Աղջկա աշտարակ (Տալլին)

Վիքիպեդիայից՝ ազատ հանրագիտարանից
Jump to navigation Jump to search
Աղջկա աշտարակն ու քաղաքային պատի մի հատվածը, 2011 թ.

Աղջկա աշտարակ (էստ․՝ Neitsitorn, Megede torn), աշտարակ Տալլինի պատի հարավարևմտյան կողմում։ Ընդգրկված է ՅՈՒՆԵՍԿՕ-ի համաշխարհային ժառանգության ցանկում։ Աշտարակում է տեղավորված Տալլինի քաղաքային թանգարանի մասնաճյուղը։

Աշտարակն իր անվանումն ստացել է աշտարակի կապիտան Հինսե Մոգհեի (գերմ.՝ Hinse Meghe) պատվին։ Հետագայում աշտարակի անվանումն ձևափոխվել է, դարձել գերմ.՝ Mägdethurm, Mädchenthurm, որի էստոներեն թարգմանությունից էլ առաջացել է Neitsitorn անվանումը։

Աշտարակը հավանաբար կառուցվել է XIV դարի առաջին քառորդում։ Առաջին անգամ այն հիշատակվում է 1373 թվականին։ Աշտարակի հիմքն ունի շեղանկյան տեսք։ Բարձրությունը 12.5 մ է։ Աշտարակն ունի երեք հարկ։

Լիվոնյան պատերազմի ժամանակ՝ 1577 թվականին, Տալլինը պաշարած ռուսները զգալիորեն վնասել են աշտարակը։ Հետագայում այն վերականգնվել է և մինչև 1626 թվականն օգտագործվել է որպես բանտ։ Հերթական վերակառուցումից հետո՝ 1842 թվականին, աշտարակն սկսել է օգտագործվել որպես բնակելի տուն։

19-րդ դարի վերջից մինչև 20-րդ դարի 60-ական թթ. աշտարակում տեղ էին գտել նկարիչների արվեստանոցներ, այդ թվում՝ Քրիստիան և Պաուլ Ռաուդների արվեստանոցները։ Երկրորդ համաշխարհային պատերազմից հետո երկար տարիներ Աղջկա աշտարակում ապրել է անվանի ճարտարապետ Կառլ Բուրմանը[1]։ Ավերված աշտարակն սկսեցին վերանորոգել 1968 թվականին՝ բավականին փոխելով ներքին դիզայնը։ Աշտարակի՝ միջնադարյան Ներքին քաղաքի կողմի պատը դարձրին ապակեպատ։ 1981 թվականին աշտարակում բացվեց «Neitsitorni» հայտնի ռեստորանը։ 2004-2011 թվականներին աշտարակը փակ էր։ Աշտարակի՝ Տալլինի քաղաքային թանգարանին հանձնելուց հետո սկսվեցին նորոգել այն։ Վերակառուցողական հիմնական աշխատանքներն սկսեցին 2012 թ. մայիսին և ավարտվեցին 2013 թ. փետրվարին։ Այդ ընթացքում վերակառուցվեցին աշտարակի չորս հարկերը, Աղջկա ու Տալի աշտարակների անցումը։ Կառուցվեց նոր անցում Աղջկա աշտարակից դեպի Կիկ-ին-դե-Կյոկ աշտարակը։

Ծանոթագրություններ[խմբագրել | խմբագրել կոդը]

Արտաքին հղումներ[խմբագրել | խմբագրել կոդը]