Արամ Թառայան

Վիքիպեդիայից՝ ազատ հանրագիտարանից
Jump to navigation Jump to search
Picto infobox med.png
Արամ Միսակի Թառայան
Ծնվել է1897
ԾննդավայրԲաքու
Մահացել է1959
Ազգությունհայ
ԿրթությունԵրևանի Մխիթար Հերացու անվան Պետական Բժշկական Համալսարան
Մասնագիտությունբժիշկ
ՊարգևներԿարմիր դրոշի շքանշան

Արամ Միսակի Թառայան (1897, Բաքու - 1959), հայ բժիշկ, ՀԽՍՀ վաստակավոր բժիշկ, Երկրորդ աշխարհամարտի մասնակից:

Կենսագրություն[խմբագրել | խմբագրել կոդը]

Ծնվել է ծառայողի ընտանիքում: Սովորել է տեղի, ապա՝ Թիֆլիսի գիմնազիայում: Ընդունվել է Թիֆլիսի համալսարանի բժշկական ֆակուլտետը, երեք տարի սովորելուց հետո տեղափոխվել Ռոստովի համալսարանի բժշկական ֆակուլտետը, ավարտել 1924 թվականին և վերադարձել Թիֆլիս: Աշխատել է քաղաքի երկաթգծի հիվանդանոցում որպես թերապևտ՝ ակտիվորեն մասնակցելով վարակիչ հիվանդությունների բաժանմունքի աշխատանքներին: Մեկ տարի հետո տեղափոխվել է Հայաստան: Եղել է Մարալիկի հիվանդանոցի առաջին բժիշկը: Տեղափոխվելով Երևան՝ աշխատանքի է անցել քաղաքի երկրորդ կլինիկական հիվանդանոցի ներքին հիվանդությունների բաժանմունքում: Երկու տարի աշխատել է Լ. Ա. Հովհաննիսյանի անմիջական ղեկավարությամբ:

1931 թվականին գործուղվել է Լենինական՝ մշտական աշխատանքի: Սկզբում եղել է դիսպանսերում, այնուհետև՝ քաղաքային պոլիկլինիկայում ու առաջին հիվանդանոցում՝ որպես ներքին հիվանդությունների բաժանմունքի վարիչ:

1941-1946 թվականներին եղել է № 2150 ճակատային հոսպիտալի երրորդ բաժանմունքի պետ (Արմավիր, Նալչիկ, Պրոխլադնի, Մոզդոկ), արժանացել շքանշանների, մեդալների ու պատվոգրերի: Զորացրվել է 1946 թվականին, վերադարձել Լենինական, ստանձնել քաղաքի առաջին հիվանդանոցի ներքին հիվանդությունների բաժանմունքի ղեկավարի պաշտոնը: 1949 թվականից միաժամանակ քաղաքի գլխավոր թերապևտն էր:

Գրել է սրտամկանի ինֆարկտի, ռևմատիզմի և այլ հիվանդությունների ու դրանց բուժման մասին գիտական հոդվածներ ու զեկուցումներ: Ղեկավարել է Լենինականի թերապևտների գիտական ընկերության բաժանմունքի գործունեությունը: Մասնակցել է թերապևտների համամիութենական 13-րդ գիտաժողովին:

1949 թվականին ընտրվել է Լենինականի քաղաքային խորհրդի պատգամավոր: Քաղաքի շախմատիստների ակումբի հիմնադիրներից է: ՀԽՍՀ Նախարարների խորհրդին կից ֆիզկուլտուրայի ու սպորտի կոմիտեն հատուկ որոշումներով բժշկին շնորհել է պատվավոր շախմատիստի կոչում:

Պարգևատրվել է Կարմիր դրոշի շքանշանով և բազմաթիվ մեդալներով[1]:

Ծանոթագրություններ[խմբագրել | խմբագրել կոդը]

  1. Ա. Վ. Գրիգորյան, Բ. Գ. Մելքումյան, Հայաստանի բժիշկները Մեծ հայրենականում, գիրք 2, Ե., 1987, էջ 87-89: