Ռոստոմ
Ռոստոմ (18 Յունուար 1867 - 19 Յունուար 1919)-- Հայ ազգային ազատագրական շարժման գործիչ, Հայ Յեղափոխական Դաշնակցութեան հիմնադիրներէն:
Ռոստոմ, բուն անունով՝ Ստեփան Զօրեան, ծնած է Գողթն գաւառի Ցղնա գիւղը 18 Յունուար 1867ին։ Նահապետական ու բարեկեցիկ ընտանիքի զաւակ էր: Նախնական ուսումը ստացած է ծննդավայրի ծխական դպրոցին մէջ, ապա անցած է Թիֆլիսի Բէգլարեան մասնաւոր դպրոցն ու պետական ռէալական վարժարանը եւ, այնուհետեւ, Վարշաւայի մերձակայ Նովօ–Աղեքսանդրեան Գիւղատնտեսական ճեմարանն ու Մոսկուայի Պետրովսկայա Գիւղատնտեսական ճեմարանը։
Ուսանողական բողոքի քայլերու եւ ցոյցերու աշխոյժ մասնակցութեան եւ կազմակերպման համար, Ռոստոմ ռուս ցարական իշխանութիւններէն երկու անգամ ձերբակալուեցաւ ու աքսորուեցաւ:[1]
Յեղափոխական միտք ու հաւատք տարածեց որպէս մտաւորական՝ ուսուցիչ ու խմբագիր: Միաժամանակ եղաւ յեղափոխական մարտական գործիչ՝ որպէս զէնք եւ ռումբ պատրաստող, ինչպէս նաեւ ժողովրդային ինքնապաշտպանութեան կռուի կազմակերպիչ:
Բծաւոր տիֆէ վարակուած եւ անբուժելի թոքատապի մատնուած՝ մահացաւ 1919 Յունուար 18էն 19ի լուսցող գիշերը, Թիֆլիսի մէջ:
