Գագիկ Դավթյան (մանկավարժ)
Անվան այլ կիրառումների համար տե՛ս՝ Գագիկ Դավթյան (այլ կիրառումներ)- Վիքիպեդիայում կան հոդվածներ Դավթյան ազգանունով այլ մարդկանց մասին։
| Գագիկ Դավթյան | |
|---|---|
| Ծնվել է | 1910 |
| Ծննդավայր | Դիլիջան, Երևանի նահանգ, Կովկասի փոխարքայություն, Ռուսական կայսրություն |
| Մահացել է | անհայտ |
| Քաղաքացիություն |  Ռուսական կայսրություն և  ԽՍՀՄ |
| Մասնագիտություն | մանկավարժ |
| Կուսակցություն | ԽՄԿԿ |
| Պարգևներ և մրցանակներ |   և  |
Գագիկ Գաբրիելի Դավթյան (1910, Դիլիջան, Երևանի նահանգ, Կովկասի փոխարքայություն, Ռուսական կայսրություն - անհայտ), հայ մանկավարժ, Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) գործողությունների մասնակից։ ԽՄԿԿ անդամ (1944):
Կենսագրություն[խմբագրել | խմբագրել կոդը]
Գագիկ Դավթյանը ծնվել է 1910 թվականին, Դիլիջան քաղաքում։ Դեռ պատանեկության տարիներից գրել է բանաստեղծություններ, տպագրվել հանրապետական և շրջանային թերթերում։ Իջևանի գյուղատնտեսական տեխնիկումն ավարտելուց հետո ավարտել է նաև Դիլիջանի մանկավարժական տեխնիկումը և դարձել ուսուցիչ։ Եղել է Իջևանի Սարի գյուղի դպրոցի վարիչը։ Մանկավարժական աշխատանքը շարունակել է Սանահինում, ապա վերադարձել հայրենի քաղաք Դիլիջան և աշխատել տարբեր դպրոցներում[1]։
1941 թվականին Դավթյանը մեկնել է գործող բանակ։ Նրա մարտական ուղին հասել է մինչև Վիեննա։ Այդ ճանապարհին մի քանի անգամ վիրավորվել է և ապաքինվելուց հետո նորից շարունակել կռվել թշնամու դեմ։ Ռազմաճակատում, 1944 թվականին, Դավթյանը ընդունվել է կոմունիստական կուսակցության շարքերը։ Պարգևատրվել է Կարմիր աստղի շքանշանով, «Կովկասի պաշտպանության համար», «Սևաստոպոլի պաշտպանության համար» և այլ մեդալներով[1]։
Գերմանա-խորհրդային պատերազմի ավարտից հետո Դավթյանը զորացրվել է բանակից, վերադարձել է հայրենի քաղաք և շարունակել մանկավարժական աշխատանքը։ 1946 թվականին Դավթյանը ղեկավարել է Դիլիջանի նորաբաց երաժշտական դպրոցը։ 1948 թվականից սկսած մինչև 1970 թվականն աշխատել է Դիլիջանի հանրակրթական դպրոցներում, դասավանդում ռազմագիտություն, աշխատանքի ուսուցում, իսկ ցածր դասարաններում՝ նաև մայրենի լեզու և գրականություն։ Մանկավարժական աշխատանքին զուգընթաց Դավթյանը բազմամյա գործունեություն է ծավալել նաև թատրոնում՝ դառնալով արվեստի երկրպագու և անխոնջ մշակ։ Հետագայում վարել է մի շարք պատասխանատու պաշտոններ։ Նրա ղեկավարությամբ թատրոնի կոլեկտիվը մասնակցել է մի շարք փառատոների և գրավել մրցանակային տեղեր, իսկ ինքը նվաճել է դափնեկրի կոչում և արժանացել արծաթե մեդալի[1]։
Պարգևներ[խմբագրել | խմբագրել կոդը]
- Կարմիր աստղի շքանշան
- «Կովկասի պաշտպանության համար» մեդալ
- «Սևաստոպոլի պաշտպանության համար» մեդալ