Զբոսաշրջությունը Ռուսաստանում

Վիքիպեդիայից՝ ազատ հանրագիտարանից
Jump to navigation Jump to search

Զբոսաշրջությունը Ռուսաստանում (ռուս.՝ Туризм в России), Ռուսաստանի Դաշնության տնտեսության կարևորագույն ճյուղերից մեկը: Ռուսաստանը պետություն է Եվրասիայում՝ Եվրոպայի արևելյան և Ասիայի հյուսիսային հատվածում։ Ըստ զբոսաշրջային համաշխարհային կազմակերպության՝ Ռուսաստանը զբոսաշրջության ցուցանիշներով աշխարհի առաջատար երկրներից մեկն է:

Ըստ 2014 թվականի տվյալների՝ ընդունած զբոսաշրջիկների թվով աշխարհում գրավում է 9-րդ տեղը[1]՝ Ֆրանսիայից, Ամերիկայի Միացյալ Նահանգներից, Իսպանիայից, Չինաստանից, Իտալիայից, Թուրքիայից, Գերմանիայից և Մեծ Բրիտանիայից հետո։

Ամեն տարի Ռուսաստան է այցելում շուրջ 28 միլիոն զբոսաշրջիկ, ովքեր երկրում ներդնում են ավելի քան 11 միլիարդ ամերիկյան դոլար:

Ռուսաստանը հարուստ բնական և մշակութային ժառանգություն ունեցող երկիր է: Այստեղ կան ՅՈւՆԵՍԿՕ-ի Համաշխարհային ժառանգության 26 օբյեկտ[2]: Ռուսաստանի կարևոր զբոսաշրջային կենտրոններ են մայրաքաղաք Մոսկվան, Կրասնոդարի և Ստավրոպոլի երկրամասերի առողջարաններն ու արևոտ լողափները, Կովկասի և Սիբիրի լեռնադահուկային հանգստավայրերը, ազգային պարկերը և բնական հարստությունները:

Ռուսաստանի գլխավոր զբոսաշրջային օբյեկտը մնում է մայրաքաղաք Մոսկվան: Մոսկվայի պատմական կենտրոնը Մոսկովյան Կրեմլն է։ Կրեմլի այցելությունը սահմանափակվում է թանգարանային վայրերով։ Արևելյան կողմից Կրեմլին միանում է մայրաքաղաքի ամենահայտնի հրապարակը՝ Կարմիր հրապարակը: Այն շրջապատված է մի շարք տեսարժանություններով, այդ թվում Ռուսաստանի գլխավոր խորհրդանիշ հանդիսացող Վասիլի Երանելու տաճարով:

Զբոսաշրջության զարգացման գործում կարևոր է նաև Ղրիմ թերակղզու դերը: 2014 թվականից այն մտնում է Ռուսաստանի Դաշնության կազմի մեջ: Որպես պետություն Ռուսաստանն առավել գրավիչ է Ուկրաինայի, Ղազախստանի, Տաջիկստանի, Լեհաստանի, Չինաստանի, ինչպես նաև Հայաստանի Հանրապետության քաղաքացիների համար:

Ռուսաստանի Դաշնության քաղաքացիների շրջանում տարածված ուղղություններ են համարվում Թուրքիայի Անթալիա և Եգիպտոսի Շարմ էլ Շեյխ քաղաքները:

Տե՛ս նաև[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]

  1. Աշխարհի ամենաշատ այցելվող պետությունները զբոսաշրջության բնագավառում, 2011 թվականի վիճակագրական տվյալներ
  2. ՅՈւՆԵՍԿՕ-ի Համաշխարհային ժառանգության օբյեկտների ցանկը Ռուսաստանի Դաշնության տարածքում, զբոսաշրջությունը Ռուսաստանում, երկրի տեսարժանությունները ՅՈւՆԵՍԿՕ-ի էջում