Արտեմ Հարությունյան (բռնցքամարտիկ)

Արտեմ Հարությունյան
Անձնական տեղեկություն
Սեռ՝	արական
Մասնագիտացում՝	բռնցքամարտիկ
Երկիր՝	Գերմանիա
Ծննդյան ամսաթիվ՝	օգոստոսի 13, 1990 (33 տարեկան)
Ծննդավայր՝	Երևան, Հայկական ԽՍՀ, ԽՍՀՄ
Օլիմպիական խաղեր
Եվրոպայի առաջնություն

Արտեմ Հարությունյան (գերմ.՝ Artem Harutiunian, օգոստոսի 13, 1990(1990-08-13), Երևան, Հայկական ԽՍՀ, ԽՍՀՄ), հայկական ծագմամբ գերմանացի բռնցքամարտիկ, առաջին կիսամիջին քաշային կարգի ներկայացուցիչ։ Հանդես է եկել Գերմանիայի բռնցքամարտի հավաքականի կազմում 2010-ական թվականների կեսերին, 2016 թվականին Ռիո դե Ժանեյրոյում Օլիմպիական խաղերում նվաճել է բրոնզե մեդալ, դարձել Եվրոպայի առաջնության բրոնզե մեդալակիր, հաղթել ազգային ու միջազգային նշանակության մի շարք մրցույթներում։ 2017 թվականին սկսել է հանդես գալ պրոֆեսիոնալ մակարդակում։

Կենսագրություն[խմբագրել | խմբագրել կոդը]

Արտեմ Հարությունյանը ծնվել է 1990 թվականի օգոստոսի 13-ին Երևանում, սակայն վաղ տարիքում ընտանիքի հետ մշտական բնակության համար տեղափոխվել է Գերմանիա։ Մանկության տարիներին լրջորեն զբաղվել է թեքվոնդոյով, հաղթել այդ մարզաձևի Գերմանիայի պատանեկան առաջնությունում, 2005 թվականին դարձել Եվրոպայի պատանեկան առաջնության արծաթե մեդալակիր, ստացել սև գոտի և երկրորդ դան։ Սակայն հետո նա որոշել է զբաղվել բռնցքամարտով, նախապատրաստություն է անցել Շվերինի բռնցքամարտի սրահներից մեկում։

Սիրողական կարիերա[խմբագրել | խմբագրել կոդը]

Արտեմ Հարությունյանը սիրողական բռնցքամարտում իր առաջին հաջողությանը հասել է 2008 թվականին՝ նվաճելով բրոնզե մեդալ Օդերի Ֆրանկֆուրտում անցկացվող Բրանդենբուրգի գավաթի պատանեկան խաղարկությունում։

2011 թվականին առաջին անգամ հաղթել է Գերմանիայի չափահասների առաջնությունում՝ առաջին կիսամիջին քաշային կարգում։

Չափահասների մակարդակում իր առաջին հաջողությանն Արտեմ Հարությունյանը հասել է 2013 թվականի մրցաշրջանում, երբ ընդգրկվել է Գերմանիայի ազգային հավաքականի հիմնական կազմում և մասնակցել Մինսկում անցկացվող Եվրոպայի առաջնությանը, որտեղ արժանացել է բրոնզե մեդալի առաջին կիսամիջին քաշային կարգում։ Նույն թվականին Ալմա Աթայում անցկացվող աշխարհի առաջնությունում նա հասել է մինչև 1/8 եզրափակիչ, որտեղ պարտվել է բրազիլացի Էվերթոն Լոպիսին։ Այդ ժամանակից սկսած՝ նա պարբերաբար մասնակցել է Բռնցքամարտի համաշխարհային շարքի հանդիպումներին։

2014-2015 թվականներին Հարությունյանը բավական հաջողությամբ հանդես է եկել նորաստեղծ AIBA Pro Boxing լիգայում, որտեղ հաղթել է այնպիսի հայտնի բռնցքամարտիկների, ինչպիսիք են Բորիս Գեորգիևը, Աբդելքադեր Շադին ու Էվալդաս Պյատրաուսկասը, այնուամենայնիվ, նա երկու անգամ պարտվել է Ռուսաստանը ներկայացնող Արմեն Զաքարյանին և այդպես էլ չի կարողացել դառնալ չեմպիոն։

APB լիգայում ունեցած մի շարք հաջող ելույթների շնորհիվ Արտեմ Հարությունյանը իրավունք է նվաճել ներկայացնելու Գերմանիան Ռիո դե Ժանեյրոյում անցկացվող Ամառային օլիմպիական խաղերում։ Մինչև 64 կգ քաշային կարգում նա բարեհաջող կերպով անցել է առաջին երկու հակառակորդներին, սակայն կիսաեզրափակչում կայացած երրորդ մարտում նա 0:3 հաշվով պարտվել է ադրբեջանցի Լորենսո Սոտոմայորին և արժանացել օլիմպիական բրոնզե մեդալի։ Այդ ձեռքբերման համար նա մրցաշրջանի արդյունքում պարգևատրվել է Արծաթե դափնետերևով, որ Գերմանիայի բարձրագույն մարզական պարգևն է^[1]^[2]։

Օլիմպիական խաղերից հետո Արտեմ Հարությունյանը մի որոշ ժամանակ մնացել է Գերմանիայի ազգային հավաքականի կազմում և շարունակել է մասնակցել խոշորագույն միջազգային մրցաշարերի։ 2017 թվականին նվաճել է բրոնզե մեդալ Չեխիայում անցկացվող միջազգային մրցաշարում և մասնակցել Համբուրգում անցկացվող աշխարհի առաջնությանը, որտեղ նա առաջին կիսամիջին քաշային կարգում պարտվել է ուզբեկ Իկբոլժոն Խոլդարովին քառորդ եզրափակչում^[3]։

Պրաֆեսիոնալ կարիերա[խմբագրել | խմբագրել կոդը]

2017 թվականի նոյեմբերին Արտեմ Հարությունյանը հաջողությամբ կատարել է իր նորամուտը պրոֆեսիոնալ մակարդակում՝ միավորներով հաղթելով իսպանացի Ավելինո Վասկեսին։

Ծանոթագրություններ[խմբագրել | խմբագրել կոդը]

↑ «Artem Harutyunyan». Rio 2016. Արխիվացված է օրիգինալից 2016 թ․ օգոստոսի 15-ին. Վերցված է 2016 թ․ օգոստոսի 11-ին.
↑ «Pressemitteilung des Bundespräsidialamtes vom 1. November 2016: Verleihung des Silbernen Lorbeerblattes» (գերմաներեն). Վերցված է 2017 թ․ մարտի 31-ին.
↑ Ըստ amateur-boxing.strefa.pl տվյալների բազայի նյութերի։

Արտաքին հղումներ[խմբագրել | խմբագրել կոդը]

Արտեմ Հարությունյան(անգլ.) — պրոֆեսիոնալ մենամարտերի վիճակագրություն BoxRec կայքում։
Արտեմ Հարությունյան – օլիմպիական վիճակագրությունը Sports-Reference.com կայքում (անգլ.)
Արտեմ Հարությունյան Արխիվացված 2018-11-18 Wayback Machine (անգլ.) — էջը AIBA Pro Boxing կայքում

[Bio-1] «Artem Harutyunyan». Rio 2016. Արխիվացված է օրիգինալից 2016 թ․ օգոստոսի 15-ին. Վերցված է 2016 թ․ օգոստոսի 11-ին.

[2] «Pressemitteilung des Bundespräsidialamtes vom 1. November 2016: Verleihung des Silbernen Lorbeerblattes» (գերմաներեն). Վերցված է 2017 թ․ մարտի 31-ին.

[3] Ըստ amateur-boxing.strefa.pl տվյալների բազայի նյութերի։

[1]

[2]

[3]