Ալֆոնսո Գարսիա Ռոբլես

	Ալֆոնսո Գարսիա Ռոբլես; իսպ.՝ Alfonso García Robles
Կրթություն՝	Մեքսիկայի ազգային ինքնավար համալսարան
Մասնագիտություն՝	դիվանագետ, գրող, փաստաբան և քաղաքական գործիչ
Ծննդյան օր	մարտի 20, 1911[…]
Ծննդավայր	Zamora de Hidalgo, Միչոական, Մեքսիկայի Միացյալ Նահանգներ
Վախճանի օր	սեպտեմբերի 2, 1991[…] (80 տարեկան)
Վախճանի վայր	Մեխիկո, Մեքսիկայի Միացյալ Նահանգներ
Թաղված	Spanish Cemetery
Քաղաքացիություն	Մեքսիկայի Միացյալ Նահանգներ
Ի ծնե անուն	իսպ.՝ Alfonso García Robles
Ինքնագիր
Պարգևներ	; և
Alfonso García Robles

Ալֆոնսո Գարսիա Ռոբլես ( իսպ.՝ Alfonso García Robles, մարտի 20, 1911(1911-03-20)^[1]^[2]^[3]^[…], Zamora de Hidalgo, Միչոական, Մեքսիկայի Միացյալ Նահանգներ - սեպտեմբերի 2, 1991(1991-09-02)^[1]^[2]^[3]^[…], Մեխիկո, Մեքսիկայի Միացյալ Նահանգներ), մեքսիկացի քաղաքական գործիչ, դիվանագետ, Մեքսիկայի արտաքին գործերի նախարար (1975-1976), 1982 թվականի Խաղաղության Նոբելյան մրցանակի դափնեկիր (Ալվա Մյուրդալի հետ միասին)։

Կենսագրություն[խմբագրել | խմբագրել կոդը]

Երիտասարդություն[խմբագրել | խմբագրել կոդը]

Ծնվել է Սամորայում (Միչոական նահանգ) Քուիրինոյի և Թերեզա Գարսիա Ռոբլեսի ընտանիքում։ Սկզբում մտադիր է եղել քահանա դառնալ, բայց հետո փոխել է իր միտքը՝ ընդունվելով Մեխիկոյի ազգային համալսարանի իրավաբանական բաժին։ 1933 թվականին ավարտել է միջազգային իրավունքի և միջազգային հարաբերությունների բաժինը, որից հետո ուսումը շարունակել է Փարիզում (1934-1937) և Հաագայի միջազգային իրավունքի ակադեմիայում (1938): Դեռ Եվրոպայում լինելով՝ Ռոբլսը ընդունվել է դիվանագիտական ծառայություն և երկու տարի անցկացրել է Շվեդիայում Մեքսիկայի դեսպանությունում։

Կարիերայի սկիզբ[խմբագրել | խմբագրել կոդը]

1941 թվականին վերադառնալով հայրենիք՝ նշանակվել է միջազգային կազմակերպությունների վարչության պետ, ապա՝ քաղաքական և դիվանագիտական ծառայության գլխավոր տնօրեն։ 1945 թվականին դարձել է Մեքսիկայի պատվիրակության անդամ Սան Ֆրանցիսկոյում կայացած խորհրդաժողովում, որի ժամանակ ստեղծվել է ՄԱԿ-ը։ Հետագայում աշխատել է Նյու Յորքի ՄԱԿ-ի քարտուղարությունում։ 1957 թվականին Մեքսիկա վերադառնալուց հետո նշանակվել է Արտաքին գործերի նախարարության Եվրոպայի, Ասիայի և Աֆրիկայի վարչության պետ, որի կապակցությամբ ակտիվ մասնակցել է 1958 և 1960 թվականներին ծովի օրենքի վերաբերյալ համաժողովներին։

Խաղաղապահ գործունեություն[խմբագրել | խմբագրել կոդը]

1962-1944 թվականներին եղել է Բրազիլիայում Մեքսիկայի դեսպան։ 1962 թվականի Կարիբյան ճգնաժամի իրադարձություններից հետո լրջորեն մտածել է Լատինական Ամերիկայում միջուկային գոտի ստեղծելու մասին պայմանագրի մասին։

1964 թվականին նշանակվել է Մեքսիկայի արտաքին գործերի նախարարի տեղակալ և այդ պաշտոնում խաղացել է Լատինական Ամերիկայում միջուկային զենքը արգելող Տլատելոլկոյի պայմանագրի (1967) ստորագրման հիմնական դերերից մեկը։

1967 թվականին նրան հանձնարարվել է գլխավորել Մեքսիկայի պատվիրակությունը ՄԱԿ-ի Ժնևի զինաթափման խորհրդաժողովում, որտեղ Ալվա Մյուրդալի հետ միասին ակտիվ մասնակցություն է ունեցել Միջուկային զենքի չտարածման մասին պայմանագրի մշակմանը, որն ընդունել են աշխարհի 115 պետություններ։

1970-1975 թվականներին եղել է ՄԱԿ-ի Մեքսիկայի ներկայացուցիչ, ապա մեկ տարի աշխատել է Մեքսիկայի արտաքին գործերի նախարար։ 1977 թվականից դարձել է ՄԱԿ-ի զինաթափման կոմիտեում Մեքսիկայի մշտական ներկայացուցիչ։ Ձգտել է գերտերությունների միջև փոխզիջման հասնել սպառազինությունների մրցավազքն ավարտելու հարցում։ 1978 թվականին տեղի է ունեցել առաջին նման նստաշրջանը, որի ժամանակ Ռոբլեսը պատասխանատու է եղել բանաձևի տեքստի նախագծի պատրաստման համար, որը ոչ ֆորմալ կերպով կոչվում էր «Վերջնական փաստաթուղթ»։ 1982 թվականին ՄԱԿ-ի Գլխավոր ասամբլեայի հատուկ նստաշրջանում առաջարկել է կազմակերպել զինաթափման համաշխարհային արշավ։ Գերտերությունների դիրքորոշման պատճառով հնարավոր չի եղել մշակել մեկ փաստաթուղթ, բայց գաղափարը լայն աջակցություն է ստացել, և 1982 թվականի ամռանը Ամերիկայի Միացյալ Նահանգներում և Եվրոպայում անց են կացվել հազարավոր հակամիջուկային ցույցեր։

Վերջին տարիներ[խմբագրել | խմբագրել կոդը]

1982 թվականին Ալվա Միրդալի հետ միասին ստացել է Խաղաղության Նոբելյան մրցանակ՝ զինաթափման և միջազգային բանակցությունների ոլորտում քսանամյա աշխատանքի համար^[6]։ Իր Նոբելյան դասախոսության ժամանակ Ռոբլսը խոսել է Տլատելոլկոյի պայմանագրի նախապատրաստման և բովանդակության մասին՝ լսարանին հիշեցնելով, որ Լատինական Ամերիկայի միջուկային գոտին, ցավոք, այլ խիտ բնակեցված տարածքներում հետևորդներ չի գտել։

1985 թվականին ընտրվել է ՄԱԿ-ի զինաթափման հանձնաժողովի նախագահ։

Անձնական կյանք[խմբագրել | խմբագրել կոդը]

1949 թվականին Մերձավոր Արևելքում ՄԱԿ-ի առաքելությունը ղեկավարելիս Ռոբլսը հանդիպել է Պերուի պատվիրակ Խուանա Մարիա Սիսլո Վալդելոմարին, որի հետ ամուսնացել է մեկ տարի անց։ Ընտանիքն ուներ երկու որդի՝ Ալֆոնսո և Ֆերնանդո։

Ծանոթագրություններ[խմբագրել | խմբագրել կոդը]

↑ ^1,0 ^1,1 ^1,2 ^1,3 ^1,4 Encyclopædia Britannica
↑ ^2,0 ^2,1 ^2,2 ^2,3 ^2,4 Բրոքհաուզի հանրագիտարան (գերմ.)
↑ ^3,0 ^3,1 ^3,2 ^3,3 ^3,4 Gran Enciclopèdia Catalana (կատ.) — Grup Enciclopèdia, 1968.
↑ The Nobel Peace Prize 1982 — Nobel Foundation.
↑ Table showing prize amounts — Nobel Foundation, 2019.
↑ Альфонсо Гарсия Роблес в энциклопедии «Кругосвет».

Վիքիպահեստն ունի նյութեր, որոնք վերաբերում են «Ալֆոնսո Գարսիա Ռոբլես» հոդվածին։

[_22ed90e0c5547330-1] 1,0 ^1,1 ^1,2 ^1,3 ^1,4 Encyclopædia Britannica

[_efa24612a1111620-2] 2,0 ^2,1 ^2,2 ^2,3 ^2,4 Բրոքհաուզի հանրագիտարան (գերմ.)

[_6df13f594dd7a2b7-3] 3,0 ^3,1 ^3,2 ^3,3 ^3,4 Gran Enciclopèdia Catalana (կատ.) — Grup Enciclopèdia, 1968.

[_136495cf2ed9f1d9-4] The Nobel Peace Prize 1982 — Nobel Foundation.

[_91240182028fc537-5] Table showing prize amounts — Nobel Foundation, 2019.

[6] Альфонсо Гарсия Роблес в энциклопедии «Кругосвет».

[1]

[2]

[3]

[4]

[5]

[6]