Վարդանանք (ՌՀԴԱ)
Անվան այլ կիրառումների համար տե՛ս՝ Վարդանանք (այլ կիրառումներ)
| Վարդանանք | |
|---|---|
 | |
| Տեսակ | հասարակական կազմակերպություն |
| Պաշտ. լեզու(ներ) | հայերեն |
| Ակումբի նախագահ | Սաթենիկ Աբրահամյան[1] |
| Ակումբի փոխնախագահ | Ռուզաննա Կրպեյան[1] |
| Ակումբի փոխնախագահ | Աննա Բախշյան[1] |
| Ակումբի խորհրդական | Արկադի Տեր-Թադևոսյան[1] |
| Կայք | Պաշտոնական կայք |
Վարդանանք, 1996 թ. Երևանի պետական համալսարանում հիմնադրված ռազմահայրենասիրական դաստիարակության ակումբ։ Ստեղծվել է երիտասարդության, ուսանողության շրջանում հայրենասիրական ոգին բարձրացնելու, ռազմահայրենասիրական գաղափարներ տարածելու և արցախյան ազատամարտում ընկած հայորդիների հիշատակը վառ պահելու նպատակով[2]։ Ակումբի ստեղծման պահից սկսված, այն համալրվել է ԵՊՀ գրեթե բոլոր ֆակուլտետների ուսանողներով, ովքեր, միավորվելով մեկ գաղափարի շուրջ, մշակել են մի շարք ծրագրեր՝ իրենց նպատակներին հասնելու համար։ Ակումբի նախագահը Սաթենիկ Աբրահամյանն է[2]։
Համալսարանի և Հայկական բանակի միջև եղած կապը ամրապնդելու համար պարբերաբար այցելություններ են արվում տարբեր զորամասեր, կազմակերպվում են տարբեր միջոցառումներ[3]։
Տարեգրություն[խմբագրել | խմբագրել կոդը]
- 2002 թ. Համահայկական երիտասարդական հիմնադրամի կողմից «Վարդանանք»-ին ռազմահայրենասիրական դաստիարակության բնագավառում լուրջ հաջողությունների հասնելու համար շնորհված Հայկյան մրցանակը։
- 2003 թ. անցկացվում է զոհված ուսանող-ազատամարտիկների հիշատակին նվիրված շախմատի համահամալսարանական մրցաշար։
- 2006-2007 թթ. Երևանի պետական համալսարանի տարբեր մասնաշենքերում «Վարդանանքի» նախաձեռնությամբ և ԵՊՀ ռեկտոր Արամ Սիմոնյանի հովանավորությամբ բացվել են զոհված ուսանող-ազատամարտիկների անվան 15 վերանորոգված լսարաններ, որտեղ և նրանց ծննդյան և մահվան օրերին տեղի են ունենում հանդիպումներ նրանց մարտական ընկերների, հարազատների հետ։
- 2007 թ. «Վարդանանքի» նախագահ Սաթենիկ Աբրահամյանը, մայրերի խորհրդի նախագահ Մարո Սարգսյանը և ևս 10 վարդանանքցիներ արժանացել են Կրթության և գիտության նախարարության կողմից պատվոգրի։
- 2007 թ. Արկադի Տեր-Թադևոսյանի ղեկավարած ՀՀ պաշտպանական մարզատեխնիկական հասարակական կազմակերպության հետ կնքվել է «Փոխըմբռնման հուշագիր»։ Իրականացվում են ծրագրեր և միջոցառումներ, որոնք նպաստում են Հայաստան-Արցախ-Ջավախք-Սփյուռք հասարակական, տնտեսական, մշակութային կապերի ամրապնդմանը՝ երիտասարդության առավելագույն ներգրավմամբ[3]։
- 2008 թ. հրատարակվում է «Վարդանանք» պարբերականը, որտեղ լուսաբանվում են ինչպես «Վարդանանք»-ի գործունեությունը, այնպես էլ համալսարանական միջոցառումները, շոշափվում են ուսանողությանը հուզող հարցեր, ընթերցողին են ներկայացվում ակնարկներ ազատամարտիկների և Հայաստանի տարբեր վայրերի մասին։ Թերթի երկրորդ էջում մշտապես տեղադրվում են այդ և հաջորդ ամսին ծնված կամ զոհված մեր ուսանող-ազտամարտիկների անունները[3]։
Ծրագրեր[խմբագրել | խմբագրել կոդը]
- «Դասը վարում են համալսարանականները» - Ծրագրի շրջանակներում այցելում են Երևանի պետական համալսարանի զոհված ուսանող-ազատամարտիկների անվան դպրոցներ, հանդիպում են ուսուցչական կազմի հետ, արիության և հայրենասիրության դասեր են անցկացնում աշակերտների հետ։
- «Ոչ ոք չի մոռացվել, ոչինչ չի մոռացվել» - վարդանանքցիները հանդիպում են զոհված ուսանողների մարտական ընկերներին, հարազատներին։ Ծրագիրը իրականացվում է ԵՊՀ զոհված ազատամարտիկ-ուսանողների ծննդյան և մահվան օրերին։
- «Արդյունավետ մտածողություն» - դասընթացի շրջանակներում անցկացվում է առաջին կուրսեցիներին ներհամալսարանական կյանքին հաղորդակից դարձնելու արագացված կուրս, սեմինարներ։
- «Բարի գործ, բարի կամք, բարի ելք» - կամավորական աշխատանքների ծրագրով մեր ակումբականները հանդիպում են մեր զոհված ուսանողների ծնողներին, այցելում են մանկատներ կամ ռեզերվ կենտրոններ, հանդիպում միայնակ, լքված մանուկների, ծերերի։
- «Հայոց մեծեր» օրացուցային շարք ծրագրի շրջանակներում այցելում են տուն-թանգարաններ, կազմակերպում ընթերցումներ, ցուցահանդեսներ։
- «Մարդը, իրավունքը, անհատը և հասարակությունը Հայաստանում» քաղաքացիական և հասարակական կրթության դասընթաց «Մարդու Իրավունքների և Ժողովրդավարության Ինստիտուտի» հետ համատեղ իրականացվող ծրագիր։
- «Ճանաչիր հայրենի բնությունդ» - այցելում են տարբեր պատմա-ճարտարապետական կոթողներ, համալիրներ։ Այդ տարածքներում կազմակերպում են շաբաթօրյակներ և տվյալ ժամանակին համահունչ փոքր համերգ-ընթերցումներ։
- «Երիտասարդությունն ընդդեմ ցեղասպանության» - Կազմակերպվում են ցեղասպանության թեմայով ընթերցումներ տարբեր լեզուներով, ցեղասպանությանը նվիրված ֆիլմերի դիտումներ, ցուցահանդեսներ և այցելություն ցեղասպանության թանգարան։
- «Ժուռնալիստներն ազատամարտիկների հիշատակին» - ԵՊՀ ժուռնալիստիկայի ֆակուլտետի և «Նորայր Մարության» հիմնադրամի համատեղ ուժերով անցկացվող ակնարկների մրցույթ։
Ծանոթագրություններ[խմբագրել | խմբագրել կոդը]
- ↑ 1,0 1,1 1,2 1,3 Գլխավոր էջ
- ↑ 2,0 2,1 «Վարդանանք ՌՀԴԱ-ի գլխավոր էջ». Արխիվացված է օրիգինալից 2014 թ․ օգոստոսի 13-ին. Վերցված է 2015 թ․ փետրվարի 17-ին.
- ↑ 3,0 3,1 3,2 ԵՊՀ «Վարդանանք» ՌՀԴԱ, YSU "VARDANANQ"