Փափագ Ալոյան

Փափագ Ալոյան
Ծնվել է	փետրվարի 28, 1951 (73 տարեկան)
Ծննդավայր	Կիրովական, Հայկական ԽՍՀ, ԽՍՀՄ
Քաղաքացիություն	Հայաստան
Կրթություն	Վանաձորի նկարչական դպրոց (1967) և Հայկական պետական մանկավարժական համալսարան (1972)
Մասնագիտություն	նկարիչ և քանդակագործ
Պարգևներ	Հայաստանի մշակույթի նախարարության ոսկե մեդալ
	Papaz Aloyan Վիքիպահեստում

Վիքիպեդիայում կան հոդվածներ Ալոյան ազգանունով այլ մարդկանց մասին։

Փափագ Սուրենի Ալոյան (ԱԼՓԱ) (փետրվարի 28, 1951(1951-02-28), Կիրովական, Հայկական ԽՍՀ, ԽՍՀՄ), հայ նկարիչ։

Կենսագրություն[խմբագրել | խմբագրել կոդը]

1967 թվականին ավարտել է Կիրովականի Ստեփան Աղաջանյանի անվան նկարչական դպրոցը։
1972 թվականին ավարտել է Երևանի Խաչատուր Աբովյանի անվան հայկական պետական մանկավարժական ինստիտուտի գեղագիտության ֆակուլտետի գեղանկարչության բաժինը։

• 1972 - 1988 թթ. –ի ընթացքում դասավանդել է թիվ 8 հանրակրթական դպրոցում։ • 1972 - 1973 թթ. –ին ծառայել է Բելագորսկ քաղաքում, որտեղ, ծառայության ընթացքում, ակտիվ մասնակցություն է դրսևորել Հեռավոր Արևելքի Մարտական Փառքի թանգարանի ձևավորման աշխատանքներին՝ պարգևատրվելով հատուկ դիպլոմով։ • 1974 թ. –ին ամուսնանում է, ունի երկու զավակ։

1975 թվականից մասնակցում է միջազգային, միութենական, հանրապետական և համաքաղաքային ցուցահանդեսների։
1985-2001 թթ. աշխատել է Հայաստանի գեղագիտության ազգային կենտրոնի Վանաձորի մասնաճյուղում` որպես կերպարվեստի ուսուցիչ-խմբավար, այնուհետև՝ փոխտնօրեն։
2001 թվականից Վանաձորի կերպարվեստի թանգարանի տնօրենն է։
1996-2013 թթ. Հայաստանի նկարիչների միության Վանաձորի նկարիչների բաժանմունքի պատասխանատու քարտուղար։
2013 թվականից Հայաստանի նկարիչների միության Լոռու մարզի նկարիչների բաժանմունքի նախագահն է։

1987 թ.՝ ԽՍՀՄ նկարիչների միության անդամ։
1991 թ.՝ Հայաստանի նկարիչների միության անդամ։
2011 թ.՝ Մոնրեալի միջազգային ինֆորմատիզացիայի ակադեմիայի անդամ։

Ցուցահանդեսներ[խմբագրել | խմբագրել կոդը]

1984 թ. հոկտեմբեր, Կիրովական
1988 թ. մայիս, Երևան
1992 թ. հոկտեմբեր, Փարիզ
2001 թ. մայիս, Վանաձոր
2011 թ. հոկտեմբեր, Վանաձոր
2016 թ. հունիս, միջազգային նկարչական պլենեռ, Բելառուսիա^[1]^[2]
2016 թ. –ի սեպտեմբերի 13 -ին, Հայաստանում Գերմանիայի Դաշնային հանրապետության դեսպանատանն իրականացավ «Art+X» շարքի հերթական ցուցադրությունը, որտեղ ներկայացվեցին գեղանկարիչներ Փափագ Ալոյանի և Ռոլֆ Մյուլլերի ստեղծագործություններից։
2022 թ. –ի մարտի 4 -ից 30 -ը, «Коллегиум» ամենամյա միջազգային ցուցահանդես, Օրշա քաղաքի պատկերասրահ, Վիտեբսկի մարզ, Բելառուսիա^[3]^[4]

Պարգևներ[խմբագրել | խմբագրել կոդը]

2011 թ. – Հայաստանի մշակույթի նախարարության ոսկե մեդալ
ԱԼՓԱ արվեստագետի ավանդը մինչև այժմ գնահատվել է նաև տարբեր ատյանների կողմից շնորհված պատվոգրերով, դիպլոմներով և շնորհակալագրերով։

Մշակութային գործունեություն[խմբագրել | խմբագրել կոդը]

Գեղանկարիչ - բանաստեղծ Փափագ Ալոյանն իր բազմամյա մանկավարժական գործունեությունը,

ստեղծագործելը, պաշտոնավարելը, վեր է ածել յուրօրինակ նվիրումի` հանրապետությանը ծառայելով որպես գեղագետ ու լավագույն արժեքների պահպանման, արվեստի զարգացման գործի անդավաճան նվիրյալ։ 1995 թվականից դառնում է Հայաստանի գեղագիտության ազգային կենտրոնի Վանաձորի մասնաճյուղի հիմնադիր անդամներից ու գեղարվեստի առաջին ուսուցիչներից մեկը։ 1975 թվականից ի վեր, մասնակցելով միջազգային, միութենական, հանրապետական ցուցահանդեսների, բազմիցս ունենալով իր անհատականը, Փ. Ալոյանը փաստեց, որ Լոռու բնաշխարհում ապրում և ստեղծագործում է հայրենի եզերքն իր գունաշխարհը գովերգող բարձրարվեստ գեղանկարիչ։

Նրա կտավներում (բնանկարներ, նատյուրմորտներ, դիմանկարներ և այլն) էական հատկանիշները հառնում են ներքին ոգեղենությամբ ու տարերքի ուժգնությամբ՝ համեմվելով, որքան էլ զարմանալի է, գունային մեղմ տոներով, համանվագ ինքնալրացմամբ։

1990 թվականին, հեղինակելով Ռուսաստանի Ադլեր քաղաքում տեղադրված «Հայոց անմեղ զոհերի անմար հիշատակին» խաչքար - հուշարձանը,

նպաստում է հայ համայնքի գործունեությանը, հատկապես հայեցի կրթության ու դաստիարակության բնագավառում։

Ստեղծագործական և աշխատանքային ակտիվ գործունեության արդյունքում կազմակերպվել են թվով 145 խմբային և անհատական ցուցահանդեսներ՝ արվեստասերներին հաղորդակից դարձնելով ոչ միայն տեղի, այլև մայրաքաղաքի, շրջանների, սփյուռքի նկարիչների գործերին։ 2001 թվականին հրատարակված «Անթեղ» բանաստեղծությունների ժողովածուն փաստեց, որ ի դեմս Փ. Ալոյանի՝ ունենք նաև գողտրիկ բանաստեղծությունների հեղինակի։ Արվեստագետի ավանդը մինչև այժմ գնահատվել է տարբեր ատյաններից շնորհված պատվոգրերով, դիպլոմներով, շնորհակալագրերով, իսկ 2011 թվականի հունիսին Փափագ Ալոյանն ընտրվեց Միջազգային Ինֆորմատիզացիայի ակադեմիայի իսկական անդամ (Մոնրեալ)։ Այսօր էլ նա լի է ստեղծագործելու և հասարակական մանկավարժական գործունեությամբ, իր բեղմնավոր աշխատանքը շարունակելու ավյունով։ Նրա բազմաթիվ գեղանկարչական աշխատանքներ լրացնում են աշխարհի տարբեր երկրների հավաքածուները։

Ալբոմներ և գրքույկներ[խմբագրել | խմբագրել կոդը]

2001 թվականին հրատարակվել է նրա «Անթեղ» բանաստեղծությունների գրքույկը^[5]։
2011 թվականին նկարչի 60-ամյակի կապակցությամբ հրատարակվել է ալբոմ, ուր զետեղված են հեղինակի ստեղծագործական գործունեության տարբեր ժամանակների գեղանկարչական և գրաֆիկական աշխատանքներ, բանաստեղծություններ ու ասույթներ^[6]։

Նրա բազմաթիվ գեղանկարչական աշխատանքներ լրացնում են աշխարհի տարբեր երկրների և՛ անհատական, և՛ թանգարանային հավաքածուները։

Մեջբերումներ Փափագ Ալոյանի մասին[խմբագրել | խմբագրել կոդը]

«Մենք հպարտ ենք քեզնով, սիրելի Փափագ»։
Պրոֆ. Ազատ Վարդանյան
Ինֆորմատիզացիայի միջազգային Ակադեմիայի նախագահ, Մոնրեալ/Կանադա

«Փափագի արարած գեղանկարի սիմֆոնիան շռայլ գունախաղերով մխրճվում է կախարդված դիտողի հոգու գաղտնարանները` նրան փոխանցելով Վարպետի մաքրասուրբ երևակայության սավառնումների շլացուցիչ էներգիան…»
Մ. Միրիջանյան
Արահետ բազմաբնույթ պարբերականի գլխավոր խմբագիր

«ԱԼՓԱ –ի կտավներում էական հատկանիշները հառնում են ներքին ոգեղենությամբ ու տարերքի ուժգնությամբ՝ համեմվելով, որքան էլ զարմանալի է, գունային մեղմ տոներով, համանվագ ինքնալրացմամբ։»
Սամվել Խալաթյան
Դրամատուրգ, ՀՀ մշակույթի Վաստակավոր գործիչ

«…ԱԼՓԱ-ի կտավներում հայրենի եզերքի հետ հանդիպման ջերմությունն ակամա փոխանցվում է դիտողին, և կարծես ճամփորդում ենք նրա հետ՝ ինքնուրույն բացահայտելով հրաշք բնաշխարհի ձգողական գեղեցկության նորանոր գաղտնիքները… Նրա ստեղծագործությունները լի են լույսով և դրական էներգիայով։ Կոմպոզիցիոն լուծումները, հագեցած գունագամման, մտածողության արտահայտչականությունը, հեղինակի անհատական լեզուն, տաք և սառը երանգների խաղը ծնում են աներևակայելի ԼՈՒՅՍ։ Նկարչի որոշ գործեր ասես գեղանկարչական նովելներ լինեն, որտեղ շռայլորեն միահյուսվում են երաժշտությունն ու պոեզիան…»
Ռուզաննա Մխիթարյան
Վանաձորի կամերային երգչախմբի և Գուգարաց թեմի Ս. Նարեկացի եկեղեցու հոգևոր երգչախմբի Գեղարվեստական ղեկավար

«Իմ տան պատին փակցված փոքրիկ նկարից մի մեծ, շատ մեծ աշուն է ինձ հառնում; Աշունները գալիս ու գնում են, աշունների գույները խամրում են, բայց միշտ վառ ու գունեղ են իմ նկարի աշնան գույները։ Իմ նկարում աշունն ասես փթթում է, փոթորկվում ու ինքն իրենից ելնում է։ Իմ նկարի աշունն ասես ինձ հետ խոսում է իմ ընկերոջ` գեղանկարիչ Փափագ Ալոյանի հանգով, նրա արարած գույներով, ու մենք ներդաշն զրույցի մեջ ենք հավետ…»
Գագիկ Անտոնյան
Կանաչ Լոռի բնագիտական, բնապահպանական ամսագրի գլխավոր խմբագիր