Բաթումի հնագիտական թանգարան

Բաթումի հնագիտական թանգարան
Տեսակ	հնագիտական թանգարան
Երկիր	Վրաստան
Տեղագրություն	Բաթում
Վայր	Բաթում
Հիմնադրվել է	1994

Բաթումի հնագիտական թանգարանей (վրաց.՝ ბათუმის არქეოლოგიური მუზეუმი), Վրաստանի ամենահին հնագիտական թանգարանը, որը գտնվում է Բաթում քաղաքում։ Տեղակայված է Իլյա Ճավճավաձե 77 հասցեում։

Պատմություն[խմբագրել | խմբագրել կոդը]

Աջարիայում հնագիտական պեղումներ իրականացվել են դեռ հարյուր տարի առաջ, սակայն հայտնաբերված գտածոները լայն հասարակությանը ներկայացվել են միայն 1994 թվականին^[1]։

Ներկայումս թանգարանի հավաքածուում պահվում է շուրջ 22800 ցուցանմուշ^[2] և եզակի գտածոներ Աջարիայի ողջ տարածքից։ Դրանց թվում են մետաղադրամները, պատմական տարբեր ժամանակների կավե, ապակե, ոսկե և բրոնզե սպասք, հռոմեական արձաններ, դրոշմադիր սրբապատկերներ, խաչեր, ուղղափառ տարբեր տաճարներից Սբ․ Գևորգի ռելիեֆային պատկերներ, Հերմեսի, Աֆրոդիտեի և Էրոսի պատկերներով հունական դրոշմակնիքներ, որոնք պատրաստվել էին Հունաստանի լավագույն վարպետների կողմից, ինչպես նաև այլ ցուցանմուշներ։

2014 թվականին թանգարանը վերակառուցվել է։ Նույն տարում այցելուներին ներկայացվել է թանգարանի «ոսկե ֆոնդը» (ոսկեդրամներ և զարդեր)^[3]։

Բացի հիմնական ցուցադրությունից, թանգարանում գործում է նաև ռեստավրացիոն լաբորատորիա, որտեղ գրաֆիկորեն և լուսանկարների միջոցով ֆիքսվում են թանգարանի ֆոնդերում առկա ցուցանմուշները։ Թանգարանի կազմում առկա են նաև ֆոտոարխիվ և գիտական գրադարան։

Ցուցադրություն[խմբագրել | խմբագրել կոդը]

Թանգարանի շենքի երկրորդ հարկում ներկայացված են քարե (Աշելյան մշակույթ) և երկաթի դարերին թվագրվող ցուցանմուշներ։ Հավաքածուի մեծ մասը Կոլխիդայի մշակույթի ցուցանմուշներ են։

Թանգարանի առաջին հարկում ներկայացված են անտիկ, վաղ և ուշ միջնադարի ցուցադրանմուշներ, որոնք հայտնաբերվել են Աջարիայի անտիկ և միջնադարյան ամրոցների պեղումներից, հատկապես Պիչվնարի քաղաքատեղիի պեղումների ժամանակ, ինչպես նաև կոլխերի (մ․թ․ա․ V դար), հունական (մ․թ․ա․ V—IV դարեր) և հելենական դամբարաններում (մ․թ․ա․ IV—III դարեր)։ Ներկայացված է անտիկ ժամանակաշրջանի հունական և հռոմեական սպասք։ Գոնիոյի բերդի պեղումներից հայտնաբերվել են հունական և հռոմեական մետաղադրամներ (այդ թվում նաև, այսպես կոչված, «Գոնիոյի գանձ» տեղանքից։ Հնագետների կողմից հայտնաբերվել է Գոնիոյի բերդի պարիսպներից մեկի մոտից)։ Բացի այդ, հավաքածուում ներկայացված են հռոմեացիների պատկերներով քանդակային պատկերներ, ինչպես նաև հելենական Սերապիս աստծո պատկերով քանդակ, ապակե և բրոնզե սպասք ու հռոմեական զարդարանքներ։

Թանգարանի հավաքածուում գտնվում են նաև Խելվաչաուրից հայտնաբերված նմուշներ, որոնք վկայում են վաղ միջնադարում Աջարիայի և արաբական աշխարհի միջև առկա կապի մասին։