Գիշերային դետք (կտավ)

Վիքիպեդիայից՝ ազատ հանրագիտարանից
Jump to navigation Jump to search
Picto infobox artiste.png
Գիշերային դետք
հոլ.՝ Nachtwacht
The Nightwatch by Rembrandt - Rijksmuseum.jpg
տեսակգեղանկար[1]
նկարիչՌեմբրանդտ
տարի1642
բարձրություն363
լայնություն437
ուղղությունբարոկկո
ժանրschutterstuk?
նյություղաներկ, կտավ
գտնվում էNightwatch hall?
հավաքածուՊետական թանգարան և Ամստերդամի պատմական թանգարան
սեփականատերԱմստերդամ
հիմնական թեմաThe civic militia lead by Frans Banninck Cocq?
http://am.adlibhosting.com/amonline/details/collect/38543, https://www.wga.hu/html/r/rembran/painting/group/night_w0.html, https://www.wga.hu/html/r/rembran/painting/group/night_wb.html, https://www.wga.hu/html/r/rembran/painting/group/night_wc.html, https://www.wga.hu/html/r/rembran/painting/group/night_wd.html, https://www.wga.hu/html/r/rembran/painting/group/night_we.html, https://www.wga.hu/html/r/rembran/painting/group/night_w.html կայք
The Night Watch Վիքիպահեստում

Գիշերային դետք (հոլ.՝ Nachtwacht), Ռեմբրանդտի կտավը՝ ստեղծված 1642 թվականին։ Կտավը հանրությանն առավել հայտնի է «Գիշերային դետք» անունով, մինչդեռ իսկական անվանումն է «Կապիտան Ֆրանս Բանինգ Կոկի և լեյտենանտ Վիլեմ վան Ռյոյտենբյուրգի նետաձիգների խմբի դետքը»:

Պատմություն[խմբագրել | խմբագրել կոդը]

Կտավի կրկնօրինակ, Հերիտ Լյունդսեն. երևում է բնօրինակից բացակայող մասը

Կտավը պատվիրել է Նիդեռլանդների՝ նետաձիգների ընկերությունը, որը ցանկանում էր զարդարել իր նոր շենքը վեց գնդերի խմբային նկարներով։ Ռեմբրանդտին նկարը պատվիրել է կապիտան Ֆրանս Բանինգ Կոկի գունդը՝ դրա դիմաց վճարելով 1.600 ֆլորին։

18-րդ դարում նկարը բոլոր կողմերից կտրել են, որ տեղավորվի նոր սրահում։ Ամենից շատ տուժել է նկարի ձախ մասը, որտեղից «պակասել» են երկու նետաձիգներ։ Պահպանվել է 17-րդ դարի կրկնօրինակ (Հերիտ Լյունդենս, Լոնդոնի ազգային պատկերասրահ), որից կարելի է պատկերացում կազմել նկարի ոչնչացված մասի վերաբերյալ[2]:

Այժմ կտավը պահպանվում է Ամստերդամի պետական թանգարանում (Rijksmuseum) : Չնայած այն բանին, որ կտավի մի մասը չի պահպանվել, այն թանգարանի ամենամեծ նկարներից է (363 × 437 սմ)։ Ինչպես Ռեմբրանդտի գործերի մեծ մասը, կտավին ավելի լավ է նայել հեռավորությունից։

Կտավը երեք անգամ ենթարկվել է վնասման ու ոչնչացման[3]: Առաջին անգամ կտրվել է կտավի մի մասը, երկրորդ անգամ դանակով հարվածել են տասն անգամ, իսկ երրորդ անգամ նրա վրա ծծմբական թթու են լցրել։

Նկարի հանելուկները[խմբագրել | խմբագրել կոդը]

«Գիշերային դետք», հատված

Ռեմբրանդտը շատ հաջող կոմպոզիցիա է գտել. նետաձիգները դուրս են գալիս կամարակապ մութ բակից արևով ողողված հրապարակ։ Ակնհայտ է լույսի և ստվերի խաղը, ինչը բնորոշ է մեծ նկարչի ոճին։

Ռեմբրանդտը շրջանցել է կանոնը, որի համաձայն՝ նկարը պետք է պատկերի ստատիկ, շքեղ դիմանկար։ Նա պատկերել է այն պահը, երբ կապիտան Կոկը հրաման է տվել լեյտենանտ Ռյոյտենբուրգին. այդ պահից էլ ամեն ինչ դրվել է շարժման մեջ։ Նետաձիգը պտտում է նշանը, թմբկահարը թմբուկ է զարկում, նրա վրա հաչում է շունը, տղան փախչում է։ Նկարում շարժվում են անգամ նետաձիգների շորերի պատառները։

Նկարչի երկրորդ նորամուծությունն այն է, որ բացի 18 պատվիրատուներից՝ պատկերված են ևս 16 կերպարներ։ Բացատրելի է միայն թմբկահարի հայտնվելը, որը չի եղել նետաձիգների գնդում. չի եղել, բայց կարող էին վարձել շքերթին մասնակցելու համար։ Մյուս կերպարների, նրանց հետ կապված խորհրդանիշերի առկայությունը տասնյակ հարցեր է առաջացնում հետազոտողների շրջանում, որոնց ճիշտ պատասխանը գիտեր միայն ինքը Ռեմբրանդտը։

Ամենահանելուկայինը ոսկեգույն զգեստով աղջկա կերպարն է։ Գեղարվեստական առումով նա պատկերված է ոսկե հատման տեղում՝ նկարի ձախ հատվածում. նա կարծես մեղմացնում է աջում պատկերված Ռյոյտենբյուրգի վառ հագուստը։ Աղջիկը շրջապատված է խորհրդանիշերով, որոնք ավանդաբար վերագրվում են հրացանակիրներին։ Գոտուն ամրացված են ատրճանակ և հավ (կամ աքաղաղ), իսկ ձախ ձեռքում գինի խմելու պոզ է։ Աղջկան ամենամոտ հրացանակրի գլխարկին կաղնու տերևներ են։ Շատ արվեստագետներ աղջկան համարում են ջոկատի թալիսմանը: Կա նաև վարկած, որ նկարում պատկերված աղջկան նա նմանեցրել է իր լուսահոգի կնոջը` Սասկիային,և այդ կերպ փորձել է մխիթարություն գտնել։Սակայն հանելուկները, միևնույն է, բազմաթիվ են։ Հոլանդերենում կլովենիր բառը (կլովենը հրացանի տարատեսակ է) համահունչ է մի բառի, որ մագիլ է նշանակում։ Նետաձիգների խորհրդանիշ են հանդիսացել սովորաբար վայրի թռչունների և ոչ թե հավերի ճանկերը։ Ի վերջո, ո՞վ է աղջիկը, ի՞նչ է անում նա նետաձիգների շրջանում, ինչու՞ է կրում ատրճանակ և բռնել հավ։ Անգլիացի ռեժիսոր Փիթեր Գրինվեյը (անգլ.՝ Peter John Greenaway), որ այս նկարի թեմայով երկու ֆիլմ է նկարահանել, 180 այսպիսի հարց է առաջադրում։

Նկարի ռենտգենային պատկերները ցույց են տվել, որ նկարի վերափոխումները ամենից ավելի առնչվել են Ռյոյտենբուրգի կերպարին և նրա նիզակին, որով տրված էր շարժման ուղղությունը։

Հնարավոր է, որ Ռեմբրանդտը նկարում պատկերել է իրեն Յան Օկերսենի աջ կողմում, գլխարկով նետաձիգի կերպարում։

Գիշերայի՞ն, թե՞ ցերեկային դետք[խմբագրել | խմբագրել կոդը]

«Գիշերային դետք», կրկնօրինակ: Սպիտակ գծերով մատնանշված են բնօրինակի կտրված մասերը

Նկարի ստեղծումից անմիջապես հետո այն տեղադրվել է նետաձիգների ընկերության շենքում։ Հետագա երկու դարերի ընթացքում այն կախված է եղել տարբեր սրահներում և արվեստագետների կողմից հայտնաբերվել է 19-րդ դարում միայն, երբ Ռեմբրանդտի նկատմամբ նոր հետաքրքրություն է դրսևորվել։ Քանի որ թվացել է, որ կերպարները հանդես են գալիս մուգ ֆոնին, այն անվանել են «Գիշերային դետք»: Հենց այդ անունով էլ կտավը մտել է համաշխարհային կերպարվեստի գանձարան։ 1947 թվականին՝ նկարի վերականգնման աշխատանքների ժամանակ, պարզվել է, որ կտավը մի քանի անգամ պատվել է լաքով, որից մգացել է։ Նկարի ֆոնի մգացմանը նպաստել է նաև այն սրահի բուխարու ծուխը, որտեղ կախված է եղել կտավը երկար տարիներ։ Բնօրինակը վերականգնելուց հետո վերջնականապես պարզվել է, որ կտավում պատկերված է ցերեկային տեսարան։ Կապիտան Կոկի ձախ ձեռքի ստվերը ցույց է տալիս, որ գործողությունները կատարվում են ցերեկային ժամերի՝ 14:00-ի շրջանում։

Կերպարներ[խմբագրել | խմբագրել կոդը]

«Գիշերային դետքի» 3D կերպարները պետական թանգարանի առաջ, Ամստերդամ
  • Կապիտան Ֆրանս Բանինկ Կոկ (Frans Banninck Cocq 1605—1655) - կենտրոնում, կարմիր ամրակապով սև հագուստով։
  • Լեյտենանտ Վիլեմ վան Ռյոյտենբյուրգ (William van Ruytenburch 1600—1657) - կենտրոնում, սպիտակ ամրակապով, ոսկեգույն հագուստով։
  • Նետաձիգ Յան Վիսեր Կորնելիսեն (Jan Visscher Cornelisen 1610—1650) - կրծքանշանով։
  • Սերժանտ Ռեյնիր Էնգելեն (Reijnier Engelen 1588—1651) - նստած է կամրջի հողապատնեշին։
  • Սերժանտ Ռոմբաուտ Քեմփ (Rombout Kemp 1597—1653) - մեկնել է ձեռքը։
  • Հարմեն Յակոբսեն Վորմսկերկ (Harmen Jacobsen Wormskerck 1590—1653) - վահանով։
  • Էլբերտ Վիլեմսզոն Սվեդենռեյք (Elbert Willemszn Swedenrijck 1589—1644) - Հարմենի հետևում։
  • Կլաս վան Կրոյսբերգեն (Claes van Cruijsbergen 1613—1663) - Էլբերտից աջ։

Նիզակավորներ

  • Յան Ադրիանսեն Կեյզեր (Jan Adriaensen Keijser 1594—1664) - Կոկի և Ռյոյտենբյուրգի միջև։
  • Յան Պետերսեն Բրոնկհորստ (Jan Pietersen Bronchorst 1587 — после 1666) - հողապատնեշի հետևում։
  • Թմբկահար Յակոբ Յորիսզոն (Jacob Joriszn 1591—1646)։
  • Յակոբ Դիրկսեն դե Ռոյ (Jacob Dircksen de Roy 1601—1659)։
  • Յան Բրյուգման (Jan Brughman)։

Գնդի անդամների անուններով վահանը նկարվել է Ռեմբրանդտի մահից հետո։

Հիշատակումներ արվեստում[խմբագրել | խմբագրել կոդը]

Կինո[խմբագրել | խմբագրել կոդը]

  • «Գիշերային դետք» («Night Watch») ֆիլմի հիմքում ընկած են նկարի առևանգումն ու նրա որոնողական աշխատանքները (1995)։ Գլխավոր դերում՝ Փիրս Բրոսնան[4]:
  • Նկարի պատմությանն են նվիրված Փիթեր Գրինվեյի երկու ֆիլմեր՝ «Գիշերային դետք» (2007) և «Ռեմբրանդտ: Ես մեղադրում եմ» (2008)։

Երաժշտություն[խմբագրել | խմբագրել կոդը]

  • Նկարին է նվիրված King Crimson խմբի «The Night Watch» երգը (1974)։
  • Ayreon ռոք խմբի «The Shooting Company of Captain Frans B. Cocq» երգը կատարվում է կրծքանշանով նետաձիգի անունից՝ ներկայացնելով նկարի ստեղծումը։

Հետաքրքիր փաստեր[խմբագրել | խմբագրել կոդը]

  • Ամստերդամի պետական թանգարանի աշխատակիցները, որոշելով մասսայականացնել նկարը, 2013 թվականին «կենդանացրին» այն։ Նրանք ստեղծեցին ներկայացում՝ գործողությունները տեղափոխելով առևտրական մեծ կենտրոն[5]:
  • Թանգարանի սրահում, ուր ցուցադրված է կտավը, հատակին գորգ է փռված (մնացած բոլոր սրահներում մանրահատակ է)։ Դա արված է այն նպատակով, որ աշակերտները, գորգին նստելով, լսեն ուսուցչին։
  • Ռեմբրանդտի նորամուծությունները լիովին պատկերացնելու համար սրահներից մեկում այս թեմայով երեք նկարներ կան, որոնք, ի տարբերություն Ռեմբրանդտի նկարի, համապատասխանում են այն ժամանակների խմբանկարի բնորոշ հատկանիշներին։
  • Միայն Ռեմբրանդտի նկարն է պաշտպանական նկատառումներով առանձնացված։

Ծանոթագրություններ[խմբագրել | խմբագրել կոդը]

Արտաքին հղումներ[խմբագրել | խմբագրել կոդը]