Ռազմական փող

Ռազմական փող, ռազմական արժույթ, թղթադրամի հատուկ տեսակ, որ մի պետության զինվորական իշխանությունները, որպես վճարման պարտադիր միջոց, շրջանառության մեջ են դնում մյուս երկրի (երկրների խմբի) տարածքում։ Ռազմական փողը (օկուպացիոն փողը) կատարում է միայն շրջանառության ու վճարման միջոցի ֆունկցիաներ և չի կարող լինել արժեչափ, գանձակուտակման միջոց ու համաշխարհային փող։ Թղթադրամից տարբերվում է առանձնահատուկ ու ինֆլյացիոն բնույթով, շրջանառման կարճատևությամբ ու տարածքի սահմանափակությամբ, որևէ ապահովվածության բացակայությամբ, տեղական վալյուտայի նկատմամբ հարկադրական կուրսով։

Առաջին համաշխարհային պատերազմի տարիներին ռազմական փող թողարկել է պատերազմող երկրների մեծ մասը։

Երկրորդ համաշխարհային պատերազմի տարիներին Ռազմական փող է բաց թողել Նացիստական Գերմանիան (Լեհաստանում, Բելգիայում, Նիդերլանդներում, Լյուքսեմբուրգում, Ֆրանսիայում, Հարավսլավիայում, Հունաստանում, Արևելյան Եվրոպայի և Խորհրդային Միության օկուպացված տարածքներում), իսկ պատերազմի վերջին շրջանում և դրա ավարտից հետո՝ ԱՄՆ-ն ու Մեծ Բրիտանիան (Ֆրանսիայում, Իտալիայում, Բելգիայում, Նիդերլանդներում, Արևմտյան Գերմանիայում և այլուր) և Խորհրդային Միությունը (Ավստրիայում, Գերմանիայում և այլուր)։

Պատկերասրահ

• 
  50 օտսմարկ, 1918 թվական
• 
  10 ռայխսփֆենինգ, 1940 թվական
• 
  1 գուլդեն, 1942 թվական
• 
  1 ֆունտ, 1942 թվական
• 
  50 կարբովանեց, 1942 թվական
• 
  1 պենգյո, 1944 թվական
• 
  1000 մարկ, 1944 թվական
• 
  20 իեն, 1945 թվական

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։