Էրիկա Հես

Վիքիպեդիայից՝ ազատ հանրագիտարանից
Jump to navigation Jump to search
Էրիկա Հես
Անձնական տեղեկություն
Սեռ`իգական
Ամբողջական անուն`գերմ.՝ Erika Hess
Մասնագիտացում`լեռնադահուկորդ
Երկիր`Flag of Switzerland.svg Շվեյցարիա
Ծննդյան ամսաթիվ`մարտի 6, 1962(1962-03-06) (57 տարեկան)
Ծննդավայր`Վոլֆենշիսեն, Նիդվալդեն

Էրիկա Հես (գերմ.՝ Erika Hess, մարտի 6, 1962(1962-03-06), Վոլֆենշիսեն, Նիդվալդեն), շվեյցարացի լեռնադահուկորդուհի, սլալոմի, հսկա սլալոմի և համակցված ձևի մասնագետ: Շվեյցարիայի լեռնադահուկային սպորտի հավաքականի անդամ է եղել 1978-1987 թվականներին: Լեյք Փլեսիդի Ձմեռային օլիմպիական խաղերի բրոնզե մեդալակիր է, աշխարհի վեցակի չեմպիոն: Երկու անգամ դարձել է աշխարհի գավաթակիր ընդհանուր հաշվում:

Կենսագրություն[խմբագրել | խմբագրել կոդը]

Էրիկա Հեսը ծնվել է 1962 թվականի մարտի 6-ին Նիդվալդեն կանտոնի Վոլֆենշիսեն կոմունայում (Շվեյցարիա): Առաջին անգամ դահուկով սահել է 4 տարեկանում, 6 տարեկանում արդեն երկու անգամ ոտքը կոտրել է թեքությունից ընկնելու պատճառով: Մանկությունն անցել է ընտանեկան ֆերմայում, ծնողներին օգնել է տնտեսության գործերում, ամենօրյա աշխատանքի շնորհիվ զգալիորեն մեծացրել է ֆիզիկական ուժը:

1978 թվականի հունվարին՝ 15 տարեկան հասակում, արդեն ընդգրկվել է Շվեյցարիայի ազգային հավաքականի մշտական կազմում և նորամուտը կատարել Աշխարհի գավաթի խաղարկությունում: 1979 թվականի դեկտեմբերին առաջին անգամ բարձրացել է աշխարհի առաջնության պատվո հարթակին:

Մի շարք անգամներ հաջող ներկայանալու շնորհիվ արժանացել է երկիրը 1980 թվականի Ձմեռային օլիմպիական խաղերում ներկայացնելու պատվին, որտեղ հսկա սլալոնում վերջնակետին չի հասել, իսկ սովորական սլալոմում զբաղեցրել է երրորդ տեղը և նվաճել օլիմպիական բրոնզե մեդալ՝ առաջ թողնելով գերմանացի Քրիստա Քինսհոֆերին և Լիխտենշտայնի ներկայացուցիչ Հաննի Վենցելին:

1981 թվականի հունվարին Հեսն առաջին անգամ դարձել է աշխարհի գավաթակիր, և այդ պահից սկսվել է նրա հաղթական երթը, որը տևել է 1980-ական թվականների գրեթե ողջ ընթացքում: Այդ ընթացքում շվեյցարացի մարզիկն ընդհանուր առմամբ 31 անգամ հաղթել է աշխարհի առաջնության փուլերում, 76 անգամ գրավել մրցանակային տեղ և 146 անգամ ներառվել ուժեղագույնների տասնյակում: Չորս անգամ արժանացել է Բյուրեղապակե գլոբուսի սլալոմից, մեկ անգամ համակցված ձևից, երկու անգամ հաղթել է Աշխարհի գավաթի ընդհանուր վիճակագրությունում[1]:

1982 թվականին Շլադմինգում կայացած աշխարհի առաջնությունում հաղթել է բոլոր երեք ձևերում, որոնց մասնակցել է՝ սլալոմ, հսկա սլալոմ և համակցված:

1984 թվականին Շվեյցարիան ներկայացրել է Սարաևոյի Օլիմպիական խաղերում, որտեղ բացման արարողության ժամանակ եղել է դրոշակակիր, սակայն մրցանակի չի արժանացել. սլալոմում գրավել է 5-րդ տեղը, հսկա սլալոմում՝ յոթերորդ:

1985 թվականի Բորմիոյի աշխարհի առաջնության ժամանակ համակցված ձևից նվաճել է ոսկե մեդալ: Հաղթանակի հնարավորություն է ունեցել նաև սլալոմում, առաջին փորձից հետո գնացել է առաջինը, սակայն երկրորդը չի ավարտել:

1987 թվականի աշխարհի առաջնությունում լավագույնն էր սլալոմ և համակցված ձևերում, այդպիսով՝ վեցերորդ անգամ դարձել է լեռնադահուկային սպորտի աշխարհի չեմպիոն: Այդ մրցաշրջանի ավարտին՝ 25 տարեկանում, որոշել է ավարտել պրոֆեսիոնալ մարզուհու կարիերան:

Հետագայում զբաղվել է մարզական ճամբարների ու Շվեյցարիայի տարածքում լեռնադահուկային սպորտի մրցումների կազմակերպմամբ: Ամուսնու և երեք երեխաների հետ ապրում է Սեն-Լեժիե-Լա-Շիեզ կոմունայում:

Նրա փոքր քույրը՝ Մոնիկա Հեսը, նույնպես հայտնի լեռնադահուկորդուհի է:

Ծանոթագրություններ[խմբագրել | խմբագրել կոդը]

  1. Ski-db.com – results – Erika Hess – accessed 2010-03-13

Արտաքին հղումներ[խմբագրել | խմբագրել կոդը]

  • Էրիկա Հես – օլիմպիական վիճակագրությունը Sports-Reference.com կայքում (անգլ.)
  • Էրիկա Հես – վիճակագրությունը FIS կայքում