Թիփի Հեդրեն

Թիփի Հեդրեն անգլ.՝ Tippi Hedren
Ծնվել է	հունվարի 19, 1930(1930-01-19)[…] (93 տարեկան)
Ծննդավայր	Նոր Ուլմ, Մինեսոտա, ԱՄՆ
Կրթություն	Huntington Park High School? և West High School?
Քաղաքացիություն	ԱՄՆ
Մասնագիտություն	դերասանուհի, մոդել, կինոդերասանուհի և հեռուստատեսային դերասանուհի
Ամուսին(ներ)	Նոել Մարշալ և Փիթեր Գրիֆիթ
Երեխա(ներ)	Մելանի Գրիֆիթ
Պարգևներ և մրցանակներ	Գենեզիսի մրցանակ Ոսկե Գլոբուս մրցանակ՝ տարվա նորահայտ դերասանուհի անվանակարգում և Հոլիվուդյան փառքի ծառուղու աստղ

Նատալի Քեյ «Թիպի» Հեդրեն (անգլ.՝ Nathalie Kay «Tippi» Hedren, հունվարի 19, 1930(1930-01-19)^[…], Նոր Ուլմ, Մինեսոտա, ԱՄՆ), ամերիկացի դերասանուհի և կենդանիների իրավունքների պաշտպանության ակտիվիստ։

Վաղ տարիներ

Նատալի Քեյ Հեդրենը ծնվել է 1930 թվականի հունվարի 19-ին Մինեսոտա նահանգի Նյու-Ալմ քաղաքում՝ Դորոտեա Հենրիետայի և Բերնարդ Կարլ Հեդրենի ընտանիքում։ Հայրական պապը Շվեդիայից գաղթել է ԱՄՆ, իսկ մոր նախնիները եղել են գաղթականներ Գերմանիայից և Նորվեգիայից։ «Թիփի» մականունը նա ստացել է դեռ մանկուց՝ հոր կողմից, որը Նատալի անունը համարել է երեխայի համար «շատ մեծահասակ»։

Կարիերա

Դեռ դեռահաս տարիքում Թիփի Հեդրենը մասնակցել է հագուստի խանութներում նորաձևության ցուցադրություններին։ Նրա ընտանիքը տեղափոխվել է Կալիֆոռնիա, երբ Հեդրենը դեռ սովորում էր միջնակարգ դպրոցում, իսկ 18 տարեկանում նա գնացել է Նյու Յորք, որտեղ էլ սկսվել է մոդելի նրա կարիերան։ 1950 թվականին նա ոչ մեծ դերով առաջնաելույթ է ունեցել կինոյում՝ «Փոքր աղջիկ» երաժշտական կատակերգությունում։ Հաջորդող տարիներին դադարել է ֆիլմերում նկարահանվել և 1950-1960 թվականներին մոդելային բիզնեսում հաջող կարիերա է ստեղծել։

1963 թվականին հեռուստաշոուներից մեկի ժամանակ նրան նկատել է Ալֆրեդ Հիչքոքը և հրավիրել է իր «Թռչուններ» ֆիլմում Մելանի Դենիելս դերը խաղալու, որը դերասանուհուն բերել է Ոսկե գլոբուս մրցանակ «Տարվա լավագույն սկսնակ դերասանուհի» անվանակարգում, իսկ նրա կերպարը՝ Մելանի Դենիելսը, ընդգրկվել Premiere ամսագրի «Բոլոր ժամանակների 100 մեծագույն կերպարներ» ցանկում։ Հետագայում Հեդրենը նկարահանվել է Հիչքոքի ևս մեկ ֆիլմում՝ «Մարնի» (1964) հոգեբանական թրիլլերում, որտեղ նրա խաղընկերն էր Շոն Քոներին։

Հիչքոքը Թիփի Հեդրենի թեկնածությունն էր դիտարկում նաև իր այլ ֆիլմերում, բայց դերասանուհին հրաժարվել է նրա հետ հետագա համագործակցությունից։ Դա հանգեցրել է այն բանին, որ հաջորդող տարիներին դերասանուհին գրեթե դադարել է նկարահանվել։ Հիչքոքը բարկացած էր նրա վրա, իսկ նրա դիրքը կինոմատոգրաֆիայում այդ տարիներին բավականին բարձր էր, և նրա կարծիքը հաշվի էին առնում շատ ռեժիսորներ։ 1960-ական թվականներին նրա մասնակցությամբ սակավաթիվ հայտնի ֆիլմերից է դարձել Չարլի Չապլինի «Կոմսուհին Հոնկոնգից» պատկերը, որտեղ նա կատարել է Մարտայի դերը։

1970-ական թվականներին Հեդրենը գրեթե չի նկարահանվել, իսկ 1980-ական թվականներին հաճախ հայտնվել է հեռուստատեսությունում, որտեղ դերեր է ունեցել «Հոթել», «Մութ կողմի հեքիաթներ», «Նա գրել է սպանություն», «Հանդուգներ և գեղեցիկներ», «4400» և այլ սերիալներում։

Անձնական կյանք

1952 թվականին Թիփ Հեդրենը ամուսնացել է դերասան և պրոդյուսեր Պիտեր Գրիֆիտի հետ։ 1957 թվականին նա լույս աշխարհ է բերել աղջկան՝ Մելանի Գրիֆիտին, որը, ինչպես մայրը, դարձել է դերասանուհի։ 1961 թվականին նրա ամուսնությունը Գրիֆիտի հետ ավարտվել է ամուսնալուծությամբ։ 1964 թվականին դերասանուհին ամուսնացել է իր գործակալ Նոել Մարշալի հետ, որը դարձել է նրա մասնակցությամբ երեք ֆիլմերի պրոդյուսեր, սակայն 1982 թվականին նրանք ամուսնալուծվել են։ Նրա երրորդ ամուսինը եղել է գործարար Լուիս Բարենեչին, որի հետ ապրել է 1985-1995 թվականների ընթացքում։ 2002 թվականին Թիփ Հեդրենը ամուսնացել է անասնաբույժ Մարտին Դինեսի հետ։

Ընտրյալ ֆիլմագրություն

Տարի		Հայերեն անվանում	Բնօրինակ անվանում	Դեր
1963	ֆ	Թռչուններ	The Birds	Մելանի Դենիելս
1964	ֆ	Մարնի	Marnie	Մարնի Էդգար
1967	ֆ	Կոմսուհին Հոնկոնգից	A Countess From Hong Kong	Մարտա
1988	ս	Հոթել	Hotel	Բարբարա Լայման
1990-1991	ս	Հանդուգներ և գեղեցիկներ	The Bold and the Beautiful	Հելեն Մաքլեյն
1992	հֆ	Մարդասպանի աչքերով	Through the Eyes of a Killer	Միսիս Բելանո
1998	ս	Չիկագոյի հույսը	Chicago Hope	Ալֆրեդա Փարքինգ
2006	ս	4400	The 4400	Լիլի Մուր Թայլեր

Մրցանակներ

• 1963 — Ոսկե գլոբուս մրցանակ՝ լավագույն սկսնակ դերասանուհի անվանակարգում («Թռչուններ»)