Դիլիջանի միջազգային դպրոց

Դիլիջանի միջազգային դպրոց անգլ.՝ United World College Dilijan
Տեսակ	գիշերօթիկ դպրոց
Կարգախոս	Բարև Դիլիջանի միջազգային դպրոց
Հիմնադրված է	2014
Աշակերտներ	650
Դասարաններ	11-12
Երկիր	Հայաստան
Տեղագրություն	Դիլիջան
Հասցե	7 Getapnya Street
Կայք	uwcdilijan.org

Դիլիջանի միջազգային դպրոց (անգլ.՝ United World College Dilijan, Dilijan International School), միջազգային համագործակցությամբ անգլիական միջին դպրոց և դպրոց-պանսիոն, Cambridge IGCSE* և IB Diploma* ակադեմիական ծրագրերով, Արևմուտքի և Արևելքի սահմանագծին՝ Դիլիջանում, Հայաստան։ Երևանից և Թբիլիսիից 1,5 ժամվա հեռավորության վրա, զբաղեցնում է ավելի քան 88 հեկտար հողատարածք, մասամբ Դիլիջանի ազգային պարկի ներսում։

Դպրոցի մասին

Քաղաքի համայնապատկերը

Դիլիջանի միջազգային դպրոցի նախագծի հիմնադիրներ են ռուսաստանաբնակ գործարար և բարերար Ռուբեն Վարդանյանը՝ տիկնոջ հետ։ Դպրոցի հոգաբարձուների խորհրդի անդամներն են կրթության ոլորտի և բիզնեսի ականավոր ներկայացուցիչներ ԱՄՆ-ից, Մեծ Բրիտանիայից, Ֆրանսիայից, Շվեյցարիայից, Ճապոնիայից։

Առաքելություն, նպատակ և խնդիրներ

Դիլիջան միջազգային դպրոցը հանդիսանում է ոչ կոմերիցիոն նախագիծ, որը շահույթ ստանալու նպատակ չի հետապնդում։ Այս նախագծի առաքելությունն է՝

1. Եվրոպայի և Ասիայի խաչմերուկին հիմնել ժամանակակից միջազգային դպրոց,
2. Միջազգային որակյալ կրթությունը դարձնել հասանելի երիտասարդների համար՝ անկախ ազգությունից և նրանց ծնողների ֆինանսական հնարավորություններից,
3. Սովորողներին տրամադրել բազմակողմանի կրթություն, որը կապահովի նոր հնարավորություններ նրանց համար,
4. Նախապատրաստել սովորողներին ընդունվելու համար աշխարհի լավագույն բուհեր
5. Ուսուցիչների և սովորողների միջև հաստատել լիարժեք երկխոսություն,
6. Սովորողների մեջ սերմանել մշտական ինքնակատարելագործման գիտակցում և ձգտում։

Դիլիջանի միջազգային դպրոցի հիմնական նպատակներն են՝

1. Հայաստանի կրթական համակարգի համար որակապես նոր կողմնորոշիչների սահմանումը,
2. Տարածաշրջանի սոցիալ-տնտեսական իրավիճակի բարելավումը,
3. Դիլիջանի բնապահպանական կայուն զարգացումը,
4. Դիլիջանի ենթակառուցվածքների վերանորոգմանը խթանելը և դրա հետագա զարգացմանը նպաստելը։

Տվյալ նախագծի հիմնական նպատակներին հասնելու համար սահմանվել են մարտավարական և ռազմավարական նպատակներ։

Դիլիջանի միջազգային դպրոցի ռազմավարական խնդիրներն են՝

1. Դիլիջան քաղաքի նոր գլխավոր հատակագծի և զարգացման հայեցակարգի մշակումը և հաստատումը՝ հաշվի առնելով քաղաքի նոր կարգավիճակը և ֆունկցիոնալ հնարավորությունները (միջազգային դպրոց, ԿԲ-ի շենքերի համալիր, հանգստյան գոտի),
2. Նոր ներդրողների ներգրավումը Դիլիջան,
3. Միջազգային ֆինանսավարկային կազմակերպությունների ներգրավումը տարածաշրջանի սոցիալ-տնտեսական զարգացման նախագծերին մասնակցելու համար։

Որպես մարտավարական խնդիրներ սահմանվել են՝

1. Նախագծի իրականացման համար անհրաժեշտ տարածքների սեփականատերերի ոչ կառուցողական մոտեցման խնդրի լուծումը,
2. Դպրոցի նախագծման և կառուցման համար միջազգային ստանդարտների օգտագործման հնարավորությունների համար իրավական մեխանզմների ստեղծումը, որոնք հիմնականում չեն համապատասխանում Հայաստանում գործող շինարարական նորմերին։

Կառույցներ

Դիլիջանի միջազգային դպրոցի ճարտարապետական նախագծի ընտրության համար հայտարարվել է միջազգային մրցույթ, որի արդյունքում ընտրվել է անգլիացի ճարտարապետ Թիմ Ֆլինի նախագիծը։ Հեղինակը տվյալ ճարտարապետական նախագծի հիմքում դրել է վերջին 20 տարում աշխարհի տարբեր երկրներում կառուցված 20 միջազգային դպրոց-կացարանների կառուցման ժամանակ օգտագործված առաջատար փորձը։

Դիլիջանի միջազգային դպրոցի շինությունների ընդհանուր հողատարածքը կազմում է շուրջ 87.1 հա, որից 67 հա 99 տարով վարձակալված է Դիլիջանի ազգային պարկից։

Կառուցապատման ենթակա տարածքը կազմում է 20,1 հա, որից ճարտարապետական նախագծի մեջ ընդգրկված են հետևյալ շինությունների կառուցումը՝ 8,1 հա կկառուցապատվի մինչև 2014 թվականը, իսկ 12 հա մինչև 2017 թվականը։

1. Դպրոցի հիմնական մասնաշենք (13,180 մ²)
2. Մարզական մասնաշենք (6300 մ²)
3. Տեխնիկական մասնաշենք (456 մ²)
4. Ավտոկայանատեղի (470 մ²)
5. Բժշկական կենտրոն (368 մ²)
6. Աշակերտների կացարան 1 (5000 մ²)
7. Աշակերտների կացարան 2 (5000 մ²)
8. Աշակերտների կացարան 3 (5000 մ²)
9. Աշակերտների կացարան 4 (5300 մ²)
10. Աշակերտների կացարան 5 (5750 մ²)
11. Մուլտիֆունկցիոնալ կենտրոն (2400 մ²)
12. Շենք 37 (445 մ²)
13. Մարզական մասնաշենքի օժանդակ տարածք (2200 մ²)
14. Արվեստի կենտրոն (5273 մ²)
15. Հիմնական դահլիճ (1990 մ²)
16. Անձնակազմի կացարան 1 (5000 մ²)
17. Անձնակազմի կացարան 2 (5000 մ²)

Կրթակական ծրագրեր

Ուսումնական պլան

Դիլիջանի միջազգային դպրոցում նախատեսվում է, որ ուսումնական տարին տևելու է 274 օր, իսկ հանգիստյան օրերը լինելու են 91 օր։ 13-14 տարեկան երեխաների կրթությունը նախատեսվում է կազմակերպել պարտադիր, հավելյալ և հարակից առարկաների տեսքով։

Պարտադիր առարկաներն են անգլերենը, օտար լեզուները, մաթեմատիկան և ընդհանուր գիտությունը, «Հայոց լեզու, գրականություն» առարկան Հայաստանի քաղաքացիների համար։

Հավելյալ առարկաներն են արվեստը, դիզայնը և տեխնոլոգիան, պատմությունը, աշխարհագրությունը։ Հարակից առարկաներն են թատերական արվեստը, ֆիզիկական կրթությունը և առողջապահությունը, երաժշտությունը և այլն։

Քննությունները անցկացվում են պարտադիր և հավելյալ առարկաներից։

Սովորողները պետք է առնվազն «B» մակարդակ ունենան անգլերենից և գերազանց մաթեմատիկայից։ Այդ քննությունները համապատասխանում են IGCSE կրթական ծրագրին անցում կատարելու ստանդարտներին համապատասխան։ Հայազգի սովորողները անցնում են նաև հայագիտական առարկաներ։

14-16 տարեկան երեխաների համար նախատեսվում է կրթությունը կազմակերպել The International General Certificate of Secondary Education (IGCSE) կրթական ծրագրին համապատասխան։ Բոլոր առարկաները խմբավորված են հետևյալ խմբերում՝ Լեզուներ, Հումանիտար առարկաներ, Մաթեմատիկա, Ստեղծագործական, Սոցիալական գիտություններ, Տեխնիկական և արհեստագործական։ Քննությունները կազմակերպվում են ամռանը։ Սովորողները պետք է առնվազն ապահովեն «B» մակարդակ անգլերենից և գերազանց մաթեմատիկայից, քննությունները կազմակերպվելու են դպրոցի intranet համակարգի միջոցով։

Պարտադիր առարկաներն են անգլերենը(որպես առաջին կամ երկրորդ լեզու), մաթեմատիկան, բնագիտությունը (կենսաբանություն, քիմիա, ֆիզիկա), օտար լեզուները (ֆրանսերեն կամ ռուսերեն)(սովորողները, իսկ հայազգի քաղաքացիների համար նաև «Հայոց լեզու.գրականություն», «Հայոց պատմություն» առարկաները, բացի այդ, նրանք, ովքեր պատրաստվում են դիմել հայկական բուհեր կարող են նույնպես ուսանել այդ առարկաները)։

Հավելյալ առարկաներն են՝ Արվեստը, հավելյալ օտար լեզուն, դիզայնը և տեխնոլոգիան, անգլիական գրականությունը, տնտեսագիտությունը, պատմությունը, աշխարհագրությունը, երաժշտությունը։ 16-19 տարեկանների ուսուցումը նախատեսվում է կազմակերպել IB կրթական ծրագրերին համապատասխան։ Բոլոր առարկաները խմբավորված են հետևյալ կերպ՝

• Խումբ 1 - Ռուսերեն, Հայերեն, Անգլերեն
• Խումբ 2 - Ռուսերեն, Անգլերեն, Ֆրանսերեն, Իսպաներեն-B
• Խումբ 3 - Պատմություն և տնտեսագիտություն, Էկոլոգիական համակարգեր և հասարակություն,
• Խումբ 4 – Կենսաբանություն, Քիմիա և Ֆիզիկա (Բարձր և ստանդարտ մակարդակ)
• Խումբ 5 – Մաթեմատիկա (տարբեր մակարդակների համար)
• Խումբ 6 – Արվեստ, Երաժշտություն, Թատրոն

Դիպլոմ (Հիմնական) - Գիտության Տեխնոլոգիա (Technology of science)(դասընթացը դասավանդելու են ավելի քան 17 ուսուցիչներ), CAS դասընթաց(Creativity, Actions and Service)։

Առարկաները բաժանվում են նաև բարձր մակարդակի (Higer level) և ստանդարտ մակարդակի (Standard level)։ Յուրաքանչյուր սովորող պետք է ունենա 3-ական բարձր և ստանդարտ մակարդակի դասընթացներ։ IB դիպլոմ ստանալու համար սովորողը պետք է հավաքի առնվազն 24 միավոր հնարավոր 45-ից։

Նախապատրաստական տարի (13-14 տարեկան)

• Նախա-IGCSE ծրագիր՝ անգլերենի, այլ օտար լեզուների և մաթեմատիկայի խտացված ուսուցում
• Լրացուցիչ առարկաներ՝ Կիրառական արվեստ, Հումանիտար գիտություններ, Գիտություն և տեխնոլոգիաներ՝ բազմազան տաղանդներ և հետաքրքրություններ զարգացնելու նպատակով
• Դասախոս-ուսանող դինամիկ համագործակցություն

IB Diploma (16-19 տարեկան)

Հիմնական հոդված՝ Բակալավրի Միջազգային Դիպլոմ ծրագիր

• Կրթական ակադեմիական խտացված և հավասարակշռված երկամյա ծրագիր ավարտական քննություններով, որոնք ուսանողին պատրոստում են համալսարանական ընդունելության

Բակալավրի Միջազգային Դիպլոմ ծրագիր, International Baccalaureate Diploma Programme (IBDP) երկամյա կրթական ծրագիր է, որն ուղղված է 16–19 տարեկան ուսանողներին ապահովելու, աշխարհի բազում համալսարանների կողմից ընդունելի և միջազգայնորեն որակյալ համարվող կրթություն՝ ընդունվելու բարձրագույն ուսումնական հաստատություն։ Այն մշակվել է 1960-ականների սկզբներին Ժնևում միջազգային մանկավարժների կողմից։ Վեցամյա փորձնական ծրագրի ավարտին, որն ավարտվեց 1975-ին ստեղծվեց երկլեզու դիպլոմ։

Cambridge IGCSE (14-16 տարեկան)

• Լավագույն նախապատրաստում՝ ավելի քան 125 երկրներում ընդունված կրթական ծրագիր
• Հիմնական ուսումնական դասընթացներ՝ անգլերեն, մաթեմատիկա, բնական գիտություններ և օտար լեզուներ
• Լրացուցիչ առարկաներ՝ արվեստ, երկրորդ օտար լեզու, դիզայն և տեխնոլոգիաներ, տնտեսագիտություն, պատմություն և աշխարհագրություն
• Խրախուսվում է ստեղծագործական մոտեցմամբ ուսուցումը՝ սովորել կատարելով։

Միացյալ Համաշխարհային Քոլեջներ

Հիմնական հոդված՝ Միացյալ Համաշխարհային Քոլեջներ

Միացյալ Համաշխարհային Քոլեջներ, United World Colleges (կամ UWC), կրթական շարժում, որը միավորում է 12 միջազգային դպրոցներ և քոլեջներ, 140 երկրների ազգային կոմիտեներ և մի շարք կարճաժամկետ կրթական ծրագրեր։

Արտադասարանական ուսուցում

Անգլերենի հարստացում

Անգլերենի խտացված ուսուցման ծրագիր բոլոր մակարդակների համար։

Տեսությունից պրակտիկա

Տեսական ուսուցումը ամրապնդվում է գործնական պարապմունքների միջոցով՝ օդերևութաբանություն,վերամշակում, այգեգործություն, բացօթյա կիրառական երկրաչափություն։

Մարզասրահային և բացօթյա սպորտ

Սպորտային զանազան պարապմունքներ, թե խմբակային, թե անհատական. ֆուտբոլ, բասկետբոլ, վոլեյբոլ, թենիս, լող, ձիավարություն և այլն։

Ակումբներ

քննարկումներ, շախմատ, լեռնագնացություն, արշավներ,

Կիրառական արվեստ

Երաժշտություն, պարարվեստ, բեմական արվեստ, կիրառական արվեստ Հայաստանի լավագույն մշակութային կենտրոններից մեկում։

Դիլիջանի ազգային պարկ

Բացօթյա սպորտային պարապմունքներ և գիտա-փորձարարական պարապմուքներ արգելոցում։

Պատկերասրահ

• 
  Գլխավոր մուտք
• 
  Ակադեմիական մասնաշենքի կողքից
• 
  Գլխավոր մասնաշենքի ներսում
• 
  Ակադեմիական և ժամանցի կառույցների միջև եղած ճանապարհ
• 
  Ժամանցի մասնաշենք
• 
  Խաղադաշտ և կացարաններ
• 
  Խաղադաշտ և կացարաններ
• 
  Խաղադաշտ և կացարաններ
• 
  Խաղադաշտ և կացարաններ
• 
  Շենքի մեջ գտնվող խաղադաշտ
• 
  Լողավազան
• 
  Լողավազան
• 
  Բնակելի թաղամաս
• 
  Բնակելի թաղամասը տեղակայված է գետի երկայնքով

Արտաքին հղումներ

• Դիլիջանի միջազգային դպրոցի կայք
• Ռուբեն Վարդանյան. «Բարգավաճման մոդելը պահանջում է կամք, հավակնություններ և ռիսկ»
• Ինչպես Հայաստանում ապագայի դպրոց բացեցին, ռուսերեն Արխիվացված 2014-10-22 Wayback Machine

Վիքիպահեստն ունի նյութեր, որոնք վերաբերում են «Դիլիջանի միջազգային դպրոց» հոդվածին։