Արևիկ Ծերունյան
Արևիկ Ծերունյան | |
---|---|
Ծնվել է | օգոստոսի 6, 1987 (36 տարեկան) |
Ծննդավայր | Երևան, Հայկական ԽՍՀ, ԽՍՀՄ |
Քաղաքացիություն | ԽՍՀՄ, Հայաստան և ԱՄՆ |
Կրթություն | Վ․ Բրյուսովի անվան պետական համալսարան, Հայաստանի գեղարվեստի պետական ակադեմիա, Մարսելի միջազգային դիզայնի և արվեստի բարձրագույն դպրոց և Թաֆթսի համալսարան |
Մասնագիտություն | նկարչուհի և արվեստագետ |
Թեմաներ | գծանկար |
Արևիկ Վարդանի Ծերունյան (օգոստոսի 6, 1987, Երևան, Հայկական ԽՍՀ, ԽՍՀՄ), հայ նկարչուհի, արվեստագետ-էքսպերիմենտատոր։
Կենսագրություն[խմբագրել | խմբագրել կոդը]
Արևիկ Ծերունյանը ծնվել է 1987 թվականին, օգոստոսի 6-ին Երևանում։ Ավարտել է Երևանի պետական լեզվաբանական համալսարանը՝ ստանալով անգլերեն, իսպաներեն և մանկավարժություն մասնագիտությամբ բակալավրի աստիճան և Երևանի գեղարվեստի պետական ակադեմիան՝ ստանալով կերպարվեստի մագիստրոսի աստիճան։ Եղել է փոխանակային ծրագրի ուսանող Ֆրանսիայում՝ Մարսելի կերպարվեստի բարձրագույն դպրոցում։ Գեղարվեստի ակադեմիայում ուսանելու ընթացքում Արևիկը կենտրոնանում է նկարչության և գեղանկարչության վրա՝ մասնագիտանալով արևմտյան իմպրեսիոնիզմի և հայկական պոստիմպրեսիոնիզմի ոճերում, կոնստրուկտիվիզմի և հետխորհրդային գեղարվեստական շարժումների խառնուրդում՝ կրելով ռուսական ավանդական ակադեմիական դպրոցի ազդեցությունը։ Մագիստրատուրայի երկրորդ տարում նրան հանձնարարվել է նկարազարդել Բուլղարական հեքիաթների ժողովածուի հայերեն թարգմանությունը, որը հրատարակվել է հաջորդ տարում։
2013-2015 թվականներին սովորել է Թաֆթս համալսարանին կից Բոստոնի կերպարվեստի թանգարանի դպրոցում (Թաֆթս-ԷսԷմԷֆԷյ), որի ընթացքում Արևիկը սկսել է ուսումնասիրել այլ արտահայտչամիջոցներ՝ ստեղծելով կոլաժի, քանդակագործության և նորաձևության նոր գործեր՝ ցուցադրելով մեծածավալ ինստալյացիաներ[1]։
Մագիստրատուրան ավարտելուց հետո Արևիկը ստացել է հետավարտական դասավանդման դրամաշնորհ, որով կազմել և դասավանդել է «Գծանկարի տեխնիկայի ներածություն» առարկան։ Զուգահեռաբար աշխատել է որպես համադրողի օգնական և ցուցադրել «Կորուսյալ կայսրություն» տարածական ինստալյացիայի անհատական ցուցադրություն-շոուն Բոստոնում՝ Ամերիկայի հայկական թանգարանում։
2016 թվականին վերադառնալով Հայաստան՝ Արևիկն աշխատել է «Դանիելյան» արվեստի ստուդիայում՝ որպես մանկավարժ-դասավանդող։ 2016 թվականի դեկտեմբերի 24-25-ին Հայաստանի նկարիչների միությունում տեղի է ունեցել Արևիկի ցուցահանդեսը «Տեռոր» խորագրով (կոլաժ, 2D և 3D ինստալյացիաներ)[2]։ 2016 թվականին Ավետիք Իսահակյանի անվան կենտրոնական գրադարանում կայացել է Արևիկի «Կորուսյալ կայսրություն» խորագիրը կրող աշխատանքների ֆոտոցուցահանդեսը՝ նվիրված Հայոց Ցեղասպանության 101-րդ տարելիցին[3][4]։
2017 թվականին Արևիկին շնորհվել է O1 արտոնագիր (ԱՄՆ Պետքարտուղարության բնորոշմամբ՝ «արտակարգ ունակությունների համար»՝ աշխատելու Ամերիկայի հայկական թանգարանում՝ որպես ռեզիդենտ-նկարիչ։ Այդ ընթացքում Արևիկն իրականացրել է արվեստի մի շարք նախագծեր, այդ թվում՝ 2018 թվականի հոկտեմբերի 23-ին և 2019 թվականի ապրիլի 20-ին՝ Ամերիկայի հայկական թանգարանում անհատական «Ամպեր» ցուցահանդես-շոուն։ «Ամպերն» իրենից ներկայացնում է մուլտիմեդիա ինստալյացիա՝ բաղկացած հայկական ասեղնագործ ժանյակների վրա տեսապրոյեկցիաների և կոլաժի համադրումից։ 2017 թվականի հուլիսից Արևիկը Բոստոնում վարում է մանկապատանեկան արվեստի դպրոց։
2018 թվականի մայիսին Արևիկը կազմակերպել է անհատական ցուցադրություն Մասաչուսեթսի տեխնոլոգիական ինստիտուտում՝ որպես Հայոց ցեղասպանության զոհերի հիշատակին նվիրված արարողության մաս։ Նույն թվականի հուլիսին Արևիկը մասնակցել է «Դիմադրություն և տոկունություն» խմբային ցուցադրությանը՝ 3 այլ հայ կին արվեստագետների հետ միասին։ Բոստոնի «Գալատեա» պատկերասրահում կազմակերպված ցուցադրությունը համակարգել է Մարշա Օդաբաշյանը[5]։
Ծանոթագրություններ[խմբագրել | խմբագրել կոդը]
- ↑ Mirror-Spectator, The Armenian (2016 թ․ մարտի 3). «Strange and Wonderful Dimensions at Armenian Museum Exhibit». The Armenian Mirror-Spectator (ամերիկյան անգլերեն). Վերցված է 2019 թ․ մարտի 23-ին.
- ↑ «Արևիկ Ծերունյան՝ «Տեռոր». վերաիմաստավորելով արժեզրկվող մարդկային կյանքը...». yelaket.am (անգլերեն). Վերցված է 2019 թ․ մարտի 23-ին.
- ↑ «ԿՈՐՈւՍՅԱԼ ԿԱՅՍՐՈւԹՅՈւՆ». Ճամփորդ (ռուսերեն). Վերցված է 2019 թ․ մարտի 23-ին.
- ↑ «Young Armenian artist holds Genocide-themed exhibition in Boston». www.tert.am (անգլերեն). Արխիվացված է օրիգինալից 2019 թ․ մարտի 23-ին. Վերցված է 2019 թ․ մարտի 23-ին.
- ↑ Arevik Tserunyan's THE LOST EMPIRE at the Armenian Museum of America
Արտաքին հղումներ[խմբագրել | խմբագրել կոդը]
- Օգոստոսի 6 ծնունդներ
- 1987 ծնունդներ
- Ապրող անձինք
- Երևան քաղաքում ծնվածներ
- ԵՊԼՀ շրջանավարտներ
- Թաֆթս համալսարանի շրջանավարտներ
- Անձինք այբբենական կարգով
- Նկարիչներ այբբենական կարգով
- Հայ նկարչուհիներ
- Երևանի գեղարվեստի պետական ակադեմիայի շրջանավարտներ
- 20-րդ դարի նկարչուհիներ
- 21-րդ դարի կին արվեստագետներ
- 21-րդ դարի նկարիչներ
- Հայ արվեստագետներ