Ավարտել է Լանկաստերի թագավորական միջնակարգ դպրոցը և Մանչեստերի համալսարանը, որտեղ սովորում էր հոգեբանության ֆակուլտետում։ Համալսարանը ավարտելուց հետո սկսեց աշխատել հեռուստատեսությունում, իսկ հետո դարձավ անկախ մոնտաժոր։ 2002 թվականին աշխատանքների ընդմիջումների ժամանակ սկսեց գրել իր առաջին վեպը՝ «Արյուն և երկաթ» (անգլ.՝ The Blade Itself), որը ավարտեց 2004 թվականին։ Վեպը տպագրվել է 2006 թվականին «Gollancz» հրատարակության կողմից, որից հետո Աբերկրոմբին գրեց «Առաջին օրենք» եռագրության մնացած երկու մասերը. «Մինչ նրանց կախաղան կհանեն» (անգլ.՝ Before They Are Hanged) և «Թագավորների վերջին փաստարկը» (անգլ.՝ Last Argument of Kings)։ SFF World թեմատիկ ռեսուրսի մասնակիցների կողմից նրա վեպերը երկու անգամ ճանաչվել են «Տարվա գրքեր»։ 2008 թվականին Ջոն մասնակցել է BBC World of Fantasy հաղորդմանը այնպիսի գրողների հետ, ինչպիսիք են Մայքլ Մուրկոկը, Թերրի Փրաթչեթը, Չայնա Մևիլը։ Ներկա ժամանակներում ապրում է Սոմերսեթ կոմսության Բատ քաղաքում։