարարության ոսկե մեդալով, 2010 թվականին արժանացել՝ ՀՀ մշակույթի վաստակավոր գործիչ կոչման։