Արամ Գրիգորյան (քաղաքական գործիչ)

Այս հոդվածը քաղաքական գործչի մասին է։ Այլ գործածությունների համար այցելեք Արամ Գրիգորյան (այլ կիրառումներ)։

Վիքիպեդիայում կան հոդվածներ Գրիգորյան ազգանունով այլ մարդկանց մասին։

Արամ Գրիգորյան
Ծնվել է	սեպտեմբերի 27, 1977(1977-09-27) (47 տարեկան)
Ծննդավայր	Ստեփանակերտ, Ադրբեջանական ԽՍՀ, ԽՍՀՄ
Քաղաքացիություն	Հայաստան
Կրթություն	Արցախի պետական համալսարան և Երևանի Մխիթար Հերացու անվան Պետական Բժշկական Համալսարան
Մասնագիտություն	քաղաքական գործիչ

Արամ Արամայիսի Գրիգորյան (սեպտեմբերի 27, 1977, Ստեփանակերտ, Արցախ), հայ քաղաքական և պետական գործիչ։

Կենսագրություն և գործունեություն

Ծնվել է 1977 թ. սեպտեմբերի 27-ին, Ստեփանակերտ քաղաքում։ 1993 թ. ավարտել է Ստեփանակերտի թիվ 10 միջնակարգ դպրոցը։ 1993 թ. ընդունվել է Արցախի պետական համալսարանի բժշկակենսաբանական ֆակուլտետը։

1993-1995 թթ. ծառայել է ԼՂՀ Զինված ուժերում։ 1995 թ. ուսումը շարունակել և 1999 թ. ավարտել է Երևանի Մ. Հերացու անվան պետական բժշկական համալսարանի բուժական ֆակուլտետը։ 2002 թթ. նույն համալսարանի բազայի վրա ավարտել է կլինիկական օրդինատուրան՝ «Ընդհանուր վիրաբուժություն» մասնագիտությամբ։ 2004 թ. ավարտել է ԱրՊՀ տնտեսագիտական ֆակուլտետի հեռակա բաժինը։

2003 թ. ՀՀ Հանրապետական հիվանդանոցի ախտորոշման կենտրոնում անցել է կլինիկական օրդինատուրա՝ Էնդոսկոպիա մասնագիտությամբ։ 2008-2009 թթ. զբաղեցրել է ԼՂՀ առողջապահության փոխնախարարի պաշտոնը։ 2009 թ.-ի նոյեմբերի 1-ից ազատվել է զբաղեցրած պաշտոնից՝ իր դիմումի համաձայն, վերադառնալով մասնագիտական աշխատանքի ԼՂՀ Հանրապետական հիվանդանոց ՓԲԸ-ում։

2010 թ. մայիսի 23-ի խորհրդարանական ընտրություններում ընտրվել է ԼՂՀ հինգերորդ գումարման Ազգային Ժողովի պատգամավոր՝ մեծամասնական ընտրակարգով, թիվ 4 ընտրատարածքից։ 2010 թ. հունիսի 10-ին ընտրվել է ԱԺ սոցիալական ոլորտի հարցերի (2012 թվականից՝ սոցիալական և առողջապահության հարցերի) մշտական հանձնաժողովի նախագահի տեղակալ։ 2013 թ-ի հունվարի 9-ին ընտրվել է սոցիալական և առողջապահության հարցերի մշտական հանձնաժողովի նախագահի պաշտոնում։ «Ազատ Հայրենիք» կուսակցության անդամ է։ «Հայրենիք» խմբակցության անդամ է։

Ընտանիք

Ամուսնացած է, ունի երկու զավակ։