Անդրանիկ Այվազյան

Վիքիպեդիայից՝ ազատ հանրագիտարանից
Jump to navigation Jump to search
Picto infobox med.png
Անդրանիկ Այվազյան
Ծնվել է1850[1] կամ 1851[2]
ԾննդավայրԿեմերեկ, Սեբաստիայի նահանգ
Մահացել է1919
Մահվան վայրՆյու Յորք Ամերիկայի Միացյալ Նահանգներ ԱՄՆ
Ազգությունհայ
Մասնագիտությունթարգմանիչ
ԱմուսինԼուսաբեր Հազարապետյան
ՎիքիդարանԱնդրանիկ Այվազյան

Անդրանիկ Այվազյան (1850 կամ 1851, Կեմերեկ, Սեբաստիայի նահանգ - 1919, Նյու Յորք, ԱՄՆ), հայ բժիշկ, թարգմանիչ։

Նախնական կրթությունը ստացել է ծննդավայրում։ 1863 թվականին գալով Կ. Պոլիս՝ հաճախել է Ս. Փրկչի դպրոցը, որն ավարտել է 1867 թվականին և նույն դպրոցում աշխատել ուսուցի օգնական։ 1868 թվականին տեղափոխվել է Բաֆրա և վարել տնօրենի պաշտոն։ 1870-1875 թվականին Թալասի Ներքին թաղի Արշակունյաց վարժարանի տնօրենն էր։ Այստեղ ամերիկյան միսիոներներին ֆրանսերեն և թուրքերեն սովորեցնելով՝ փոխադարձաբար նրանցից անգլերեն է սովորում և սկսում է թղթակցել ամերիկյան մի պարբերականի։ Այդ թղթակցությունները գրավում է Կ. Պոլսի «Ավետաբեր» պարբերականի խմբագրի ուշադրությունը, որը նրան հրավիրում է թերթում թարգմանություններ անելու։ 1875-1884 թվականներին Կ. Պոլսում խմբագրական աշխատանք է կատարում։ Մասնակցում է ազգային կրթական և այլ շարժումների։ Անդամակցում է Արարատյան ընկերությանը իբրև փոխատենապետ, որոշ ժամանակ էլ՝ ընդհանուր ժողովի նախագահ։

1880 թվականին ամուսնանում է Լուսաբեր Հազարապետյանի հետ, սակայն վերջինս մեկ տարի հետո մահանում է։

Այնուհետև Անդրանիկ Այվազյանը նվիրվում է բժշկությանը։ Երկու տարի գիտական մասնավոր դասեր անցնելուց հետո՝ 1884 թվականին տեղափոխվում է Նյու Յորք, որտեղ ուսանում է բժշկական համալսարանում։ 1886 թվականին ավարտելով ուսումը՝ նույն տարվա աշնանը աշխատանքի է ընդունվում Նյու Յորքի հոգեբուժարանում։ 1887 թվականին, որպես քննիչ-բժիշկ, աշխատանքի է անցնում Նյու Յորքի առողջապահական վարչությունում, որտեղ պաշտոնավարում է քսան տարի։

Անդամակցել է մի շարք բժշկական ընկերությունների և մասոնական կարևոր մի օթյակի[2]։

Օգտագործել է Ա. ծածկանունը[1]։

Ծանոթագրություններ[խմբագրել | խմբագրել կոդը]

  1. 1,0 1,1 Բախտիար Հովակիմյան, Հայոց ծածկանունների բառարան, Ե., ԵՊՀ հրատ., 2005, էջ 557:
  2. 2,0 2,1 Մկրտիչ Պոտուրյան, Հայ հանրագիտակ, 1938, գիրք Ա, էջ 143: